ವಿಸ್ಮಯಿಕಾರಿ ಪೇಟೆಯಲ್ಲಿ ಅರಿತು ಹೂಡುವವನೆ ಜಾಣ

ಷೇರುಪೇಟೆ ಹೂಡಿಕೆಯು ಬ್ಯಾಂಕ್‌ ಡಿಪಾಸಿಟ್‌ ನಂತಲ್ಲ. ಡಿಪಾಸಿಟ್‌ ಗಳಲ್ಲಿ ಒಂದು ನಿರ್ದಿಷ್ಟ ಅವಧಿಯ ನಂತರ ಇಂತಿಷ್ಠೇ ಹೆಚ್ಚುವರಿ ಹಣ ಲಭಿಸುವುದೆಂದು ನಿಖರವಾಗಿ ಲೆಕ್ಕ ಹಾಕಬಹುದು. ಆದರೆ ಷೇರುಪೇಟೆಯಲ್ಲಿ ಹೂಡಿಕೆಯ ಫಲಿತಾಂಶವನ್ನು ನಿಖರವಾಗಿ ತಿಳಿದುಕೊಳ್ಳಲು ಸಾಧ್ಯವೇ ಇಲ್ಲ ಎಂಬುದನ್ನು 2020 ರ ಬೆಳವಣಿಗೆಗಳು ಬಿಂಬಿಸಿವೆ.

ಕೇವಲ 10 ತಿಂಗಳ ಸಮಯದಲ್ಲಿ ಸೆನ್ಸೆಕ್ಸ್‌ ಸುಮಾರು ಶೇಕಡ 85ಕ್ಕೂ ಹೆಚ್ಚಿನ ಏರಿಕೆ ಕಂಡಿದೆ. ಇದಕ್ಕೆ ಮಿಡ್‌ ಕ್ಯಾಪ್‌ ಮತ್ತು ಸ್ಮಾಲ್‌ ಕ್ಯಾಪ್‌ ಗಳೇನು ಹೊರತಲ್ಲ. ಈಗಿನ ರಭಸದ ಏರಿಕೆಯು ಕೇವಲ ಸಾಂಕೇತಿಕವೆನ್ನುವಷ್ಟಾಗಿದೆ. ಕಾರಣ ಕೇವಲ ಪೇಟೆಯೊಳಗೆ ಹರಿದುಬರುತ್ತಿರುವ ಹಣವೇ ಈ ಏರಿಕೆಗೆ ಮೂಲವಾಗಿದ್ದು ಅದಕ್ಕನುಗುಣವಾಗಿ ವಿಶ್ಲೇ಼ಷಣೆಗಳು ಹೊರಹೊಮ್ಮುತ್ತಿವೆ. ಈ ರೀತಿಯ ವಾತಾವರಣದಲ್ಲಿ ಸಣ್ಣಹೂಡಿಕೆದಾರರು / ರೀಟೇಲ್‌ ಹೂಡಿಕೆದಾರರು ಅಂತಹ ಹಿಡಿತಕ್ಕೊಳಗಾಗದೆ ಎಚ್ಚರದಿಂದ ಚಟುವಟಿಕೆ ನಿರ್ವಹಿಸಬೇಕು.

ಬೊರೊಸಿಲ್‌ ರಿನ್ಯೂವಬಲ್ಸ್‌ ಲಿಮಿಟೆಡ್‌ ಕಂಪನಿಯ ಷೇರಿನ ಬೆಲೆಯು ಕಳೆದ ಮಾರ್ಚ್‌ ತಿಂಗಳಲ್ಲಿ ರೂ.28 ರಲ್ಲಿತ್ತು. ಡಿಸೆಂಬರ್‌ ತಿಂಗಳಲ್ಲಿ ಎರಡನೇ ವಾರದಲ್ಲಿ ರೂ.127 ರ ಸಮೀಪಕ್ಕೆ ಚೇತರಿಸಿಕೊಂಡಿತು. ಆ ಸಂದರ್ಭದಲ್ಲಿ ಕಂಪನಿಯು ಪ್ರತಿ ರೂ.1 ರ ಮುಖಬೆಲೆಯ ಷೇರನ್ನು ರೂ.133.19 ರಲ್ಲಿ ಕ್ವಾಲಿಫೈಡ್‌ ಇನ್ಸ್ಟಿಟ್ಯೂಷನ್‌ ಪ್ಲೇಸ್ಮೆಂಟ್‌ ಮಾಡಲು ನಿರ್ಧರಿಸಿತ್ತಾದರೂ ಅಂತಿಮವಾಗಿ ರೂ.126.55 ರಂತೆ ಡಿಸ್ಕೌಂಟ್‌ ನಲ್ಲಿ ವಿತರಿಸಿತು. ಪ್ರತಿ ಷೇರಿಗೆ ರೂ.126.55 ರಂತೆ ವಿತರಿಸಿದ ನಂತರ ಷೇರಿನ ಬೆಲೆಯಲ್ಲಿ ನವಚೇತನ ಉಂಟಾಗಿ ದಿನೇ ದಿನೇ ಏರಿಕೆ ಕಂಡು ರೂ.323 ನ್ನು ವರ್ಷಾಂತ್ಯದ ದಿನ ದಾಖಲಿಸಿತು.

ಆದರೆ 2021 ರ ಆರಂಭದ ದಿನವೇ ಕುಸಿತದಿಂದ ಕೆಳಗಿನ ಆವರಣ ಮಿತಿಯನ್ನು ತಲುಪಿತು. ಸೋಜಿಗವೆಂದರೆ ಏರುಗತಿಯಲ್ಲಿ ಡಿಸೆಂಬರ್‌ 23 ರಂದು 223 ರೂಪಾಯಿಗಳಲ್ಲಿ ಸುಮಾರು 8 ಲಕ್ಷ ಷೇರುಗಳು, 24 ರಂದು 7.63 ಲಕ್ಷ ಷೇರುಗಳ ವಹಿವಾಟು ಪ್ರದರ್ಶಿಸಿದ ಈ ಷೇರು ಡಿಸೆಂಬರ್‌ 30 ರಂದು 8 ಲಕ್ಷಕ್ಕೂ ಹೆಚ್ಚಿನ ಷೇರು, 31 ರಂದು 7.99 ಲಕ್ಷ ಷೇರುಗಳ ವಹಿವಾಟು ಪ್ರದರ್ಶಿಸದ ನಂತರ ಹೊಸ ವರ್ಷದ ಆರಂಭದ ದಿನ ನಡೆದ 23 ಸಾವಿರ ಷೇರಿನ ವಹಿವಾಟಿಗೆ ನೆಲಕಚ್ಚಿದೆ. ಕೇವಲ ಒಂದೇ ವಾರದಲ್ಲಿ ಷೇರು ಅಸಹಜ ಚಟುವಟಿಕೆಗೆ ಗುರಿಯಾಗಿರುವುದು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.

ಅತ್ಯಧಿಕ ಪ್ರಮಾಣದ ಡಿವಿಡೆಂಡ್‌ ವಿತರಿಸಿದ ಕಂಪನಿ

ಮೆಜೆಸ್ಕೊ ಷೇರು ಪ್ರತಿ ಷೇರಿಗೆ ರೂ.974 ರಂತೆ ಡಿವಿಡೆಂಡ್‌ ನ್ನು ಘೋಷಿಸಿತು. ಷೇರಿನ ಬೆಲೆಯೂ ರೂ.970 ರಲ್ಲಿದ್ದರೂ ಅದು ಬೇಡ ನನಗೆ ಏಕೆಂದರೆ ಆ ಲಾಭಾಂಶದ ಮೇಲೆ ಆದಾಯ ತೆರಿಗೆಯನ್ನು ಪಾವತಿಸಬೇಕಾಗುತ್ತದೆ ಎಂದು ಹೂಡಿಕೆದಾರರು ಹೆದರಿದರು. ಆದರೆ ಕಂಪನಿಯು ಪ್ರಕಟಿಸಿದಂತೆ ನಿಖರವಾಗಿ ಡಿಸೆಂಬರ್‌ ಅಂತ್ಯದೊಳಗೆ ಲಾಭಾಂಶವನ್ನು ವಿತರಿಸಿದೆ. ಈ ಸಂದರ್ಭದಲ್ಲಿ ಕಂಪನಿಯು ತನ್ನ ಮುಂದಿನ ಚಟುವಟಿಕೆಯ ಮುನ್ನೋಟವನ್ನು ಸಹ ಪ್ರಕಟಿಸಿದ್ದರೂ ಪೇಟೆಯಲ್ಲಿ ಬೆಂಬಲ ದೊರೆಯಲಿಲ್ಲ.

ಈ ಕಂಪನಿಯಲ್ಲಿ ವಿದೇಶಿ ವಿತ್ತೀಯ ಸಂಸ್ಥೆಗಳು ಜೂನ್‌ ಅಂತ್ಯದ ತ್ರೈಮಾಸಿಕದಲ್ಲಿ ಶೇ.13.05 ರಷ್ಟಿದ್ದು, ಸೆಪ್ಟೆಂಬರ್‌ ಅಂತ್ಯದ ತ್ರೈಮಾಸಿಕದಲ್ಲಿ ಅದು ಶೇ.15.20 ಕ್ಕೆ ಏರಿಕೆ ಕಂಡಿದೆ. ಶೇ.4.1 ರಷ್ಠು ಪ್ರವರ್ತಕರ ಭಾಗಿತ್ವವು ಪ್ಲೆಡ್ಜ್‌ ಆಗಿದ್ದರೂ ಸಹ ಈ ಪ್ರಮಾಣದ ಡಿವಿಡೆಂಡ್‌ ನೀಡಿರುವುದು ಉತ್ತಮವಾದ ಬೆಳವಣಿಗೆಯಾಗಿದೆ. ಕಾರ್ಪೊರೇಟ್‌ ಫಲಗಳ ಬಗ್ಗೆ ಹೆಚ್ಚು ಆದ್ಯತೆ ಇಲ್ಲದ ಈಗಿನ ದಿನಗಳಲ್ಲಿ‌ ಅತ್ಯಧಿಕ ಪ್ರಮಾಣದ ಡಿವಿಡೆಂಡ್‌ ವಿತರಿಸಿದ ಕಂಪನಿ ಎಂಬ ಕಾರ್ಪೊರೇಟ್ ದಾಖಲೆಯನ್ನು ನಿರ್ಮಿಸಿದ ಕಂಪನಿ ಇದಾಗಿದೆ. ಡಿಸೆಂಬರ್‌ ಮದ್ಯಂತರದಿಂದಲೂ ಎಕ್ಸ್‌ ಚೇಂಜ್‌ ನಲ್ಲಿ ನಡೆದ ಗಜಗಾತ್ರದ ವಹಿವಾಟುಗಳನ್ನು ಗಮನಿಸಿದಾಗ ಪ್ರವರ್ತಕರು ತಮ್ಮ ಭಾಗಿತ್ವದ ಭಾಗವನ್ನು ಪುನರ್ವಿಂಗಡನೆ ಮಾಡಿದ್ದಾರೆ. ಈ ಕ್ರಮ ಆದಾಯ ತೆರಿಗೆಯ ಯೋಜನೆಯ ಲಾಭ ಪಡೆಯಲೂ ಇರಬಹುದು. ಈ ಗಜಗಾತ್ರದ ವಹಿವಾಟುಗಳಲ್ಲಿ ಗಿಫ್ಟ್‌ ಗಳ ಮೂಲಕವೂ ಹಲವಾರು ವಹಿವಾಟುಗಳು ದಾಖಲೆಯಾಗಿದೆ. ಇದು ಕಂಪನಿಯ ಪ್ರವರ್ತಕರ ಭಾವನೆಗೆ ಹಿಡಿದ ಕನ್ನಡಿಯಾಗಿದೆ.

ಈ ಸಂದರ್ಭದಲ್ಲಿ ಕಾನೂನಾತ್ಮಕ ತೊಡಕುಗಳು ಹೇಗೆ ಕಂಪನಿಗಳನ್ನು ತೊಂದರೆಗೆ ದೂಡಬಹುದು ಎಂಬುದಕ್ಕೆ ಈ ಕೆಳಗಿನ ನಿದರ್ಶನದಿಂದ ತಿಳಿಯಿರಿ.

2008 ರ ಡಿಸೆಂಬರ್‌ ತಿಂಗಳ 16 ರಂದು ಅಂದಿನ ತಾಂತ್ರಿಕ ವಲಯದ ದಿಗ್ಗಜ ಕಂಪನಿಯಾಗಿದ್ದ ಸತ್ಯಂ ಕಂಪ್ಯೂಟರ್‌ ಕಂಪನಿಯ ಪ್ರವರ್ತಕರು ತೆಗೆದುಕೊಂಡ ಒಂದು ಜಾರಿಗೊಳಿಸಲಾಗದ ನಿರ್ಧಾರದಿಂದ ಮಾರನೆದಿನ ಷೇರಿನ ಬೆಲೆ ರೂ.222 ರಿಂದ 113 ರವರೆಗೂ ಕುಸಿಯಿತು. ಈ ಭರ್ಜರಿ ಕುಸಿತದ ಕಾರಣ ಕಂಪನಿಯು ಕಾರ್ಪೋರೇಟ್‌ ನೀತಿಪಾಲನೆಯಲ್ಲಿ ಲೋಪವೆಸಗಿದೆ ಎಂಬ ಭಾವನೆಯಾಗಿದೆ. ಕುಸಿತದ ಹಿಂದಿನ ದಿನ ಕಂಪನಿಯ ಪ್ರವರ್ತಕರು ಶೇ.8.27 ರಷ್ಟರ ಭಾಗಿತ್ವವನ್ನು ಹೊಂದಿದ್ದರು. ಅದನ್ನು ಸಂಪೂರ್ಣವಾಗಿ ಒತ್ತೆಇಟ್ಟು ಸಾಲಪಡೆದಿದ್ದರು. ಷೇರಿನಬೆಲೆ ಭಾರಿ ಕುಸಿತಕ್ಕೊಳಗಾದ ಕಾರಣ ಫೈನಾನ್ಶಿಯರ್ಸ್‌ ಒತ್ತೆ ಇಟ್ಟ ಭಾಗಕ್ಕೆ ಮಾರ್ಜಿನ್‌ ಹಣ ತುಂಬಲು ಪ್ರವರ್ತಕರು ವಿಫಲಗೊಂಡಕಾರಣ ಒತ್ತೆ ಇಟ್ಟ ಷೇರಿನಲ್ಲಿ ಸ್ವಲ್ಪ ಭಾಗವನ್ನು ಫೈನಾನ್ಶಿಯರ್ಸ್‌ ಮಾರಾಟಮಾಡಲೇಬೇಕಾಯಿತು. ಇದರ ಫಲವಾಗಿ ಪ್ರವರ್ತಕರ ಭಾಗಿತ್ವವು ಶೇ.8.27 ರಿಂದ ಶೇ.4.4 ಕ್ಕೆ ಕುಸಿಯಿತು. ಈ ಬೆಳವಣಿಗೆಯು ಮಾರ್ಕೆಟ್‌ ರೆಗ್ಯುಲೇಟರ್‌ ʼಸೆಬಿʼ ತಕ್ಷಣ ಕಾರ್ಯಪ್ರವೃತ್ತವಾಗಿ, ಕಂಪನಿಗಳು ತಮ್ಮ ಪ್ರವರ್ತಕರು ಒತ್ತೆ ಇಟ್ಟ ಭಾಗಿತ್ವವನ್ನು ಪ್ತತಿ ತ್ರೈಮಾಸಿಕದಲ್ಲೂ ಪ್ರಕಟಿಸಬೇಕೆಂಬ ಪ್ರಮುಖ ನಿಯಮವನ್ನು ಜಾರಿಗೊಳಿಸಿತು.

2020 ರಲ್ಲಿ ಮೆಜೆಸ್ಕೊ ಕಂಪನಿಯ ಪ್ರವರ್ತಕರು ಶೇ.36.77 ರಷ್ಟರ ಭಾಗಿತ್ವವನ್ನು ಹೊಂದಿದ್ದಾರೆ. ಅದರಲ್ಲಿ ಶೇ.4.1 ರಷ್ಟು ಒತ್ತೆ ಇಡಲಾಗಿದೆ. ಈಗಿನ ಪರಿಸ್ಥಿತಿಯಲ್ಲಿ ಷೇರಿನ ಬೆಲೆ ರೂ.980 ರ ಸಮೀಪದಿಂದ ರೂ.15 ರ ಸಮೀಪಕ್ಕೆ ಕುಸಿದಾಗ ಫೈನಾನ್ಶಿಯರ್ಸ್‌ ಗೆ ಸಹಜವಾಗಿ ಭಾರಿ ಪ್ರಮಾಣದ ಮಾರ್ಜಿನ್‌ ಹಣ ತುಂಬಬೇಕಾಗಿರುತ್ತದೆ. ಅಥವಾ ಬಂದ ಡಿವಿಡೆಂಡ್‌ ಹಣದಿಂದ ಒತ್ತೆ ಇಟ್ಟ ಷೇರುಗಳನ್ನು ಬಿಡಿಸಿಕೊಂಡಿರಲೂ ಬಹುದು. ಆದರೆ ಈ ರೀತಿ ಷೇರುದಾರರಿಗೆ ಗಜಗಾತ್ರದ ಡಿವಿಡೆಂಡ್‌ ನ್ನು ವಿತರಿಸಿದಾಗ ಲಿಸ್ಟಿಂಗ್‌ ಆದ ಸ್ಟಾಕ್‌ ಎಕ್ಸ್‌ ಚೇಂಜ್‌ ಗಳು ವಿಧಿಸಿದ ಸರ್ಕ್ಯುಟ್‌ ಫಿಲ್ಟರ್ಗಳನ್ನು ಸಡಿಲಗೊಳಿಸಲೇಬೇಕು. ಐ ಪಿ ಒ ಗಳು ಲೀಸ್ಟಿಂಗ್‌ ಆದ ಮೊದಲ ದಿನ ಹೇಗೆ ಮಾರ್ಕೆಟ್‌ ಗಳು ಅವುಗಳ ಬೆಲೆ ನಿಗದಿಪಡಿಸುತ್ತವೆಯೋ ಅದೇ ರೀತಿಯ ವ್ಯವಸ್ಥೆ ಇದ್ದಲ್ಲಿ ನ್ಯಾಯಸಮ್ಮತವಾಗುತ್ತದೆ. ಈಗಿನ ಪದ್ದತಿಯಲ್ಲಿ ಆರೋಗ್ಯವಾಗಿರುವ ಕಂಪನಿಗಳೂ ಆಪತ್ತಿಗೊಳಗಾಗುವ ಸಾಧ್ಯತೆಗಳು ಉದ್ಭವವಾಗಬಹುದು.

ಷೇರುಪೇಟೆಯು ವಿಸ್ಮಯಕಾರಿ ಎಂಬುದು ಹಿಂದಿನಿಂದ ಬಂದ ನಂಬಿಕೆಯಾಗಿದೆ. ಆದರೆ ಈಗಿನ ದಿನಗಳಲ್ಲಿ ಅದು ವಿಸ್ಮಯಕಾರಿ ವ್ಯವಹಾರಿಕ ವ್ಯವಸ್ಥೆಯಾಗಿದೆ. ಕೆಲವು ಕಂಪನಿಗಳು ಅಲ್ಪಕಾಲದಲ್ಲೇ ಅಪಾರ ಲಾಭಗಳಿಸಿಕೊಡುವ ಸಾಧ್ಯತೆಯನ್ನು ಒದಗಿಸುತ್ತವೆ. ಹಾಗಂತ ಎಲ್ಲಾ ಕಂಪನಿಗಳೂ ಲಾಭದಾಯಕ ಎಂಬ ಕಲ್ಪನೆ ಬೇಡ. ಸದ್ಯ ಸೆನ್ಸೆಕ್ಸ್‌, ನಿಫ್ಟಿ, ಮತ್ತು ವಿವಿಧ ಉಪ ಸೂಚ್ಯಂಕಗಳೂ ಗರಿಷ್ಠಮಟ್ಟಕ್ಕೆ ಜಿಗಿತ ಕಂಡಿದ್ದರೂ ಕೆಲವು ಪ್ರಮುಖ ಕಂಪನಿಗಳು ಕೆಲವು ವರ್ಷಗಳ ಹಿಂದಿನ ಬೆಲೆಯನ್ನು ತಲುಪಲು ಸಾಧ್ಯವಾಗಿಲ್ಲ.

ಅರವಿಂದ್‌ ಲಿಮಿಟೆಡ್‌ 2019 ರ ಜನವರಿಯಲ್ಲಿ ಸುಮಾರು ರೂ.100 ರಲ್ಲಿದ್ದು ಈಗ ರೂ.48 ರ ಸಮೀಪದಲ್ಲೇ ಇದೆ.

ಕೆನರಾ ಬ್ಯಾಂಕ್‌ 2020 ರ ಜನವರಿಯಲ್ಲಿ ಸುಮಾರು ರೂ.200 ಕ್ಕೂ ಹೆಚ್ಚಿದ್ದು ಈಗ ರೂ.133 ರ ಸಮೀಪದಲ್ಲಿದೆ.

ಕ್ಯಾಸ್ಟ್ರಾಲ್‌ 2018 ರ ಆಗಸ್ಟ್‌ ನಲ್ಲಿ ಸುಮಾರು ರೂ.170 ರಲ್ಲಿತ್ತು ಈಗ ರೂ.122 ರ ಸಮೀಪದಲ್ಲಿದೆ.

ಕೋಲ್‌ ಇಂಡಿಯಾ 2018 ರ ಡಿಸೆಂಬರ್‌ ನಲ್ಲಿ ರೂ.250 ರ ಸಮೀಪವಿತ್ತು ಈಗ ರೂ.135 ರ ಸಮೀಪದಲ್ಲಿದೆ.

ಗೋವಾ ಕಾರ್ಬನ್‌ 2018 ರ ಏಪ್ರಿಲ್‌ ನಲ್ಲಿ ರೂ.1,000 ಕ್ಕೂ ಹೆಚ್ಚಿತ್ತು ಈಗ ಕೇವಲ ರೂ.280 ರ ಸಮೀಪದಲ್ಲಿದೆ.

ಲಾ ಒಪಾಲಾ ಆರ್‌ ಜಿ ಕಂಪನಿ ಷೇರಿನ ಬೆಲೆ 2018 ರ ಏಪ್ರಿಲ್‌ ನಲ್ಲಿ ರೂ.290 ರಲ್ಲಿತ್ತು ಆದರೆ ಈಗ ಅದು ರೂ.235 ರ ಸಮೀಪವಿದೆ.

ರೇನ್‌ ಇಂಡಸ್ಟೃೀಸ್‌ 2018 ರ ಮೇ ನಲ್ಲಿ ರೂ.315 ರ ಸಮೀಪದಲ್ಲತ್ತು, ಈಗ ರೂ.144 ರ ಸಮೀಪದಲ್ಲಿದೆ.

ಎಸ್‌ ಎಂ ಎಲ್‌ ಇಸುಜು ಎಂಬ ಕಂಪನಿ 2017 ರ ಏಪ್ರಿಲ್‌ ನಲ್ಲಿ ರೂ.1,040 ರಲ್ಲಿದ್ದು, ಈಗ ರೂ.475 ರ ಸಮೀಪದಲ್ಲೇ ಇದೆ.

ಸ್ಟರ್ಲೈಟ್‌ ಟೆಕ್ನಾಲಜೀಸ್‌ ಕಂಪನಿ ಷೇರಿನ ಬೆಲೆ ಮಾರ್ಚ್‌ 2019 ರಲ್ಲಿ ರೂ.215 ರ ಸಮೀಪವಿದ್ದು ಈಗ ರೂ.180 ಸಮೀಪವಿದೆ.

ಟಾಟಾ ಮೋಟಾರ್ಸ್‌ ಸೆಪ್ಟೆಂಬರ್‌ 2015 ರಲ್ಲಿ ರೂ.290 ರಲ್ಲಿತ್ತು, ಆದರೆ ಈಗ ರೂ.185 ರ ಸಮೀಪದಲ್ಲಿದೆ.

ಈಕ್ವಿಟಾಸ್‌ ಹೋಲ್ಡಿಂಗ್ಸ್‌ ಕಂಪನಿ ಷೇರಿನ ಬೆಲೆ ಮಾರ್ಚ್‌ 2017 ರಲ್ಲಿ 160 ರ ಸಮೀಪವಿತ್ತು, ಆದರೆ ಈಗ ರೂ.68 ರ ಸಮೀಪವಿದೆ.

ಆದಿತ್ಯ ಬಿರ್ಲಾ ಕ್ಯಾಪಿಟಲ್‌ ಕಂಪನಿ ಷೇರಿನ ಬೆಲೆ ಡಿಸೆಂಬರ್‌ 2017 ರಲ್ಲಿ ರೂ.185 ರ ಸಮೀಪವಿತ್ತು ಈಗ ರೂ.90 ರ ಸಮೀಪವಿದೆ.

ಗ್ಲೆನ್‌ ಮಾರ್ಕ್‌ ಫಾರ್ಮ ಷೇರಿನ ಬೆಲೆ ಏಪ್ರಿಲ್‌ 2019 ರಲ್ಲಿ ರೂ.650 ರಲ್ಲಿದ್ದು ಈಗ ರೂ.500 ರ ಸಮೀಪವಿದೆ.

ಮೇಲಿನ ಕಂಪನಿಗಳು ಕೇವಲ ವಾಸ್ತವದ ಪರಿಚಯಕ್ಕಾಗಿ ನೀಡಲಾಗಿದೆಯೇ ಹೊರತು ಯಾವುದೇ ಶಿಫಾರಸು, ಅಥವಾ ಚಟುವಟಿಕೆಗೆ ಪ್ರೇರಣೆಯಿಂದಲ್ಲ.

ಚಟುವಟಿಕೆಗೆ ಮುನ್ನ ಅರಿತು ನಿರ್ಧರಿಸಿರಿ. ಹೊಸ ವರ್ಷದಲ್ಲಿ ಆರ್ಥಿಕ ಸಾಕ್ಷರತಯನ್ನು ಬೆಳೆಸಿಕೊಂಡು ಉತ್ತಮ ಭವಿಷ್ಯವನ್ನು ರೂಪಿಸಿಕೊಳ್ಳುವ ಸಾಮರ್ಥ್ಯವನ್ನು ಹೆಚ್ಚಿಸಿಕೊಳ್ಳೋಣ.