ಬೆಂಗಳೂರಿನ ಗಲ್ಲಿಗಳಲ್ಲಿ ಹಾಸ್ಯದ ಓಟ

ವಿಮಾನ ನಿಲ್ದಾಣದಲ್ಲಿ ಇಳಿದ ಕೂಡಲೇ ಯಾರದೋ ಕೈಗೆ ಸಿಕ್ಕಿ ತನ್ನ ಸೂಟ್ ಕೇಸ್ ಕಳೆದುಕೊಳ್ಳುವ ಫ್ರೆಂಚ್ ಪ್ರಜೆ, ಆತನನ್ನು ತನ್ನ ಬಾಸ್ ಬಳಿಗೆ ಕರೆದೊಯ್ಯಲಾಗದ ಚಾಲಕ, ತನ್ನ ಆಟೊದಲ್ಲಿ ಹತ್ತಿಸಿಕೊಳ್ಳಬೇಕಾದ ಅನಿವಾರ್ಯತೆಗೆ ಸಿಲುಕಿ, ತನ್ನ ಬೆನ್ನಿಗೆ ಕಟ್ಟಿಕೊಳ್ಳುವ ನಾಯಕ, ಆತನ ತಂಗಿಯ ಅಂತರ್ಧರ್ಮೀಯ ವಿವಾಹ, ಅವರಿಗೆ ಮಕ್ಕಳಾಗದ ಸಮಸ್ಯೆ, ವಿದೇಶಿ ಪ್ರಜೆ ಮತ್ತು ಆತನ ಸೂಟ್ ಕೇಸ್ ಹುಡುಕಾಡುವ ರೌಡಿಗಳು, ಇವರನ್ನು ಹಿಡಿದುಕೊಂಡು ಹೋಗುವ, ಫ್ರಾನ್ಸ್ ಎಂದರೆ ಫ್ರಾನ್ಸ್ ಚಿಲ್ಲಿ, ಫ್ರಾನ್ಸ್ ಕರಿ, ಫ್ರಾನ್ಸ್ ಬಿರಿಯಾನಿ ಎಂದು ತಿಳಿಯುವ ಕನಿಷ್ಠ ಜ್ಞಾನವಿಲ್ಲದ ಪೊಲೀಸರು… ದಾನಿಶ್ ಸೇಠ್ ಪ್ರಮುಖ ಪಾತ್ರದ ಪನ್ನಗ ಭರಣ ನಿರ್ದೇಶನದ “ಫ್ರೆಂಚ್ ಬಿರಿಯಾನಿ” ಚಿತ್ರ ಬೆಂಗಳೂರಿನ ಗಲ್ಲಿ ಗಲ್ಲಿಗಳಲ್ಲಿ ಓಡುವಂತೆ ಚಕಚಕನೆ ಸುತ್ತಿ ಪ್ರೇಕ್ಷಕರನ್ನು ಅಷ್ಟೇ ವೇಗವಾಗಿ ನಗಿಸಿ ಕ್ಲೈಮ್ಯಾಕ್ಸ್ ಥಿಯೇಟರ್ ನಲ್ಲಿ ಅಂತ್ಯ ಕಾಣುತ್ತದೆ.

ಒಂದೇ ತಿಂಗಳಲ್ಲಿ ಪಿ.ಆರ್.ಕೆ. ಪ್ರೊಡಕ್ಷನ್ಸ್ ನಿರ್ಮಾಣ ಸಂಸ್ಥೆಯಿಂದ ನಿರ್ಮಿಸಿರುವ “ಲಾ” ಮತ್ತು “ಫ್ರೆಂಚ್ ಬಿರಿಯಾನಿ” ಚಿತ್ರಗಳು ಥಿಯೇಟರ್ ಪ್ರದರ್ಶನ ಇಲ್ಲದ ಕಾರಣಕ್ಕೆ ಬಹಳ ಚರ್ಚೆಗೆ ಒಳಗಾಗಿದ್ದವು. ಮೊದಲು ಬಿಡುಗಡೆಯಾದ `ಲಾ’ ಚಿತ್ರದಂತೆ “ಫ್ರೆಂಚ್ ಬಿರಿಯಾನಿ” ಪ್ರೇಕ್ಷಕರನ್ನು ನಿರಾಸೆಗೊಳಿಸುವುದಿಲ್ಲ.

ವಿದೇಶದಿಂದ `ಸಾಮಾನು’ ತರಬೇಕಾದ ವ್ಯಕ್ತಿ ತನ್ನ ಹೆಸರು ಸೈಮನ್ ಎಂದ ಕೂಡಲೇ ತಪ್ಪಾಗಿ ಗ್ರಹಿಸಿ ಹಿಡಿದು ಕರೆ ತರುವುದರಿಂದ ಪ್ರಾರಂಭವಾಗುವ ಸಿನಿಮಾ ಬೆಂಗಳೂರಿನ ಗಲ್ಲಿ ಗಲ್ಲಿಯಲ್ಲೂ ಅಡೆತಡೆಯಿಲ್ಲದೆ ಓಡುತ್ತಿರುತ್ತದೆ. ಇತ್ತೀಚೆಗೆ ಒಟಿಟಿಯಲ್ಲಿ ಹಲವು ಭಾಷೆಗಳ ಚಲನಚಿತ್ರಗಳು ಬಿಡುಗಡೆಯಾಗುತ್ತಿವೆ. ಇವುಗಳಲ್ಲಿ ಬಹಳಷ್ಟು ಸಿನಿಮಾಗಳು ಮೊದಲ ಹದಿನೈದು ನಿಮಿಷಗಳಲ್ಲಿ ಆಸಕ್ತಿ ಕಳೆದುಕೊಳ್ಳುವಂತಿವೆ. ಆದರೆ ಫ್ರೆಂಚ್ ಬಿರಿಯಾಗಿ ಒಂದರೆಕ್ಷಣವೂ ನಿಲ್ಲದೆ, ಬೋರು ಹೊಡೆಸದೆ ಅಲ್ಲಿನ ಪಾತ್ರಗಳು ಚಲಿಸಿದಷ್ಟೇ ವೇಗವಾಗಿ ಚಲಿಸುತ್ತಾ ಇರುತ್ತದೆ. ಈ ವೇಗ ಚಿತ್ರವನ್ನು ತಡೆಯಿರದಂತೆ ಮುನ್ನಡೆಸಿದರೂ ಗಟ್ಟಿ ಕಥೆಯ ಕೊರತೆ ಎದ್ದು ಕಾಣುತ್ತದೆ. ಕೆಲವು ಪಾತ್ರಗಳು ಯಾವುದೇ ಕಾರಣವಿಲ್ಲದೆ ಇರುತ್ತವೆ.

ಹಾಸ್ಯರಸವು ನಟ, ನಿರ್ದೇಶಕರಿಬ್ಬರಿಗೂ ಸವಾಲು. ಕೊಂಚ ಹದ ತಪ್ಪಿದರೆ ಅಪಹಾಸ್ಯವಾಗುತ್ತದೆ. ದಾನಿಶ್ ಸೇಠ್ ಲೀಲಾಜಾಲವಾಗಿ ತಮ್ಮ ಪಾತ್ರ ನಿಭಾಯಿಸಿದ್ದಾರೆ. ರಂಗಾಯಣ ರಘು ಯಾವತ್ತಿನಂತೆ ತಮ್ಮ ನಟನೆಯಲ್ಲಿ ಹಿಡಿದಿಡುತ್ತಾರೆ. ಚಿಕ್ಕಣ್ಣ ಬರುವುದು ಕೆಲ ನಿಮಿಷಗಳಾದರೂ ತಮ್ಮ ಛಾಪು ಒತ್ತಿ ಹೋಗುತ್ತಾರೆ. ಬಹುತೇಕ ಕಡಿಮೆ ಪರಿಚಯದ, ಹೊಸ ಮುಖಗಳೇ ಇರುವ ಈ ಚಿತ್ರ ಅಂತಹ ಕೊರತೆಗಳೇನನ್ನೂ ಎತ್ತಿ ತೋರದೆ ಮುನ್ನಡೆಯುತ್ತದೆ.

ಚಿತ್ರಮಂದಿರದ ಪ್ರದರ್ಶನ ಇಲ್ಲದ ಕಾರಣಕ್ಕೆ ಚಿತ್ರಮಂದಿರದಲ್ಲಿ ಕುಳಿತು ಆನಂದಿಸಬಹುದಾದ ಕಾಮಿಡಿ ಚಿತ್ರ ಕೈ ತಪ್ಪಿತು ಎನ್ನಿಸುವುದು ಸುಳ್ಳಲ್ಲ.ದಾನಿಶ್ ಸೇಠ್, ಫ್ರಾನ್ಸ್ ದೇಶದಿಂದ ಬಂದು ಇಲ್ಲಿ ಎಲ್ಲವನ್ನೂ ಕಳೆದುಕೊಳ್ಳುವ ವಿದೇಶಿಗನಾಗಿ ಸಾಲ್ ಯೂಸುಫ್ ಮನೋಜ್ಞ ಅಭಿನಯ. ಭಾಷೆ ಗೊತ್ತಿಲ್ಲದೆ ತನಗೆ ಸಂಬಂಧಿಸದ ಸಿಕ್ಕುಗಳಲ್ಲಿ ಸಿಲುಕಿಕೊಳ್ಳುವ ಸೈಮನ್ ಪಾತ್ರಧಾರಿಯಾಗಿ ಅವರದು ಅತ್ಯಂತ ಸಮರ್ಥ ಅಭಿನಯ. ರಂಗಾಯಣ ರಘು, ಸಂಪತ್ ಕುಮಾರ್ ಅವರದು ಪಾತ್ರಗಳಲ್ಲಿ ಲೀಲಾಜಾಲ ಅಭಿನಯ.

ಡಾನ್ ಮಗ ಮಣಿಯಾಗಿ ಮಹಾಂತೇಶ್ ಹಿರೇಮಠ್ ತನ್ನ “ಲ”ಕಾರ ಉಚ್ಚಾರಣೆಯಿಂದ ಗಮನ ಸೆಳೆಯುತ್ತಾರೆ. ಅವರ ಪಾತ್ರ, ಅಭಿನಯ, ವೇಷಭೂಷಣ ಎಲ್ಲವೂ ಪೂರಕವಾಗಿದ್ದು ಹಾಸ್ಯ ಕಲಾವಿದರ ಕೊರತೆ ತುಂಬುತ್ತಾರೆ.

ಯಾರೂ ಊಹಿಸಲಾಗದ ದುರಂತವೆಂದರೆ ಇತ್ತೀಚೆಗೆ ಮೃತರಾದ ನಟ ಮೈಕೆಲ್ ಮಧು ಈ ಚಿತ್ರದಲ್ಲಿ ಮೃತರಾಗಿ ಅವರ ಶವದ ಮೆರವಣಿಗೆ ದೃಶ್ಯವಿದೆ. ಅವರ ಮರಣದ ನಂತರದ ಬಂದ ಸಿನಿಮಾದಲ್ಲಿ ಅವರ ಸಾವಿನ ಮೆರವಣಿಗೆ ಕಾಕತಾಳೀಯ.

ಕೋವಿಡ್ ಸಾಂಕ್ರಾಮಿಕದಿಂದಾಗಿ ಜನರು ಥಿಯೇಟರ್ ನಲ್ಲಿ ಚಿತ್ರ ಆನಂದಿಸುವ ಅವಕಾಶ ಕಳೆದುಕೊಂಡಿದ್ದಾರೆ. ಚಲನಚಿತ್ರವನ್ನು ಥಿಯೇಟರ್ ನಲ್ಲಿ ವೀಕ್ಷಿಸಲು ಅದರ ಕ್ಯಾನ್ವಾಸ್ ಬೃಹತ್ತಾಗಿರಲೇಬೇಕು ಎಂದೇನೂ ಇಲ್ಲ. ಫ್ರೆಂಚ್ ಬಿರಿಯಾನಿ ಥಿಯೇಟರ್ ಪ್ರೇಕ್ಷಕರಿಗೆ ಹೇಳಿ ಮಾಡಿಸಿದ ಚಿತ್ರ. ಫ್ರೆಂಚ್ ಬಿರಿಯಾನಿ ಥಿಯೇಟರ್ ವೀಕ್ಷಕರಿಗೆ ಆದ ನಷ್ಟ ಎಂದೇ ಹೇಳಬಹುದು. ಪ್ರೇಕ್ಷಕರು ಥಿಯೇಟರ್ ನಲ್ಲಿ ಆತ್ಮೀಯರೊಂದಿಗೆ ಕುಳಿತು ನಕ್ಕು ನಲಿಯಬಹುದಾದ ಚಿತ್ರವೊಂದು ಒಟಿಟಿಯಲ್ಲಿ ಬಿಡುಗಡೆಯಾಗಿದೆ. ಹಾಗೆಂದು ಇದು ಕುಟುಂಬ ಸಮೇತ ನಲಿಯುವ ಚಿತ್ರವೆಂದೇನೂ ಅಲ್ಲ. ಅಲ್ಲಲ್ಲಿ ಭಾಷೆ ಕೊಂಚ ಮಿತಿ ಮೀರುತ್ತದೆ. ಹಾಗಿದ್ದರೂ ಚಿತ್ರದ ಒಟ್ಟಂದಕ್ಕೆ ಇದು ಅಡ್ಡಿಯಾಗಿಲ್ಲ.

ಹಾಡಿನಲ್ಲಿ ಕಾಣಿಸಿಕೊಳ್ಳುವ ಅಗತ್ಯ ನಿರ್ದೇಶಕ ಪನ್ನಗ ಭರಣರಿಗೆ ಇತ್ತೇ? ಈ ಎಲ್ಲ ಕೊರತೆಗಳ ನಡುವೆಯೂ ಪನ್ನಗ ಭರಣರಿಂದ ಮತ್ತಷ್ಟು ಒಳ್ಳೆಯ ಚಿತ್ರಗಳನ್ನು ನಿರೀಕ್ಷೆ ಮಾಡಬಹುದು.

ಈ ಕೆಳಗಿನ ಲಿಂಕ್ ಒತ್ತುವ ಮೂಲಕ ನೀವು ಪ್ರೈಮ್ ವಿಡಿಯೋ ಸದಸ್ಯರಾಗಬಹುದು.