ಹೂಡಿಕೆ ಮಾಡುವಾಗ ಮೋಹಕ ಪದಗಳಿಂದ ದೂರವಿರಿ

ನಮ್ಮ ಶ್ರಮದ- ದುಡಿಮೆಯ ಹಣದಲ್ಲಿ ಅಲ್ಪಸ್ವಲ್ಪವಾದರೂ ಉಳಿಸಿ, ಅದನ್ನು ಭವಿಷ್ಯಕ್ಕಾಗಿ ಕೂಡಿಡಬೇಕು ಅನ್ನೋದು ನಿರ್ವಿವಾದಿತ ಅಂಶ. ಆ ಹಣವೂ ಒಂದಿಷ್ಟು ಹಣ ದುಡಿಯಲಿ ಎಂಬ ಭಾವನೆ ಎಲ್ಲರಲ್ಲೂ ಇರುತ್ತದೆ. ಹಾಗೆ ಆಲೋಚಿಸುವಾಗ ಗೋಚರಿಸುವ ಮೊದಲ ದಾರಿ ಷೇರುಪೇಟೆ.
ಆದರೆ, ಇತ್ತೀಚಿನ ದಿನಗಳಲ್ಲಿ ಷೇರುಪೇಟೆಯು ಅಸ್ಥಿರತೆಯಿಂದ ಕೂಡಿದೆ. ಷೇರಿನ ಬೆಲೆಗಳು ವಿನಾಕಾರಣ ಇಳಿಯುತ್ತವೆ. ಅದೇ ರೀತಿ ಏರಿಕೆ ಆಗುತ್ತವೆ. ಈ ಏರಿಳಿತಕ್ಕೆ ರುಪಾಯಿಯ ಬೆಲೆ ಕುಸಿತ, ಕಚ್ಚಾ ತೈಲ ಬೆಲೆ ಏರಿಕೆ, ಅಂತರ ರಾಷ್ಟ್ರೀಯ ಪೇಟೆಗಳಲ್ಲಾಗುವ ಇಳಿಕೆ ಮುಂತಾದವುಗಳ ಕಾರಣವನ್ನು ನೀಡಲಾಗುವುದು. ಆದರೆ ಈಗ ಕೋವಿಡ್‌ ಪ್ರಭಾವದ ಕಾರಣ ಪೇಟೆಯೊಳಗೆ ಹರಿದುಬರುತ್ತಿರುವ ಹಣದ ಹೊಳೆ ಈ ಎಲ್ಲಾ ಕಾರಣಗಳನ್ನು ಬದಿಗೊತ್ತಿ ವಿಭಿನ್ನತೆ ಪ್ರದರ್ಶಿತವಾಗುತ್ತಿದೆ.

ಷೇರಿನ ಬೆಲೆಗಳ ಏರಿಳಿತಕ್ಕೆ ಕಂಪನಿಗಳು ಅಂತರ್ಗತವಾಗಿ ಸಾಧಿಸಿದ ಅಂಶಗಳನ್ನು ಪರಿಗಣಿಸದೆ, ಕೇವಲ ಬಾಹ್ಯ ಬೆಳವಣಿಗೆಗಳಿಗೆ, ವಿತ್ತೀಯ ಸಂಸ್ಥೆಗಳು ನೀಡುವ ರೇಟಿಂಗ್ ಗಳನ್ನು ಆಧರಿಸಿ ಅಲಂಕಾರಿಕ ಶೈಲಿಯಲ್ಲಿ ವರ್ಣಿಸಲಾಗುವುದು. ಇಂತಹ ವಾತಾವರಣವು ಪಾರಂಪರಿಕವಾಗಿ ಬೆಳೆದು ಬಂದಿರುವ ದೀರ್ಘಕಾಲೀನ ಹೂಡಿಕೆಗೆ ಅಪವಾದವಾಗಿದೆ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ನಮ್ಮ ದೇಶದ ಪ್ರತಿಷ್ಠೆ ಹೆಚ್ಚುತ್ತಿದೆ. ಭಾರತದ ಷೇರುಪೇಟೆಯು 2018 ರ ಸಮೀಕ್ಷೆ ಪ್ರಕಾರ, ವಿಶ್ವದ ಏಳನೇ ಸ್ಥಾನದಲ್ಲಿದೆ. ಈ ಕೋವಿಡ್‌ಸಮಯದಲ್ಲಿ ಸಕಾರಾತ್ಮಕ ಭಾವನೆಗಳನ್ನು ಜನಮನದಲ್ಲಿ ಪ್ರತಿಷ್ಠಾಪಿಸುತ್ತಿರುವುದು ಒಂದು ಕಡೆಯಾದರೆ, ಆಂತರಿಕವಾಗಿ ಆರ್ಥಿಕ ಚಟುವಟಿಕೆಗಳು ಚೇತರಿಕೆಗೆ ಪ್ರಯತ್ನಿಸಲಾಗುತ್ತಿದ್ದು, ತಳಮಟ್ಟದ, ಮಧ್ಯಮ ವರ್ಗದವರ ನಿತ್ಯದ ಬವಣೆಗಳು ಹೆಚ್ಚಾಗಿ ಅಸಮಾಧಾನವು ತುಂಬಿ ತುಳುಕಾಡುತ್ತಿದೆ.

ಜನಸಾಮಾನ್ಯರ ಖರೀದಿಸುವ ಸಾಮರ್ಥ್ಯವು ಕ್ಷೀಣಿಸುತ್ತಿದೆ. ನಮ್ಮ ದೇಶದ ಆರ್ಥಿಕ ಬೆನ್ನೆಲುಬಾಗಿರುವ ಗ್ರಾಹಕ ವೃಂದದ ಖರೀದಿ ಸಾಮರ್ಥ್ಯವು ಹೆಚ್ಚುವವರೆಗೂ ಯಾವ ಯೋಜನೆಯು ಯಶಸ್ಸು ಕಾಣಲಾಗದು. ಈ ದಿಶೆಯಲ್ಲಿ ಭಾವನೆಗಳನ್ನು ಮತ್ತು ವಾಸ್ತವವನ್ನು ಬೇರ್ಪಡಿಸಿ, ಪರಿಶೀಲಿಸಿ, ನಿರ್ಧರಿಸುವ ಚಿಂತನೆಯನ್ನು ಅಳವಡಿಸಿಕೊಂಡು ಆರ್ಥಿಕ ಸಾಕ್ಷರತೆಯನ್ನು ಬೆಳೆಸಿಕೊಳ್ಳಬೇಕಾಗಿದೆ. ಕೇವಲ ಸಾಕ್ಷರತೆಯೊಂದೇ ಸಾಲದು, ಜೊತೆಗೆ ಆರ್ಥಿಕ ಸಾಕ್ಷರತೆ ಬೆಳೆಸಿಕೊಂಡಲ್ಲಿ ಜೀವನವು ಸುಖಕರವಾಗಿಸಲು ಸಾಧ್ಯ.

ಷೇರುಪೇಟೆಯಲ್ಲಿ ಪ್ರದರ್ಶಿತವಾಗುತ್ತಿರುವ ಅಸಹಜ ನಡೆ ಬಹಳಷ್ಟು ಹೂಡಿಕೆದಾರರನ್ನು ದೂರ ತಳ್ಳಿರಬಹುದು. ಹೆಚ್ಚಿನವರು ಸುರಕ್ಷತಾ ಕಾರಣಕ್ಕಾಗಿ ಬ್ಯಾಂಕ್ ಡಿಪಾಸಿಟ್ ಗಳನ್ನು ಆಶ್ರಯಿಸಿರಬಹುದು. ಬ್ಯಾಂಕ್ ಗಳು ಸಹ ಸಂಪನ್ಮೂಲ ಕೊರತೆಯಿಂದ ಬಳಲುತ್ತಿವೆ. ಕಾರ್ಪೊರೇಟ್ ವಲಯವು ಸಹ ಸಂಪನ್ಮೂಲ ಕೊರತೆಯಿಂದ ಹೆಚ್ಚಿನ ಕಂಪನಿಗಳು ವಿವಿಧ ರೀತಿಯ ಯೋಜನೆಗಳಿಂದ, ವಿವಿಧ ಮೂಲಗಳಿಂದ ಹಣ ಸಂಗ್ರಹಣಾ ಕಾರ್ಯವನ್ನು ಚುರುಕುಗೊಳಿಸಿವೆ. ಈ ಮಧ್ಯೆ ಬ್ಯಾಂಕ್‌ಬಡ್ಡಿದರಗಳು ಕುಸಿಯುತ್ತಿರುವುದು, ಬ್ಯಾಂಕ್‌ಗಳಿಂದ ಸಾಲ ಪಡೆಯುವವರ ಸಂಖ್ಯೆ ಕ್ಷೀಣಿತವಾಗುತ್ತಿದ್ದು ಬೇಡಿಕೆ ಕಡಿಮೆಯಾಗುತ್ತಿದೆ. ಉದ್ಯಮಗಳು ಹೆಚ್ಚಿನ ಸಮಯ ಸ್ಥಬ್ಧವಾಗಿದ್ದ ಕಾರಣ ಸಾಲ ಮರುಪಾವತಿಗೂ ತೊಂದರೆಯಾಗಿದೆ. ಹೆಚ್ಚಿನ ತಾಂತ್ರಿಕತೆ ಆಧಾರಿತ ಉದ್ಯಮಗಳು ʼವರ್ಕ್‌ಫ್ರಂ ಹೋಂʼ ಅಳವಡಿಸಿಕೊಂಡಿರುವುದರ ಜೊತೆಗೆ ಷೇರುಪೇಟೆಯೂ ಚಟುವಟಿಕೆಯಲ್ಲಿರುವುದು ಬಹಳಷ್ಟು ಹೊಸ ಹೂಡಿಕೆದಾರರನ್ನು ಆಕರ್ಷಿಸುತ್ತಿದೆ. ಇದರ ಹಿಂದೆ ಷೇರುಪೇಟೆಯಲ್ಲಿ ಷೇರಿನ ಬೆಲೆಗಳು ಸತತವಾದ ಏರಿಕೆ ಪಡೆಯುತ್ತಿರುವುದು, ದಿನೇ ದಿನೇ ಷೇರಿನ ಬೆಲೆಗಳು ವಾರ್ಷಿಕ ಗರಿಷ್ಟದ ಸುದ್ಧಿಯೂ ಸಹ ಹೊಸ ಹೂಡಿಕೆದಾರರನ್ನು ಪ್ರವೇಶಿಸಲು ಪ್ರೇರೇಪಿಸುತ್ತದೆ.

ಸಾಮಾನ್ಯವಾಗಿ ಸುರಕ್ಷಿತ ಹೂಡಿಕೆ ಎಂದರೆ ಬ್ಯಾಂಕ್ ಡಿಪಾಸಿಟ್ ಗಳು ಎಂಬ ಕಲ್ಪನೆ ಎಲ್ಲರಲ್ಲೂ ಬೇರೂರಿದೆ. ಆದರೆ ಬ್ಯಾಂಕ್ ಗಳಲ್ಲಿ ಕೇವಲ ರೂ.ಐದು ಲಕ್ಷದವರೆಗೂ ಮಾತ್ರ ವಿಮೆಯ ಸುರಕ್ಷತೆ ಇರುತ್ತದೆ. ಹೆಚ್ಚಿನದಕ್ಕೆ ಯಾವುದೇ ರೀತಿಯ ಗ್ಯಾರಂಟಿ ಇರುವುದಿಲ್ಲ. ಆದರೂ ನಾವು ಸರತಿಯಲ್ಲಿ ಬ್ಯಾಂಕ್ ಗಳಲ್ಲಿ ಠೇವಣಿ ಇಡುತ್ತೇವೆ. ಇದಕ್ಕೆ ನಮ್ಮ ಬ್ಯಾಂಕಿಂಗ್ ವ್ಯವಸ್ಥೆಯ ಮೇಲಿರುವ ನಂಬಿಕೆ ಕಾರಣವಾಗಿದೆ. ಕೇಂದ್ರ ಸರ್ಕಾರವು ಸಹ ತನ್ನ ವಿವಿಧ ಯೋಜನೆಗಳಿಗೆ ಸಂಪನ್ಮೂಲ ಸಂಗ್ರಹಣೆಯ ಯೋಜನೆಗಳನ್ನು ರೂಪಿಸಿಕೊಳ್ಳುತ್ತಿದೆ. ಅಲ್ಲದೆ ಬಂಡವಾಳ ಹಿಂತೆಗೆತದ ನೆಪದಲ್ಲಿ ಸಾರ್ವಜನಿಕ ವಲಯದ ಕಂಪೆನಿಗಳಲ್ಲಿರುವ ಮೀಸಲು ನಿಧಿಯ ಮೇಲೆ ಗಮನಹರಿಸಿ, ಆ ನಿಧಿಯನ್ನು ಕಂಪನಿಗಳ ವಿಲೀನ, ಸ್ವಾಧೀನ, ಭಾಗಿತ್ವ ಖರೀದಿ ಮುಂತಾದವುಗಳಿಗೆ ವಿನಿಯೋಗಿಸುವ ಮೂಲಕ ತನ್ನ ಗುರಿಯನ್ನು ತಲುಪಲು ಪ್ರಯತ್ನಿಸುತ್ತಿದೆ. ಹೀಗಿರುವಾಗ ನಾವು, ಸಣ್ಣ ಹೂಡಿಕೆದಾರರು ನಮ್ಮಲ್ಲಿರುವ ಸಮನ್ಮೂಲವನ್ನು ಕರಗಿಸಿಕೊಳ್ಳದೆ, ಸಾಧ್ಯವಾದಷ್ಟು ಸುರಕ್ಷತೆಯಿಂದ ಉಳಿಸಿ ಬೆಳೆಸುವ ಮೂಲಕ ಆರ್ಥಿಕ ಸಾಕ್ಷರತೆಯನ್ನು ಗಳಿಸಬೇಕಾಗಿದೆ. ಬ್ಯಾಂಕ್ ಗಳು ತಮ್ಮ ಠೇವಣಿದಾರರಿಗೆ ಸುಮಾರು ಶೇ 5ರಿಂದ ಶೇ 7 ರವರೆಗೂ ವಾರ್ಷಿಕ ಬಡ್ಡಿ ನೀಡುತ್ತವೆ. ಇದೇ ಬ್ಯಾಂಕ್ ಗಳಲ್ಲಿ ಹಲವಾರು ಬ್ಯಾಂಕ್ ಗಳು ತಮ್ಮ ಬೆಸಲ್ 3 ರ ನಿಯಮಾನುಸಾರ ಅಗತ್ಯಕ್ಕೆ ತಕ್ಕಂತೆ ಹೆಚ್ಚಿನ ಬಡ್ಡಿ ನೀಡುವ ಸಾಲಪತ್ರಗಳನ್ನು ವಿತರಿಸಿವೆ, ವಿತರಿಸುತ್ತಿವೆ.

ʼಸೆಕ್ಯೂರ್ಡ್‌ʼ ಮತ್ತು ʼ ಹೈಲಿ ರೇಟೆಡ್‌ʼ ಮೋಹಕ ಪದಗಳಿಂದ ದೂರವಿರಿ:

ಹೆಚ್ಚಿನ ಕಾರ್ಪೊರೇಟ್‌ಗಳು ಸಂಪನ್ಮೂಲ ಸಂಗ್ರಹಣೆಯಲ್ಲಿ ತೊಡಗಿಸಿಕೊಂಡಿವೆ. ಇವುಗಳಲ್ಲಿ ಕಾರ್ಪೊರೇಟ್‌ಡಿಪಾಜಿಟ್‌, ಎನ್‌ಸಿ ಡಿ ಗಳನ್ನು ಸಹ ತೇಲಿಬಿಡುತ್ತವೆ. ಅವುಗಳಲ್ಲಿ ಪ್ರಯೋಗಿಸುವ ʼಸೆಕ್ಯೂರ್ಡ್‌ʼ ಎಂಬ ಪದಕ್ಕೆ ಹೆಚ್ಚು ಒತ್ತು ನೀಡುವ ಅಗತ್ಯವಿಲ್ಲ. ನಮ್ಮಲ್ಲಿ ʼಸೆಕ್ಯೂರ್ಡ್‌ʼ ಎಂಬ ಪದಕ್ಕೆ ಹೆಚ್ಚು ಮಹತ್ವ ನೀಡುವ ಗುಣ ಬೆಳೆದಿದೆ. ಕಾರ್ಪರೇಟ್‌ವಲಯದ ಯೋಜನೆಗಳು ʼಸೆಕ್ಯೂರ್ಡ್‌ʼ ಆಗಿರಬೇಕಾದಲ್ಲಿ ಕಂಪನಿಗಳು ಅಂತರ್ಗತವಾಗಿ ಕಂಪನಿಗಳು ಸುಭದ್ರವಾಗಿರಬೇಕು. ಮತ್ತು ಈ ಕಂಪನಿಗಳು ಇಂದು ಸುಭದ್ರವಾಗಿದ್ದರೂ ಮುಂದೆ ಅವು ಕಾರಣಾಂತರದಿಂದ ದುರ್ಬಲವಾಗಿ ಹೂಡಿಕೆಗೆ ಕುತ್ತಾಗಬಹುದು. ಈ ರೀತಿಯ ಬದಲಾವಣೆಗಳ ವೇಗ ಹೇಗಿರಬಹುದೆಂಬುದಕ್ಕೆ 2018 ರ ಸೆಪ್ಟೆಂಬರ್‌ತಿಂಗಳಲ್ಲಿ AAA ರೇಟಿಂಗ್‌ಪಡೆದಿದ್ದ ಐ ಎಲ್‌ಎಫ್‌ಎಸ್‌ಸಂಸ್ಥೆಯು ನಂತರ ತನ್ನ ಠೇವಣಿದಾರರಿಗೆ ಬಡ್ಡಿ ನೀಡಲು ಎಡವಿದಾಗ ಆ ಕಂಪನಿಯನ್ನು ʼಜಂಕ್‌ʼ ರೇಟಿಂಗ್‌ನೀಡಿವೆ ರೇಟಿಂಗ್‌ಕಂಪನಿಗಳು. ಹೀಗೆ ಬದಲಾದ ರೇಟಿಂಗ್‌ಕಾರಣ ಠೇವಣಿಗಳನ್ನು ಹಿಂಪಡೆಯಲಾಗದು. ಆದ್ದರಿಂದ ʼಸೆಕ್ಯೂರ್ಡ್‌ʼ ʼ ಹೈಲಿ ರೇಟೆಡ್‌ʼ ಎಂಬ ಅಲಂಕಾರಿಕ ಪದಗಳಿಗೆ ಹೆಚ್ಚು ಗಮನದ ಅಗತ್ಯವಿಲ್ಲ.

ಬ್ಯಾಂಕ್‌ ಠೇವಣಿಗಳಿಗೆ ಪರ್ಯಾಯ ಹೂಡಿಕೆ:

2018 ರ ಮೇ ತಿಂಗಳಲ್ಲಿ ದಿವಾನ್ ಹೌಸಿಂಗ್ ಫೈನಾನ್ಸ್ ಕಂಪನಿಯು ರೂ.1,000 ಮುಖಬೆಲೆಯ, ಶೇ.8.56 ರಿಂದ ಶೇ.9.1 ರವರೆಗಿನ ವಾರ್ಷಿಕ ಬಡ್ಡಿಯ ಸೆಕ್ಯೂರ್ಡ್ ನಾನ್ ಕನ್ವರ್ಟಬಲ್ ಡಿಬೆಂಚರ್ ಗಳನ್ನು ವಿತರಿಸಿತು. ಆರಂಭದಲ್ಲಿ ಈ ಬಾಂಡ್ ಗಳು ಆಕರ್ಷಕ ಬೆಲೆಯಲ್ಲಿ ವಹಿವಾಟಾಗುತ್ತಿದ್ದವು. ಆದರೆ ಸೆಪ್ಟೆಂಬರ್ ತಿಂಗಳಲ್ಲಿ ಹೊರಬಿದ್ದ ಎನ್ ಬಿ ಎಫ್ ಸಿ ಕಂಪನಿಗಳ ಗೊಂದಲದ ಪ್ರಭಾವದಿಂದ ಒಂದೇ ದಿನ ಷೇರಿನ ಬೆಲೆ ರೂ.615 ರ ಸಮೀಪದಿಂದ ರೂ.246 ರವರೆಗೂ ಕುಸಿದ ಕಾರಣದಿಂದ ಈ ಬಾಂಡುಗಳ ಬೆಲೆ ಹೆಚ್ಚು ಒತ್ತಡವನ್ನೆದುರಿಸಿ. ಸಧ್ಯ ರೂ.1,000 ಮುಖಬೆಲೆಯ ಸೆಕ್ಯೂರ್ಡ್ ಎನ್ ಸಿ ಡಿ ಗಳು ರೂ.250 ರಿಂದ 300 ರ ಸಮೀಪ ವಹಿವಾಟಾಗುತ್ತಿವೆ. ಅಂದರೆ ಸುಮಾರು ಒಂದೆರಡು ವರ್ಷದಲ್ಲಿ ಸೆಕ್ಯೂರ್ಡ್ ಎನ್ ಸಿ ಡಿ ಗಳಲ್ಲಿ ಶೇ.65 ಕ್ಕೂ ಹೆಚ್ಚು ಬಂಡವಾಳ ಕರಗಿಹೋಗಿದೆ. ಖಾಸಗಿ ಕಂಪನಿಗಳಾದ ಶ್ರೀರಾಮ್ ಟ್ರಾನ್ಸ್ ಪೋರ್ಟ್ ಫೈನಾನ್ಸ್, ಈ ಸಿ ಎಲ್ ಫೈನಾನ್ಸ್, ಮನಪುರಂ ಫೈನಾನ್ಸ್, ಶ್ರಯ್ ಇನ್ಫ್ರಾ, ರಿಲಯನ್ಸ್ ಕ್ಯಾಪಿಟಲ್, ಇಂಡಿಯಾ ಬುಲ್‌ ಹೌಸಿಂಗ್ ಫೈನಾನ್ಸ್, ಮುಂತಾದವುಗಳ ಬಾಂಡ್ ಗಳು ಮುಖಬೆಲೆಗಿಂತಲೂ ಕಡಿಮೆ ಬೆಲೆಗೆ ವಹಿವಾಟಾಗುತ್ತಿವೆ. ಕೆಲವು ಕಂಪನಿಗಳು ಬಡ್ಡಿ ಹಣ ನೀಡದೆ ತೊಂದರೆಗೊಳಪಟ್ಟಿವೆ. ಬ್ಯಾಂಕ್‌ ಬಡ್ಡಿದರ ಕುಸಿತದ ಈ ಸಂದರ್ಭದಲ್ಲಿ ಕಂಪನಿ ಡಿಪಾಜಿಟ್‌ ಗಳು ಘೋಷಿಸುವ ಬಡ್ಡಿದರಗಳಿಗೆ ಪ್ರೇರೇಪಿತರಾಗದೆ ವಾಸ್ತವ ಅಂಶಗಳನ್ನರಿತು ನಿರ್ಧರಿಸಿರಿ.

ಬ್ಯಾಂಕ್‌ ಎನ್‌ ಸಿ ಡಿ ಮತ್ತು ಪರ್ಪೆಚುಯಲ್‌ ಬಾಂಡ್:

ಈಚಿನ ವರ್ಷಗಳಲ್ಲಿ ಕರ್ಣಾಟಕ ಬ್ಯಾಂಕ್ ಶೇ 12ರಂತೆ ಬಡ್ಡಿ ನೀಡುವ ಎನ್ ಸಿಡಿಗಳನ್ನು, ಕರೂರ್‌ ವೈಶ್ಯ ಬ್ಯಾಂಕ್‌ 11.95% ಬಡ್ಡಿ ನೀಡುವ ಬಾಂಡ್‌, ಸೌತ್‌ ಇಂಡಿಯನ್‌ ಬ್ಯಾಂಕ್‌ ಶೇ.11.75 ಮತ್ತು 13.75 ಬಡ್ಡಿದರದ ಬಾಂಡ್‌ ಗಳು, ಇಂಡಸ್‌ ಇಂಡ್‌ ಬ್ಯಾಂಕ್‌ ನ ಶೇ.9.50 ದರದ ಬಾಂಡ್‌ ಗಳು, ಇಂಡಿಯನ್ ಓವರ್ ಸೀಸ್ ಬ್ಯಾಂಕ್ ಶೇ 11.7 ಬಡ್ಡಿ ನೀಡುವ ಟೈರ್ 2 ಬಾಂಡ್ ಗಳನ್ನು ವಿತರಿಸಿವೆ. ಈ ರೀತಿಯ ಬ್ಯಾಂಕ್ ಬಾಂಡ್ ಗಳು ಪೇಟೆಯಲ್ಲಿ ಹಲವು ಬಾರಿ ಸ್ವಲ್ಪ ಪ್ರೀಮಿಯಂನಲ್ಲಿ ದೊರೆಯುತ್ತವೆ. ಆದಾಯ ತೆರಿಗೆಯನ್ನು ಪಾವತಿಸುವವರು ಹೆಚ್ಚಿನ ಸ್ಲಾಬ್ ನಲ್ಲಿದ್ದರೆ ಅವರು ತೆರಿಗೆ ಮುಕ್ತ ಬಡ್ಡಿ ನೀಡುವ, ಅಂದರೆ ಪವರ್‌ ಫೈನಾನ್ಸ್‌, ಆರ್‌ ಇ ಸಿ, ಹುಡ್ಕೋ, ಐಆರ್‌ ಎಫ್‌ ಸಿ, ಮುಂತಾದ ಉತ್ತಮ ಕಂಪನಿಗಳ ಬಾಂಡ್ ಗಳನ್ನೂ ಖರೀದಿಸಲು ಪೇಟೆ ಅವಕಾಶ ಮಾಡಿಕೊಟ್ಟಿದೆ. ಬ್ಯಾಂಕ್ ಗಳಲ್ಲಿ ಠೇವಣಿ ಇಟ್ಟು ಕಡಿಮೆ ಬಡ್ಡಿ ಪಡೆಯುವುದಕ್ಕಿಂತ ಅದೇ ಬ್ಯಾಂಕ್ ಗಳು ವಿತರಿಸಿರುವ ಸಾಲಪತ್ರಗಳಲ್ಲಿ ಹೂಡಿಕೆ ಮಾಡಿದಲ್ಲಿ ಹೆಚ್ಚಿನ ಬಡ್ಡಿ ಪಡೆಯಬಹುದು. ತುಲಾನಾತ್ಮಕವಾಗಿ ಅಡಕವಾಗಿರುವ ವಿವಿಧ ಅಂಶಗಳನ್ನು ಪರಿಗಣಿಸಿ, ನಿರ್ಧರಿಸುವ ಆರ್ಥಿಕ ಸಾಕ್ಷರತಾ ಮಟ್ಟ ಬೆಳೆಸಿಕೊಳ್ಳುವುದು ಇಂದಿನ ಅವಶ್ಯವಾಗಿದೆ. ಕೆಲವು ಬ್ಯಾಂಕ್‌ಗಳು ಧೀರ್ಘಕಾಲೀನ ಹೂಡಿಕೆಯಾಗಿ ʼ ಪರ್ಪೆಚುಯಲ್‌ಬಾಂಡ್‌ʼ ಗಳನ್ನು ತೇಲಿಬಿಟ್ಟಿವೆ. ಸಾಮಾನ್ಯವಾಗಿ ಬ್ಯಾಂಕ್‌ಯೋಜನೆಗಳಲ್ಲಿ ನಮ್ಮ ಹೂಡಿಕೆಯ ಹಣವು ಸುರಕ್ಷಿತ ಎಂಬ ನಿರ್ಧಾರ ಎಲ್ಲರಲ್ಲಿದೆ.

ಇದಕ್ಕೆ ಅಪವಾದ ಎಂಬಂತೆ ಇತ್ತೀಚೆಗೆ ಯೆಸ್‌ಬ್ಯಾಂಕ್‌ಹಗರಣಗಳು ಬೆಳಕಿಗೆ ಬಂದು, ಬ್ಯಾಂಕ್‌ಆರ್ಥಿಕ ಒತ್ತಡಕ್ಕೊಳಗಾದ ಸಂದರ್ಭದಲ್ಲಿ ನಿಯಂತ್ರಕರು ಈ ಬ್ಯಾಂಕ್‌ವಿತರಿಸಿದ ʼಟೈರ್‌1ʼ ಬಾಂಡ್‌ಗಳನ್ನು ಸಂಪೂರ್ಣವಾಗಿ ಶೂನ್ಯವಾಗಿಸಿದೆ. ಅಷ್ಟೆ ಅಲ್ಲ, ಟೈರ್‌ 2 ಬಾಂಡ್‌ ಗಳ ಮೇಲೆ ಜೂನ್‌ ನಲ್ಲಿ ನೀಡಬೇಕಾದ ಶೇ.10.25 ರ ಬಡ್ಡಿ ಹಣವನ್ನು ಸಹ ವಿತರಿಸಲಿಲ್ಲ. ಇದು ಬ್ಯಾಂಕ್‌ಗಳ ಮೇಲಿನ ನಂಬಿಕೆಯನ್ನು ಸ್ವಲ್ಪ ಮಟ್ಟಿಗೆ ಕರಗಿಸಿದೆ.

ಪ್ರಮುಖ ಬ್ಯಾಂಕ್‌ಗಳಾದ ಎಸ್‌ಬಿ ಐ, ಐಸಿಐಸಿಐ ಬ್ಯಾಂಕ್‌, ಬ್ಯಾಂಕ್‌ಆಫ್‌ಬರೋಡ, ಆಕ್ಸಿಸ್‌ಬ್ಯಾಂಕ್‌, ಕೆನರಾ ಬ್ಯಾಂಕ್‌, ಪಿ ಎನ್‌ಬಿ ಅಲ್ಲದೆ 11.8% ಬಡ್ಡಿ ನೀಡುವ ಟಾಟಾ ಸ್ಟೀಲ್‌ಬಾಂಡ್‌ಗಳು ಸ್ಟಾಕ್‌ಎಕ್ಸ್‌ಚೇಂಜ್‌ಗಳಲ್ಲಿ ವಹಿವಾಟಾಗುತ್ತವೆ. ಇವುಗಳ ವಿವರಗಳನ್ನು ಪಡೆದುಕೊಂಡು ಅವರವರ ಅನೂಕೂಲಕ್ಕೆ ತಕ್ಕಂತೆ ಹೂಡಿಕೆಗೆ ಆಯ್ಕೆ ಮಾಡಿಕೊಳ್ಳಬಹುದು. ಟಾಟಾ ಸ್ಟೀಲ್‌ಬಾಂಡ್‌ಗಳು 2011 ರಿಂದಲೂ ಜಾರಿಯಲ್ಲಿರುವ ಕಾರಣ ಇಷ್ಟು ಹೆಚ್ಚಿನ ಬಡ್ಡಿ ನೀಡುವ ಯೋಜನೆಯಾಗಿದೆ. ಅಲ್ಲದೆ ಮುಂದಿನ ವರ್ಷದ ಮಾರ್ಚ್‌ನಿಂದ ಕಂಪನಿಯಿಂದಲೇ ಪ್ರತಿ ವರ್ಷದ ಮಾರ್ಚ್‌ನಲ್ಲಿ ʼಬೈ ಬ್ಯಾಕ್‌ʼ ಗೆ ಅವಕಾಶವಿರುತ್ತದೆ. ಪೇಟೆಯಲ್ಲಿ ವಹಿವಾಟಾಗದಿದ್ದಲ್ಲಿ ಕಂಪನಿಗೆ ಹಿಂದಿರುಗಿಸಬಹುದು.

ಸಾಲಪತ್ರ ಪೇಟೆಯಲ್ಲಿ ಎರಡು ರೀತಿ ವ್ಯವಹರಿಸಬಹುದು. ಒಂದು ನೇರವಾಗಿ ಷೇರುಪೇಟೆಯಲ್ಲಿ ಮತ್ತೊಂದು ಷೇರುಪೇಟೆ ಹೊರಗೆ ಡೆಟ್‌ಮಾರ್ಕೆಟ್‌ನ ಡೀಲರ್‌ಗಳ ಮೂಲಕ. ಷೇರುಪೇಟೆಯಲ್ಲಿ ವ್ಯವಹರಿಸುವುದರಿಂದ ಹೂಡಿಕೆದಾರರಿಗೆ ಖರೀದಿಸಿದ ದರ ಮತ್ತು ಅದಕ್ಕೆ ತಗಲಿದ ಬ್ರೋಕರೇಜ್‌, ತೆರಿಗೆಯಂತಹವುಗಳು ಮಾತ್ರ ಸೇರುತ್ತದೆ. ಆದರೆ ಹೊರಗಿನ ಡೆಟ್‌ಮಾರ್ಕೆಟ್‌ಡೀಲರ್‌ಗಳ ಮೂಲಕ ಖರೀದಿಸಿದಲ್ಲಿ, ಖರೀದಿದಾರರು, ಆ ಕಂಪನಿ ಹಿಂದೆ ಬಡ್ಡಿ ವಿತರಿಸಿದ ದಿನದಿಂದ ಖರೀದಿಸುವ ದಿನದವರೆಗೂ ಸಂಗ್ರಹವಾದ ಬಡ್ಡಿ ಮೊತ್ತವನ್ನು ತೆರಬೇಕಾಗುವುದು. ಅದ್ದರಿಂದ ಖರೀದಿಸುವ ಮುನ್ನ ಈ ಅಂಶಗಳನ್ನು ಪರಿಗಣಿಸಿ ಯಾವುದು ಅನುಕೂಲಕರ ಎಂದು ನಿರ್ಧರಿಸಬೇಕು.

ಇತ್ತೀಚಿನ ಬೆಳವಣಿಗೆಗಳಲ್ಲಿ ಪೇಟೆಯ ನಿಯಂತ್ರಕ ಸಂಸ್ಥೆ ʼ ಸೆಬಿʼ ಸಾಲಪತ್ರ ಪೇಟೆಯನ್ನು ಚುರುಕುಗೊಳಿಸಿ ರೀಟೇಲ್‌ ಹೂಡಿಕೆದಾರರು ಸಹ ಸಾಲಪತ್ರ ಪೇಟೆಯಲ್ಲಿಯೂ ಚಟುವಟಿಕೆ ನಡೆಸಲು ಹಾದಿ ಸುಗಮಗೊಳಿಸುವತ್ತ ಗಮನಹರಿಸಿರುವುದು ಬ್ಯಾಂಕ್‌ ಬಡ್ಡಿಯ ಅವಲಂಬಿತರಾದವರಿಗೂ, ನಿವೃತ್ತರಿಗೂ ಒಂದು ಉತ್ತಮ ಬೆಳವಣಿಗೆಯಾಗಿದೆ.

ನೆನಪಿರಲಿ: ಸುರಕ್ಷತೆಯು ಹೂಡಿಕೆಯ ಸೂತ್ರವಾದಲ್ಲಿ, ಗಳಿಕೆಯು ಸುಸೂತ್ರ

Photo by Micheile Henderson on Unsplash