ಪವರ್ ಸ್ಟಾರ್‌ ಸಿನಿಮಾವಲ್ಲ ಕಿರು ಚಿತ್ರ

ನಿರ್ದೇಶಕ ರಾಮ್‌ ಗೋಪಾಲ್‌ ವರ್ಮಾ ಇತ್ತೀಚೆಗೆ ಡಿಜಿಟಲ್‌ ಪ್ಲಾಟ್‌ಫಾರ್ಮ್‌ನಲ್ಲಿ ಸಿಕ್ಕಾಪಟ್ಟೆ ಪ್ರಯೋಗ ಮಾಡುತ್ತಿದ್ದಾರೆ.

‘ನೆಕೆಡ್‌’, ‘ಕ್ಲೈಮ್ಯಾಕ್ಸ್’ ಹೆಸರಿನಲ್ಲಿ ಸಣ್ಣ ಸಣ್ಣ ಸಿನಿಮಾಗಳನ್ನು ಮಾಡಿ ತಮ್ಮದೆ ಆದ ಡಿಜಿಟಲ್‌ ಪ್ಲಾಟ್‌ಫಾರ್ಮ್‌ ಸೃಷ್ಟಿ ಮಾಡಿ ಅದರಲ್ಲಿ ಅವುಗಳನ್ನು ರಿಲೀಸ್‌ ಮಾಡಿದ್ದರು. ಆ ಎರಡು ಸಿನಿಮಾಗಳಲ್ಲಿ ಕಥೆ ಇಲ್ಲದೇ ಹೋದರು ಜನ ಮಾತ್ರ ಮುಗಿ ಬಿದ್ದು ನೋಡಿ ಆರ್‌ಜಿವಿ ಜೇಬನ್ನು ತುಂಬಿಸಿದರು. ಇಂತಹ ಆರ್‌ಜಿವಿ ಕೆಲ ದಿನಗಳ ಹಿಂದೆ ‘ಪವರ್‌ ಸ್ಟಾರ್‌’ ಎಂಬ ಸಿನಿಮಾ ಮಾಡುವುದಾಗಿ ಅನೌನ್ಸ್‌ ಮಾಡಿದರು. ಈ ಪವರ್‌ ಸ್ಟಾರ್‌ ಸಿನಿಮಾದಲ್ಲಿ ತೆಲುಗಿನ ಸ್ಟಾರ್‌ ನಟ ಪವನ್‌ ಕಲ್ಯಾಣ್‌ರನ್ನೇ ಹೋಲುವಂತ ನಟನನ್ನು ಕರೆತಂದು ಫೋಟೋ ಗಳನ್ನು ಟ್ವೀಟ್ಟರ್‌ ಮೂಲಕ ರಿಲೀಸ್‌ ಮಾಡಿದರು. ಆಗ ಇಡೀ ಟಾಲಿವುಡ್‌ ಆರ್‌ಜಿವಿಗೆ ತಲೆ ಕೆಟ್ಟಿದೆ, ಹಾಗಾಗಿ ಪವನ್‌ ಕಲ್ಯಾಣ್‌ರನ್ನು ವಿಡಂಭನೆ ಮಾಡುವಂತಹ ಸಿನಿಮಾ ಮಾಡುತ್ತಿದ್ದಾರೆ. ಇದರಿಂದ ಅವರು ತೊಂದರೆಗೆ ಸಿಲುಕಿಕೊಳ್ಳಲಿದ್ದಾರೆ ಎಂದು ಮಾತನಾಡಿಕೊಂಡರು. ಅಂದುಕೊಂಡಂತೆ ತಮ್ಮ ಡಿಜಿಟಿಲ್‌ ಪ್ಲಾಟ್‌ಫಾರ್ಮ್‌ನಲ್ಲಿ ಸಿನಿಮಾವನ್ನು ರಿಲೀಸ್‌ ಮಾಡಿದರು. ಈ ಚಿತ್ರದ ಟ್ರೇಲರ್‌ ನೋಡಲು ದುಡ್ಡು ಕೊಡಬೇಕು ಎಂದು ಹೇಳಿದ್ದ ಆರ್‌ಜಿವಿ ಅದನ್ನು ಯೂ ಟ್ಯೂಬ್‌ನಲ್ಲಿ ರಿಲೀಸ್‌ ಮಾಡಿದ್ದರು.

ಸಿನಿಮಾ ನೋಡಿದ ಸಾಕಷ್ಟು ಮಂದಿ ಚಿತ್ರದ ಬಗ್ಗೆ ಬೇರೆ ಬೇರೆ ರೀತಿ ಮಾತನಾಡಿದರು, ಈ ಚಿತ್ರದಲ್ಲಿ ಪವನ್‌ ಕಲ್ಯಾಣ್‌ರನ್ನು ಅವಹೇಳನ ಮಾಡುವಂತಹ ದೃಶ್ಯಗಳಿಗಿಂತಲೂ ಅವರ ಸುತ್ತ ಇರುವವರು ಅವರನ್ನು ದಾರಿ ತಪ್ಪಿಸಿದ ಬಗೆ ಹೇಗೆ ಎಂಬುದನ್ನು ಆರ್‌ಜಿವಿ ವಿವರಿಸಿದ್ದಾರೆ. ಇದರಲ್ಲಿ ಎಷ್ಟು ಸತ್ಯ ಎಷ್ಟು ಸುಳ್ಳು ಎಂಬುದು ಗೊತ್ತಿಲ್ಲ.

ವಿಶೇಷ ಎಂದರೆ 37 ನಿಮಿಷ ಇರುವ ಇದನ್ನು ಸಿನಿಮಾ ಎನ್ನುವುದಕ್ಕಿಂತ ಕಿರು ಚಿತ್ರ ಎನ್ನಬಹುದು. ಇಡೀ ಸಿನಿಮಾ ಕಾಮಿಡಿ   ಅನಿಸಿದರು, ಕ್ಲೈಮ್ಯಾಕ್ಸ್‌ನಲ್ಲಿ ಈ ಚಿತ್ರ ಮಾಡಿದ ಉದ್ದೇಶವೇನು ಎಂಬುದನ್ನು ಆರ್‌ಜಿವಿ ತಾವೇ ನಟಿಸುವ ಮೂಲಕ ಹೇಳಿದ್ದಾರೆ. ಪವನ್‌ ಕಲ್ಯಾಣ್‌ ಅವರ ಯೋಚನಾ ಲಹರಿ, ಅವರ ಸಿನಿಮಾಗಳ ಆಯ್ಕೆ, ಅವರ ಸಿದ್ಧಾಂತಗಳಿಗೆ ಆರ್‌ಜಿವಿ ತಾವು ದೊಡ್ಡ ಫ್ಯಾನ್‌ ಎಂದು ಹೇಳುತ್ತಾರೆ. ಈ ಮೂಲಕ ಪವನ್‌ ಕಲ್ಯಾಣ್‌ ಬದಲಾಗಬೇಕು, ತನ್ನ ಸುತ್ತ ಇರುವವರನ್ನು ಬದಲಾಯಿಸಬೇಕು, ತಮ್ಮ ಐಡಿಯಾಲಜಿಗಳ ಮೂಲಕ ತೆಲುಗು ಜನರಿಗೆ ಒಳ್ಳೆಯದನ್ನು ಮಾಡಬೇಕು ಎಂದು ಈ ಕಿರುಚಿತ್ರದ ಮೂಲಕ ಆರ್‌ಜಿವಿ ಹೇಳುವ ಪ್ರಯತ್ನ ಮಾಡಿದ್ದಾರೆ.

ಜನರ ಚಪ್ಪಾಳೆ, ಪಂಚ್‌ ಮತ್ತು ಮಾಸ್‌ ಡೈಲಾಗ್‌ಗಳಿಗೆ ಬೀಳುವ ಶಿಳ್ಳೆಗಳಾವುವು ಮತಗಳಾಗಿ ಪರಿವರ್ತನೆ ಆಗುವುದಿಲ್ಲ. ಬದಲಿಗೆ ಜನ ಸೇವೆಯೇ ನಾಯಕರನ್ನಾಗಿಸುತ್ತದೆ ಎಂದು ಆರ್‌ಜಿವಿ ತಮ್ಮದೇ ಆದ ಶೈಲಿಯಲ್ಲಿ ಹೇಳಿದ್ದಾರೆ. ಆದರೆ ಪವನ್‌ ಕಲ್ಯಾಣ್‌ ಫ್ಯಾನ್ಸ್‌ಗೆ ಈ ಚಿತ್ರ ಬೇಸರ ತರಿಸಿದರೂ ಕ್ಲೈಮ್ಯಾಕ್ಸ್‌ ನೋಡಿ ಅವರು ಖುಷಿಯಾಗಬಹುದೇನೊ. ಇಲ್ಲಿ ಇನ್ನೊಂದು ಗಮನಿಸಬೇಕಾದ ಅಂಶವಂತೆ ಆರ್‌ಜಿವಿ ಕಳೆದ ನಾಲ್ಕೈದು ತಿಂಗಳಿನಿಂದ ಏನಿಲ್ಲವೆಂದರೂ 3 ಕೋಟಿಗೂ ಅಧಿಕ ಹಣವನ್ನು ಈ ರೀತಿಯ ಸಿನಿಮಾಗಳಿಂದ ಮಾಡುತ್ತಿದ್ದಾರೆ. ಅಲ್ಲಿಗೆ ಅವರು ಮತ್ತೊಮ್ಮೆ ನಾನು ಟ್ರೆಂಡ್‌ ಸೆಟರ್‌ ಎಂಬುದನ್ನು ಸಾಬೀತು ಪಡಿಸಿದ್ದಾರೆ.