ಒಂದು ಕಡೆ ಭಕ್ತರ ಸಾಲು..ಮತ್ತೊಂದು ಕಡೆ ಒಳ ಹೋಗಲು ಸರತಿ ಕಾಯುತ್ತ ನಿಂತಿರುತ್ತಿದ್ದ ಕಾರುಗಳು..ಮತ್ತೊಂದೆಡೆ ಬಸ್ಸುಗಳಿಂದ ಇಳಿದು ಪರಮಾತ್ಮನ ದರ್ಶನಕ್ಕೆಂದು ಓಡುತ್ತಿದ್ದ ಪ್ರವಾಸಿಗರ ಗುಂಪು….ಯಾವುದಕ್ಕೂ ಯಾರಿಗೂ ತೊಂದರೆಯಾಗದಂತೆ ನೋಡಿಕೊಳ್ಳಲು ನಿಯೋಜಿತವಾಗಿರುವ ಸ್ವಯಂ ಸೇವಕರು….ಇದು ಬೆಂಗಳೂರಿನ ವೆಸ್ಟ್ ಆಫ್ ಕಾರ್ಡ್ ರಸ್ತೆಯ ಇಸ್ಕಾನ್ ಮಂದಿರದಲ್ಲಿ ನಿತ್ಯ ಕಾಣುತ್ತಿದ್ದ ದೃಶ್ಯ. ಆದರೆ ಕಳೆದ ಮೂರು ತಿಂಗಳಿಂದ ಈ ದೃಶ್ಯದಲ್ಲಿ ಸ್ವಲ್ಪ ವ್ಯತ್ಯಾಸವಾಗಿದೆ. ಕಾರಣ ಕೋವಿಡ್ 19.
ಇನ್ನು ಜನ್ಮಾಷ್ಟಮಿ, ವೈಕುಂಠ ಏಕಾದಶಿ ಬಂತೆಂದರೆ ಮಂದಿರದ ಮುಂದೆ ಭಕ್ತರ ದಂಡು. ಮೈಲುದ್ದದ ಸಾಲು. ಮಂದಿರಕ್ಕೆ ಹೋಗಲು ವಿವಿಧ ಬಣ್ಣದ ಪಾಸುಗಳು. ಯಾರಿಗೂ ಯಾವುದೇ ರೀತಿಯ ಅಡಚಣೆಯಾಗದಂತೆ ತೆಗೆದುಕೊಳ್ಳುತ್ತಿದ್ದ ಮುತುವರ್ಜಿ. ಆದರೆ ಈ ಬಾರಿ ಸ್ವಲ್ಪ ಬದಲಾಗಿದೆ. ಕಾರಣ ಕೋವಿಡ್ 19.
ಈ ಬಾರಿ ಎಲ್ಲವೂ ಆನ್ ಲೈನ್ . ಶಾಲಾ ತರಗತಿಗಳು ಆನ್ ಲೈನ್ , ಕಾರ್ಪೋರೇಟ್ ಮೀಟಿಂಗ್ ಗಳು ಆನ್ ಲೈನ್ ಅಷ್ಟೇ ಏಕೆ ರಾಜಕೀಯ ಭಾಷಣಗಳೂ ಆನ್ ಲೈನ್, ಕೆಲಸವೂ ಆನ್ ಲೈನ್ . ದೇವರ ಪ್ರಾರ್ಥನೆಯೂ ಆನ್ ಲೈನ್. ಇದು ಕೋವಿಡ್ ತಂದಿಟ್ಟ ಅನಿವಾರ್ಯತೆ.
ಹಾಗಾಗಿಯೇ ಇಸ್ಕಾನ್ ಕೂಡ ಸಂಭ್ರಮದ ಕೃಷ್ಣ ಜನ್ಮಾಷ್ಟಮಿಯನ್ನು ಈ ಬಾರಿ ಡಿಜಿಟಲೀಕರಣ ಗೊಳಿಸಿದೆ. ಮನೆಯೇ ಮಂತ್ರಾಲಯ ಎಂಬುದನ್ನು ಸಾಕಾರಗೊಳಿಸುತ್ತಿದೆ.ಮನೆಯಲ್ಲೇ ಕುಳಿತು ಜನ್ಮಾಷ್ಟಮಿಯ ಸಂಭ್ರಮವನ್ನು ಕಣ್ತುಂಬಿಕೊಳ್ಳಲು ವ್ಯವಸ್ಥೆ ಕಲ್ಸಿಸಿದೆ.
ಸಂಪೂರ್ಣ ಡಿಜಿಟಲ್
ಆಗಸ್ಟ್ 11 ಮತ್ತು 12 ರಂದ ನಡೆಯುವ ಈ ಬಾರಿಯ ಜನ್ಮಾಷ್ಟಮಿ ಸಂಪೂರ್ಣ ಡಿಜಿಟಲ್ ಆಗಿರುತ್ತದೆ ಎನ್ನುತ್ತಾರೆ ಇಸ್ಕಾನ್ ನ ಮಾಧ್ಯಮ ವಕ್ತಾರ ಕುಲಶೇಖರ ದಾಸ ಪ್ರಭು.ಫೇಸ್ ಬುಕ್ , ಯೂ ಟ್ಯೂಬ್ , ಇನ್ಸ್ ಸ್ಟಾ ಗ್ರಾಮ್ ,ಟ್ವಿಟರ್ ಹೀಗೆ ಎಲ್ಲಿ ಸಾಧ್ಯವಾಗುತ್ತೋ ಅಲ್ಲಿಂದಲೆ ಶ್ರೀಕೃಷ್ಣನ ದರ್ಶನ ಭಾಗ್ಯ ಪಡೆಯಬಹುದೆಂದು ಅವರು ಕನ್ನಡಪ್ರೆಸ್ .ಕಾಮ್ ಗೆ ತಿಳಿಸಿದ್ದಾರೆ.
ಮುಂಜಾನೆ ಶ್ರೀ ರಾಧಾಕೃಷ್ಣಚಂದ್ರ ದೇವರಿಗೆ ನೆಡಯುವ ತೆಪ್ಪೋತ್ಸವ, ನಂತರದ ಅಭಿಷೇಕ,ನಾನಾ ರೀತಿಯ ಸೇವೆಗಳು ಎಲ್ಲವೂ ಲೈವ್ ಆಗಿ ಬಿತ್ತರವಾಗಲಿವೆ. ನೀವಿರುವ ಕಡೆಯಲ್ಲೇ ಮೊಬೈನಲ್ಲೇ ಪರಮಾತ್ಮನ ದರ್ಶನ ಪಡೆಯಬಹುದು.
ಈ ಬಾರಿಯ ಮತ್ತೊಂದು ವಿಶೇಷವೆಂದರೆ ಹೆಸರಾಂತ ಕಲಾವಿದರ ಲೈವ್ ಸಂಗೀತ ಕಚೇರಿಗಳು.ಕು.ಸೂರ್ಯ ಗಾಯತ್ರಿ ಅವರಿಂದ ಶಾಸ್ತೀಯ ಸಂಗೀತ,ಶ್ರೀಮತಿ ಅನುರಾಧ ಪೌಡ್ವಾಲ ಮತ್ತು ಅನೂಪ್ ಜಲೋಟ ಅವರಿಂದ ಭಜನೆ. ಎಂ. ಎಸ್ ಸುಬ್ಬಲಕ್ಷ್ಮಿ ಅವರ ಮೊಮ್ಮಕ್ಕಳ ಸಂಗೀತ ಕಚೇರಿಯೂ ನಡೆಯಲಿದೆ. ಆಗಮ ಬ್ಯಾಂಡ್ ಸೇರಿದಂತೆ ವಿವಿಧ ಬ್ಯಾಂಡ್ ಗಳಿಂದ ಕೃಷ್ಣ ಗೀತೆಗಳ ಪ್ರಸ್ತುತಿ ಇದೆ.
ಬೆಂಗಳೂರು ಇಸ್ಕಾನ್ ಅಧ್ಯಕ್ಷರಾದ ಮಧು ಪಂಡಿತ ದಾಸ ಅವರು ಡಾ. ಕಸ್ತೂರಿ ರಂಗನ್ ,ಅನುಪಮ್ ಖೇರ್ ಮತ್ತು ಹೇಮಾ ಮಾಲಿನಿ ಅವರೊಂದಿಗೆ ಚರ್ಚೆ ನಡೆಸುವುದು ಈ ಬಾರಿಯ ವಿಶೇಷ ಕಾರ್ಯಕ್ರಮಗಳಲ್ಲಿ ಒಂದು. ಇಸ್ಕಾನ್ ಆಹಾರ ಏಕೆ ರುಚಿಕರ ಎಂಬುದರ ಬಗ್ಗೆ ಖ್ಯಾತ ಬಾಣಸಿಗ ಸಂಜೀವ್ ಕುಮಾರ್ ಅವರೊಂದಿಗೆ ಚರ್ಚೆ ಮತ್ತೊಂದು ವಿಶೇಷ.
ಮಕ್ಕಳಿಗಾಗಿಯೂ ಕಾರ್ಯಕ್ರಮಗಳು ಇವೆ. ಸಾರ್ವಜನಿಕರೊಂದಿಗೆ ಫೋನ್ ಇನ್ ಕಾರ್ಯಕ್ರಮ ಕೂಡ ಇದೆ. ಇದಲ್ಲದೆ ಅಷ್ಟಮಿ. ದಿನ108 ಖಾದ್ಯಗಳನ್ನು ಒಳಗೊಂಡ ವಿಶೇಷ ರಾಜಭೋಗವನ್ನು ಭಗವಂತನಿಗೆ ಅರ್ಪಿಸಲಾಗುದು. ಕೋವಿಡ್ ನಿವಾರಣೆಗೆಗಾಗಿ ವಿಶೇಷ ಪ್ರಾರ್ಥನೆಯನ್ನು ಸಲ್ಲಿಸಲಾಗವುದು .ಜೊತೆಗೆ ನಾನಾ ಆನಾಥಶ್ರಮಗಳಲ್ಲಿ ಇಸ್ಕಾನ್ ವತಿಯಿಂದ ಜನ್ಮಾಷ್ಟಮಿ ಆಚರಿಸಲಾಗುವುದು.
