ಸಂಖ್ಯೆಯಲ್ಲಿ ಅಡಗಿದೆ ಬ್ರಹ್ಮಾಂಡದ ಸೂತ್ರ;2021ರಲ್ಲಿ ಏನೆಲ್ಲಾ ಇದೆ ಗೊತ್ತಾ

ಬೆಂಗಳೂರು ಮೂಲದ ಗಣಿತಜ್ಞ ಕೆ. ವಿ ನಾರಾಯಣ ಹೊಸ ವರ್ಷ 2021 ರ ಸಂಖ್ಯೆಯಲ್ಲಿನ ಕೆಲವು ಸೋಜಿಗಗಳನ್ನು ಪತ್ತೆ ಮಾಡಿದ್ದಾರೆ.

2021 ಎನ್ನುವುದು 21ನೇ ಶತಮಾನದ 21ನೇ ವರ್ಷ. ಅಧಿಕ ವರ್ಷವಲ್ಲದ 2021 ಶುಕ್ರವಾರದಂದು ಆರಂಭವಾಗಿ ಶುಕ್ರವಾರವೇ ಮುಕ್ತಾಯವಾಗುತ್ತದೆ.

2021ರ ಕ್ಯಾಲೆಂಡರ್ ಮತ್ತು 2010ರ ಕ್ಯಾಲೆಂಡರ್ ಒಂದೇ ರೀತಿ. ಯಾವುದೇ ಬದಲಾವಣೆ ಇಲ್ಲ.ಇದೇ ಕ್ಯಾಲೆಂಡರ್ 2027 ಮತ್ತು 21 ನೇ ಶತಮಾನದ ಕೊನೆಯ ವರ್ಷವಾದ 2100 ರಲ್ಲಿ ಪುನರಾವರ್ತನೆಯಾಗುತ್ತದೆ.

2021 ಎರಡು ಅವಿಭಾಜ್ಯ ಸತತ ಸಂಖ್ಯೆಗಳಾದ 43 ಮತ್ತು 47 ರ ಗುಣಕಾರದಿಂದ ಉತ್ಪನ್ನವಾಗುವ ಸಂಖ್ಯೆ. ಅದೇ ರೀತಿ 2021 ಭಾಗವಾಗುವುದು 1,43,47 ಮತ್ತು 2021ರಿಂದಲೇ. ಈ ನಾಲ್ಕನ್ನು ಸೇರಿಸಿದರೆ 2112 ಆಗುತ್ತದೆ. ಈ 2112 ಸಂಖ್ಯೆಯ ಚಮತ್ಕಾರ ನೋಡಿ ಅದನ್ನು ಹೇಗೆ ಓದಿದರು 21 – 21ಆಗುತ್ತದೆ. ಇಂಗ್ಲಿಷಿನಲ್ಲಿ ಇಂಥ ಸಂಖ್ಯೆಯನ್ನು palindrome numbers ಎನ್ನುತ್ತಾರೆ.

ಪ್ರಖ್ಯಾತ ಗಣಿತಜ್ಞ,ಗ್ರೀಕ್ ತತ್ವಜ್ಞಾನಿ ಫೈಥಾಗೋರಸ್ ನ ಮೇಲೆ ಕೆ. ವಿ .ನಾರಾಯಣ ಅವರಿಗೆ ತುಂಬು ಅಭಿಮಾನ. ಬ್ರಹ್ಮಾಂಡದ ಕಲ್ಪನೆ ಅಡಗಿರುವದೆ ಸಂಖ್ಯೆಯಲ್ಲಿ ಎಂಬ ಫೈಥಾಗೋರಸ್ ನ ಮಾತನ್ನು ನಾರಾಯಣ ಉಲ್ಲೇಖಿಸುತ್ತಾರೆ. ಎಲ್ಲವೂ ಸಂಖ್ಯೆಯ ಮೇಲೆ ಅವಲಂಬಿತ. ಬ್ರಹ್ಮಾಂಡದ ಸೂತ್ರವೆ ನಂಬರ್ ಎನ್ನುತ್ತಾರೆ ಅವರು.

ಮೂವತ್ತೈದು ವರ್ಷಗಳ ಕಾಲ ಬೆಂಗಳೂರಿನ ಪ್ರತಿಷ್ಠಿತ ಕಾಲೇಜುಗಳಲ್ಲಿ ಗಣಿತ ಬೋಧಿಸಿದ್ದ ನಾರಾಯಣ ಅವರಿಗೆ ಗಣಿತದ ಮೇಲೆ ಪ್ರಾಣ. ಅವಿಭಾಜ್ಯ ಸಂಖ್ಯೆಗಳ ಮೇಲೆ ಪುಸ್ತಕವನ್ನು ಕೂಡ ಬರೆದಿದ್ದಾರೆ. ಪ್ರತಿ ಹೊಸ ವರ್ಷದಲ್ಲೂ ಅದರ ಸಂಖ್ಯೆಯಲ್ಲಿ ಅಡಗಿರುವ ಚಮತ್ಕಾರಗಳನ್ನು ಅಧ್ಯಯನ ಮಾಡಿ ಅದನ್ನು ಸಾರ್ವಜನಿಕರ ಮುಂದಿಡುತ್ತಾ ಬಂದಿದ್ದಾರೆ.

Photo by Vladislav Murashko from Pexels