ವಿಮಾನ ಅಪಘಾತಕ್ಕೆ ಅಸಲಿ ಕಾರಣಗಳಾದರು ಏನು

ಮೊನ್ನೆ ಶುಕ್ರವಾರ ರಾತ್ರಿ 9 ಗಂಟೆ. ದಿನದ ಆಗು ಹೋಗುಗಳನ್ನು ಅರಿಯಲು ಪ್ರೈಮ್ ಟೈಮ್ ನ್ಯೂಸ್ ನೋಡಲು ಕುಳಿತವರಿಗೊಂದು ಆಘಾತಕಾರಿ ಸುದ್ದಿ. ದುಬೈನಿಂದ ಬಂದು ಇನ್ನೇನು ಕೇರಳದ ಕೋಜಿಕ್ಕೋಡು ವಿಮಾನ ನಿಲ್ದಾಣದಲ್ಲಿ ಇಳಿಯಬೇಕಾಗಿದ್ದ ಇಂಡಿಯನ್ ಏರ್ ಲೈನ್ ಎಕ್ಸಪ್ರೆಸ್ ಗೆ ಸೇರಿದ ವಿಮಾನ ರನ್ ವೇ ನಲ್ಲಿ ನೆಲಕ್ಕಪ್ಪಳಿಸಿ ಎರಡು ಹೋಳಾಯಿತು.ಪೈಲಟ್ ಸೇರಿ ಹಲವು ಪ್ರಯಾಣಿಕರು ಮೃತಪಟ್ಟರು. ವಿಮಾನ ಕೆಳಗೆ ಬಿದ್ದಾಗ ಬೆಂಕಿ ಹೊತ್ತದ ಕಾರಣ ಅನೇಕರ ಜೀವ ಉಳಿಯಿತು.

ಆಗಸಕ್ಕೆ ಹಾರಿದ ಕ್ಷಣದಿಂದ ಇಳಿಯುವರೆಗೆ ರಾಡರ್ ನ ಕಣ್ಗಾವನಲ್ಲೇ ಇರುವ ವಿಮಾನಗಳು ಅಪಘಾತಕ್ಕೆ ಈಡಾದಾಗ ಜನಮಾನಸದಲ್ಲಿ ಹೆಚ್ಚಿನ ಆತಂಕ. ಬಸ್ಸು , ರೇಲು ಅಫಘಾತಗಳಿಗಿಂತ ಹೆಚ್ಚಾಗಿ ವಿಮಾನ ಅಪಘಾತದ ಸುದ್ದಿ ವಿಮಾನದಲ್ಲಿ ಒಂದು ಬಾರಿಯೂ ಪ್ರಯಾಣಿಸದವರಿಗೂ ಆತಂಕ ತರುವ ಸಮಾಚಾರವಾಗುತ್ತದೆ. ಹಲವಾರು ಪರೀಕ್ಷೆಗೆ ಒಳಗಾಗಿ, ಸಕಲ ಮುನ್ನೆಚ್ಚರಿಕೆ ತೆಗೆದುಕೊಂಡುರೂ ವಿಮಾನಗಳು ಅಪಘಾತಕ್ಕೆ ಈಡಾಗವುದಾದರು ಏಕೆ- ಇದು ಅನೇಕರನ್ನು ಕಾಡುವ ಪ್ರಶ್ನೆ.

ಸುಮಾರು 25-30 ವರುಷದ ಹಿಂದೆ ವಿಮಾನ ಪ್ರಯಾಣ ಶ್ರೀಮಂತರಿಗೆ ಮಾತ್ರ ಸೀಮಿತವಾಗಿತ್ತು. ಮಧ್ಯಮ ವರ್ಗದವರು ವಿಮಾನಗಳು ಹಾರಾಡುವುದನ್ನು ನೋಡುತ್ತಾ ಹಕ್ಕಿಯಂತೆ ಹಾರುವುದು ತಮಗೊಂದು ಕನಸೇ ಎಂದು ಭಾವಿಸಿದ್ದರು. ಆದರೆ ಖಾಸಗಿ ಆಪರೇಟರ್ ಗಳಿಗೂ ವಿಮಾನ ಯಾನದ ಅವಕಾಶ ಸಿಕ್ಕಮೇಲೆ ಸಹಜವಾಗಿಯೇ ಬೆಲೆಗಳು ಇಳಿದು ಹೆಚ್ಚೆಚ್ಚು ಪ್ರಯಾಣಿಕರು ವಿಮಾನದ ಪ್ರಯಾಣದ ಸುಖ ಅನುಭವಿಸುವಂತೆ ಆಯಿತು. ಪರಿಣಾಮ ವಿಮಾನಗಳು ಹೆಚ್ಚಿದವು, ಪ್ರಯಾಣಿಕರು ಹೆಚ್ಚಿದರು ಜೊತೆಗೆ ಅಪಘಾತಗಳು ಹೆಚ್ಚಿದವು.

ಒಂದೇ ಒಂದು ನಿರ್ದಿಷ್ಟ ಕಾರಣದಿಂದ ವಿಮಾನ ಅಪಘಾತಗಳು ಎಂದಿಗೂ ಸಂಭವಿಸುವುದಿಲ್ಲ. ವಿಮಾನ ಅಪಘಾತ ಅಥವಾ ಘಟನೆಗೆ ಕಾರಣವಾಗುವ ಅನೇಕ ಅಂಶಗಳು ಯಾವಾಗಲೂ ಇರುತ್ತವೆ. ಕೆಟ್ಟ ಹವಾಮಾನ ಮತ್ತು ತಾಂತ್ರಿಕ ಸಮಸ್ಯೆ, ಮಾನವ ಸಹಜ ತಪ್ಪುಗಳು ಇದಕ್ಕೆ ಕಾರಣವಾಗುತ್ತವೆ.

ವಿಮಾನಗಳು ಹಾರುವ ಮೊದಲು ಮತ್ತು ಇಳಿದ ನಂತರವೂ ತಪಾಸಣೆ ನಡಸಲಾಗುತ್ತದೆ. ಒಮ್ಮೊಮ್ಮೆ ತಾಂತ್ರಿಕ ದೋಷವನ್ನು ಸರಿಪಡಿಸಲಾಗಿದೆ ಎಂದು ನಂಬಿ ಹಾರಾಟಕ್ಕೆ ಅನುಮತಿ ಕೊಟ್ಟಾಗ ಅವು ಇಳಿಯುವ ಸಮಯದಲ್ಲಿ ಕೈ ಕೊಟ್ಟರೆ ಅಪಘಾತ ನಿಶ್ಛಿತ.ಇನ್ನೊಮ್ಮೆ ಪೈಲಟ್ ಗಳು ಹೊರಗಿನ ಪರಿಸ್ಥಿತಿಯನ್ನು ತಪ್ಪಾಗಿ ಅರ್ಥೈಸುವುದು , ಇಂಥದ್ದು ನಾನೆಷ್ಟು ನೋಡಿಲ್ಲ ಎಂದು ತೆಗೆದುಕೊಳ್ಳುವ ರಿಸ್ಕೂ ಅಪಘಾತಕ್ಕೆ ಕಾರಣವಾಗುತ್ತದೆ.

ನೀರು ನಿಲ್ಲುವುದು ತುಂಬಾ ಅಪಾಯಕಾರಿ

ರನ್‌ ವೇ ನಲ್ಲಿ ನೀರು ನಿಲ್ಲುವುದು ತುಂಬಾ ಅಪಾಯಕಾರಿ.ನೀರು ನಿಲ್ಲದೆ ಹರಿದು ಹೋಗುವಂಥ ವ್ಯವಸ್ಥೆ ಇರಬೇಕು. ವಿಮಾನಗಳು ಇಳಿಯುವ ಹಂತದಲ್ಲಿ ವಿಮಾನದ ಚಕ್ರಗಳು ಲಾಕ್ ಆಗಿರುತ್ತವೆ. ಭೂ ಸ್ಪರ್ಶ ಆಗುತ್ತಿದ್ದಂತೆ ಅವು ರಿಲೀಸ್ ಆಗಬೇಕು. ಅಂಥ ಸಮಯದಲ್ಲಿ ರನ್ ವೇ ನಲ್ಲಿ ನಿಗದಿತ ಮಟ್ಟಕ್ಕಿಂತ ನೀರಿದ್ದರೆ ಅವು ವಿಮಾನವನ್ನು ಯಾವುದೇ ದಿಕ್ಕಿಗೂ ಎಳೆಯಬಹುದು ಎಂದು 2010 ರ ಮಂಗಳೂರು ವಿಮಾನ ದುರಂತವನ್ನು ತನಿಖೆ ಮಾಡಿದ್ದ ಏರ್ ಮಾರ್ಷಲ್ (ನಿವೃತ್ತ) ಭೂಷಣ್ ಗೋಖಲೆ ಇಂಗ್ಲಿಷ್ ಪತ್ರಿಕೆಯೊಂದಕ್ಕೆ ತಿಳಿಸಿದ್ದಾರೆ.

ಮೊನ್ನೆ ಅಪಘಾತ ನಡೆದದ್ದು ಟೇಬಲ್ ಟಾಪ್ ವಿಮಾನ ನಿಲ್ದಾಣ. ಹಾಗೆಂದು ಟೇಬಲ್ ಟಾಪ್ ವಿಮಾನ ನಿಲ್ದಾಣಗಳ ಬಗ್ಗೆ ಭಯ ಪಡುವ ಅಗತ್ಯವಿಲ್ಲ . ಆದರೆ ಇಂಥ ನಿಲ್ದಾಣಗಳು ಅನುಭವಿ ಪೈಲಟ್ ಗಳನ್ನು ಬಯಸುತ್ತವೆ. ಭಾರತದಲ್ಲಿ ಐದು ಟೇಬಲ್ ಟಾಪ್ ರನ್ ವೇ ಗಳಿವೆ .ಮಂಗಳೂರು, ಕೋಝಿಕ್ಕೋಡ್, ಶಿಮ್ಲಾ , ಪಕ್ಯಾಂಗ್ (ಸಿಕ್ಕಿಂ) ಮತ್ತು ಮಿಜೋರಾಮ್ ನ ಲಿಂಫು.

ಮೊನ್ನೆ ವಿಸಿಬಿಲಿಟಿ ಕಡಿಮೆ ಇದ್ದರೂ ಪೈಲಟ್ ಅಲ್ಲಿ ವಿಮಾನ ಇಳಿಸುವ ನಿರ್ಧಾರ ಮಾಡಿದರೆ ? ಇತ್ಯಾದಿ ವಿವರಗಳು ತನಿಖೆಯಿಂದ ಗೊತ್ತಾಗಬೇಕಿದೆ. ಅಪಾಯದ ವಾಸನೆ ಅರಿತು ಬೆಂಕಿ ಹತ್ತದಂತೆ ವಿಮಾನ ಇಳಿಸದ ಪೈಲಟ್ ದೀಪಕ್ ಸೇಥಿಗೆ ಪ್ರಶಂಸೆ ವ್ಯಕ್ತವಾಗಿದೆ.

ಪೈಲಟ್‌ಗಳು ಪರಿಸ್ಥಿತಿಯನ್ನು ತಪ್ಪಾಗಿ ಅರ್ಥೈಸಿದಾಗ, ಹವಾಮಾನ ಪರಿಸ್ಥಿತಿಗಳನ್ನು ತಪ್ಪಾಗಿ ಗ್ರಹಿಸಿದಾಗ ಅಥವಾ ಯಾಂತ್ರಿಕ ದೋಷಗಳನ್ನು ಸರಿಯಾಗಿ ಪರಿಹರಿಸಲು ವಿಫಲವಾದಾಗ ಅನೇಕ ವಾಯುಯಾನ ಅಪಘಾತಗಳು ಸಂಭವಿಸುತ್ತವೆ. ವಿಮಾನಗಳು ಅಪಘಾತಕ್ಕೀಡಾಗಲು ಪೈಲಟ್ ದೋಷವನ್ನು ಪ್ರಥಮ ಕಾರಣವೆಂದು ಪರಿಗಣಿಸಲಾಗುತ್ತದೆ.

ಅನುಭವಿ ಪೈಲಟ್

ಯುನೈಟೆಡ್ ಅರಬ್ ಎಮಿರೇಟ್ಸ್‌ನ ದುಬೈನಿಂದ ಭಾರತಕ್ಕೆ ಬಂದ ಈ ವಿಮಾನ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಫ್ಲೈಟ್ 1344 ಹದಿಮೂರು ವರ್ಷಗಳಿಗಿಂತಲೂ ಹಳೆಯದಾಗಿತ್ತು.ವಿಂಗ್ ಕಮಾಂಡರ್ ದೀಪಕ್ ಸಾಥೆ (ಏಪ್ರಿಲ್ 24, 1961 – ಆಗಸ್ಟ್ 7, 2020) ಈ ನತದೃಷ್ಟ ವಿಮಾನದ ಕ್ಯಾಪ್ಟನ್ . ಮಾಜಿ ಭಾರತೀಯ ವಾಯುಪಡೆಯ ಅಧಿಕಾರಿಯಾಗಿದ್ದು, 22 ವರ್ಷಗಳ ಕಾಲ ಸೇವೆ ಸಲ್ಲಿಸಿದ್ದರು. ಮಿಗ್ -21 ಸೂಪರ್ಸಾನಿಕ್ ಜೆಟ್ ಫೈಟರ್ ಅನ್ನು ಹಾರಿಸುವ ಮೂಲಕ ಭಾರತೀಯ ವಾಯುಸೇನೆಯಲ್ಲಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು. ಅವರು ವಿಂಗ್ ಕಮಾಂಡರ್ ಆಗಿ 2003 ರಲ್ಲಿ ನಿವೃತ್ತರಾದರು ಮತ್ತು 2005 ರಲ್ಲಿ ಏರ್ ಇಂಡಿಯಾ ಸೇರಿದರು. ನ್ಯಾಷನಲ್ ಡಿಫೆನ್ಸ್ ಅಕಾಡೆಮಿಯಲ್ಲಿ ತರಬೇತಿ ಪಡೆದಿದ್ದರು ಮತ್ತು ಅವರ ತರಬೇತಿ ಕೋರ್ಸ್‌ನಲ್ಲಿ ಸ್ವೋರ್ಡ್ ಆಫ್ ಆನರ್ ಪ್ರಶಸ್ತಿಯನ್ನು ಪಡೆದಿದ್ದರು. ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್‌ನ ಪರೀಕ್ಷಾ ಪೈಲಟ್ ಕೂಡ ಆಗಿದ್ದರು ಮತ್ತು ಬೋಯಿಂಗ್ 737 ವಾಣಿಜ್ಯ ವಿಮಾನಗಳನ್ನು ನಿರ್ವಹಿಸುತ್ತಿದ್ದರು.

.ಆಗಸ್ಟ್ 7, 2020 ರಂದು, ಭಾರೀ ಗಾಳಿಯಿಂದಾಗಿ ಅನೇಕ ಸ್ಥಗಿತಗೊಂಡ ಲ್ಯಾಂಡಿಂಗ್ ಪ್ರಯತ್ನಗಳ ನಂತರ, ವಿಮಾನವು ಕೋಝಿಕ್ಕೋಡ್ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿನ ರನ್ ವೇ ಕೊನೆಯಲ್ಲಿ 9–10.5 ಮೀ (30–35 ಅಡಿ) ಕಮರಿಗೆ ಇಳಿಯಿತು.

ತಪ್ಪು ಆಗಿದ್ದೆಲ್ಲಿ ಎಂಬುದು ತನಿಖೆಯಿಂದಷ್ಟೆ ಗೊತ್ತಾಗಬೇಕು. ಹಾಗೆಂದು ಜೀವನದ ಪ್ರಯಾಣ ಸಾಗಲೇ ಬೇಕು. ವಿಮಾನಗಳು ಹಾರಾಡಲೇ ಬೇಕು. ಮುಂದಿನ ದಿನಗಳಲ್ಲಿ ಇಂಥ ಅಪಘಾತಗಳು ಮರುಕಳಿಸದಿರಲಿ.

happy takeoff and happy landing