ಜ್ಯಾಮಿಟ್ರಿ ಬಾಕ್ಸ್ ಎಂಬ ಮಾಯಾ ಪೆಟ್ಟಿಗೆ

ನಮ್ಮ ಬದುಕಿನ ಮೊದಲ ಪುಟ್ಟ ಬ್ಯಾಂಕ್ , ಲಾಕರ್ . ಹೆಣ್ಣು ಮಕ್ಕಳಿಗಂತೂ ಇದೇ ಪರ್ಸು .ದುಡ್ಡು , ಉಂಗುರ , ಹೇರ್ ಬ್ಯಾಂಡ್ , ಬಿಂದಿ , ಚಿಕ್ಕಿ , ಚಾಕಲೇಟ್ ಹೀಗೆ ಹತ್ತು ಹಲವಾರನ್ನು ಇರಿಸಿಕೊಳ್ಳೋ ಬಹುಪಯೋಗಿ ಪೆಟ್ಟಿಗೆ .ಹೌದು ಇದುವೇ ನಮ್ಮ ಬಾಲ್ಯದ “ಜ್ಯಾಮಿಟ್ರಿ ಬಾಕ್ಸ್ “.

ಶಾಲೆಯಲ್ಲಿ ಭಾಗಶಃ ಎಲ್ಲರ ಹತ್ತಿರವೂ ಇರ್ತಿತ್ತು .
ಮೊದಲ ಸಲ ತೆರೆದು ನೋಡಿದಾಗ ನಿಜಕ್ಕೂ ನಮ್ಮ ಪುಟ್ಟ ಕಂಗಳಲ್ಲಿ ಬೆಳಕು ಮೂಡುತ್ತಿತ್ತು . ಪ್ರತಿ ಸಲ ತೆಗೆದಾಗಲೂ ಮನಸ್ಸಿಗೆ ಅದೇನೊ ಆನಂದವಿರುತ್ತಿತ್ತು.

ಸ್ಕೇಲು , ತ್ರಿಭುಜಾಕಾರದ ಸ್ಕೇಲು , ರಬ್ಬರ್ರು , ಡಿಗ್ರಿ ಎಂದು ಕರೆಯುತ್ತಿದ್ದ ಅರ್ಧಾಕೃತಿಯ ಕೋನಮಾಪಕ , ಕಾಂಪಾಸ್ ಅದನ್ನ ಕೈವಾರ ಅಂತಿದ್ವಿ ಅದರ ಜೊತೆ ಎರಡು ಮುಳ್ಳಿನದ್ದೊಂದು ವಿಭಜಕ ಇರುತ್ತಿತ್ತು ಅದನ್ನ ನಾವು ಒಂದು ದಿನಕ್ಕೂ ಉಪಯೋಗಿಸಲಿಲ್ಲ . ಹೀಗೆ ಅದರೊಳಗೆ ಕುತೂಹಲ ಮೂಡಿಸುವ ಪರಿಕರಗಳಿರುತ್ತಿತ್ತು .

ಹೊಸದಾಗಿ ಕೊಂಡಾಗ ಅದೆಷ್ಟು ಸಂಭ್ರಮಿಸುತ್ತಿದ್ದೆವೋ ಅನುಭವಿಸಿದವರಿಗೇ ಗೊತ್ತು .

ಒಂದು ಪೇಪರ್ರನ್ನು ಬಾಕ್ಸಿನ ಅಳತೆಗೆ ಕಟ್ ಮಾಡಿ ಬಾಕ್ಸಿನ ತಳದಲ್ಲಿ ಅದನ್ನು ಹಾಸಿ ಅದರ ಮೇಲೆ ಎಲ್ಲಾ ಜೋಡಿಸಿಕೊಳ್ಳುತ್ತಿದ್ದೆವು . ಮದುವೆ ಇನ್ವಿಟೇಶನ್ ನಲ್ಲಿ ಮುದ್ರಿತವಾಗಿ ಬರುತ್ತಿದ್ದ ಚಿನ್ನದ ಬಣ್ಣದ ಗಣೇಶ ವೆಂಕಟೇಶ್ವರ ದೇವರುಗಳ ಫೋಟೋಗಳನ್ನು ಜ್ಯಾಮಿಟ್ರಿ ತೆಗೆದಾಗ ಕಾಣುವ ಹಾಗೆ ಮುಚ್ಚಳಕ್ಕೆ ಅಂಟಿಸಿಕೊಳ್ಳುತ್ತಿದ್ದೆವು.

ಹೆಣ್ಮಕ್ಳ ಜ್ಯಾಮಿಟ್ರಿಯಂತೂ ನೆಲ್ಲಿಕಾಯಿ , ಎಳಚಿಕಾಯಿ , ಸೆಂಟ್ ರಬ್ಬರ್ರು , ಕಾಡಿಗೆ , ಬಣ್ಣಬಣ್ಣದ ಬಿಂದಿಗಳು , ನವಿಲುಗರಿ , ತುಳಸಿ ಎಲೆ ಹೀಗೆ ತುಂಬೋಗಿರೋದು .

ಮನೆಯಲ್ಲಿ ಹೊಸದಾಗಿ ಕೊಡಿಸಿದಾಗ ಅದರ ಮೇಲಿನ ಕವರ್ರನ್ನೂ ತೆಗೆಯದೇ ಜೋಪಾನ ಮಾಡುತ್ತಿದ್ದ ನಾವು ಕೊನೆ ಕೊನೆಗೆ ಅದನ್ನು ಹಲ್ಲಲ್ಲಿ ಕಚ್ಚಿ ತೆಗೆಯೋ ಪರಿಸ್ಥಿತಿಗೆ ತಂದುಬಿಡ್ತಿದ್ವಿ .

ಗಣಿತದ ಮೇಷ್ಟ್ರು ಎಲ್ಲಾ ಜ್ಯಾಮಿಟ್ರಿ ಬಾಕ್ಸ್ ಓಪನ್ ಮಾಡಿ ಇಟ್ಕೋಳಿ ಅಂದ್ರೆ ಸಾಕು ಒಬ್ಬೊಬ್ಬರದು ಒಂದೊಂದು ಸೌಂಡ್ ಬರೋದು . ಇಂಕ್ ಪೆನ್ನು ಅದು ಲೀಕ್ ಆಗಿ ಆ ಕೆಳಗೆ ಹಾಸಿದ್ದ ಪೇಪರ್ರೆಲ್ಲಾ ಗಬ್ಬೆದ್ದು ಹೋಗಿರೊದು .ಲೆಕ್ಕದಲ್ಲಿ ತಪ್ಪು ಮಾಡಿದಾಗ ಮೇಷ್ಟ್ರು ನಿನಗೆ ಜ್ಯಾಮಿಟ್ರಿ ಬಾಕ್ಸ್ ಬೇರೆ ಕೇಡು ಅಂತ ಬಯ್ಯೋವ್ರು ಹೊಡೆಯೋವ್ರು .

ಸ್ನೇಹಿತರ ಜೊತೆ ಸ್ಪರ್ಧೆಗೆ ಇಳಿದಾಗ , ಶಾಲೆಗೆ ವೇಳೆಯಾಯಿತು ಅಂತ ಓಡುವ ವೇಗದಲ್ಲಿ ಮುಗ್ಗರಿಸಿ ಬಿದ್ದಾಗ ಜ್ಯಾಮಿಟ್ರಿ ಬಾಕ್ಸ್ ಬಿದ್ದು ಅದರಲ್ಲಿದ್ದ ವಸ್ತುಗಳೆಲ್ಲಾ ಚೆಲ್ಲಾಪಿಲ್ಲಿಯಾಗಿ ಹರಡಿರೋದು , ಸ್ನೇಹಿತರು ಬಂದು ಎಲ್ಲಾ ಆಯ್ಕೊಡೋವ್ರು . ಮಂಡಿ ಮಣ್ಣಾಗಿ ಚರ್ಮ ಕಿತ್ತು ರಕ್ತ ಬರುತ್ತಿದ್ದರೂ ನಮ್ಮ ಗಮನವೆಲ್ಲಾ ಬಿದ್ದ ಬಾಕ್ಸಿನ ಮತ್ತು ಅದರೊಳಗಿನ ವಸ್ತುಗಳ ಮೇಲಿರೋದು .

ಈಗ ತರಾವರಿ ನಮೂನೆಗಳ ಅತ್ಯಾಕರ್ಷಕವಾದ ಬಣ್ಣಬಣ್ಣದ ಬಾಕ್ಸ್ಗಳು ಮಾರುಕಟ್ಟೆಯಲ್ಲಿ ಲಭ್ಯವಿದೆ ಆದರೆ ಮಕ್ಕಳಿಗೆ ಅದರ ಮೇಲೆ ಅಂತಾ ಆಸಕ್ತಿಯಿದ್ದಂತೆ ಕಾಣುವುದಿಲ್ಲ .

“ಜ್ಯಾಮಿತಿ ಪೆಟ್ಟಿಗೆ” ಜೊತೆ ನಮ್ಮದೊಂದು ಆತ್ಮೀಯ ಅನುಬಂಧವಿತ್ತು , ಅದನ್ನ ತೆಗೆದಾಗ ಅದರೊಳಗಿನ ಸೆಂಟುರಬ್ಬರಿನ ಘಮಲು ಈಗಲೂ ಮೂಗಿಗೆ ಬಡಿದ ನೆನಪಿದೆ .

ಇವತ್ತಿಗೆ ಅದು ಏನೂ ಅಲ್ಲದಿದ್ದರೂ ಅಂದು ನಮಗದು ಎಲ್ಲಾ ಆಗಿತ್ತು . ಗಣಿತಕ್ಕೆಂದೇ ತಯಾರಿಸಿದ ಪೆಟ್ಟಿಗೆಯಾಗಿದ್ದರೂ ಸಹ ನಮಗೆ ಎಲ್ಲಾ ವಿಷಯಗಳ ವಿಶೇಷ ಮಾಯಾಪೆಟ್ಟಿಗೆಯಾಗಿತ್ತು .