ಜನವರಿ 16ರಿಂದ ಗೋವಾದಲ್ಲಿ ಆರಂಭವಾಗಲಿರುವ 51ನೇ ಅಂತಾರಾಷ್ಟ್ರೀಯ ಚಿತ್ರೋತ್ಸವದ -IFFI- ಉದ್ಘಾಟನಾ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಉಪಸ್ಥಿತರಿರುವ ಗೌರವಕ್ಕೆ ಕನ್ನಡದ ಸುಪ್ರಸಿದ್ಧ ನಟ ಕಿಚ್ಚ ಸುದೀಪ್ ಪಾತ್ರರಾಗಿದ್ದಾರೆ. ಬಹುಶಃ ಈ ಗೌರವ ಪಡೆದ ಮೊದಲ ಕನ್ನಡ ನಟ ಸುದೀಪ್ .
ಈ ಬಾರಿಯ ಚಿತ್ರೋತ್ಸವ ಭೌತಿಕ ಪ್ರದರ್ಶನದ ಜೊತೆ OTTಯಲ್ಲೂ ಪ್ರಸಾರವಾಗಲಿದೆ. ಮಾಸ್ಟರ್ ಕ್ಲಾಸಸ್ ಮತ್ತು ಮಾತು ಕಥೆಗಳು ಚಿತ್ರೋತ್ಸವದ OTTಯಲ್ಲಿ ಪ್ರಸಾರ ಕಾಣಲಿವೆ.
ಈ ಬಾರಿ 119 ಚಿತ್ರಗಳು ಪ್ರಸಾರ ಕಾಣಲಿದ್ದು ಅದರಲ್ಲಿ 85 ಚಿತ್ರಗಳು ಚಿತ್ರೋತ್ಸವದ ಪ್ರೀಮಿಯರ್. ಕೇಂದ್ರ ವಾರ್ತಾ ಮತ್ತು ಪ್ರಸಾರ ಖಾತೆ ಸಚಿವ ಪ್ರಕಾಶ್ ಜಾವಡೇಕರ್ ನಾಳೆ ಪಣಜಿಯ ಶ್ಯಾಮ್ ಪ್ರಸಾದ್ ಮುಖರ್ಜಿ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆಯುವ ಸಮಾರಂಭದಲ್ಲಿ ಉಪಸ್ಥಿತರಿರುತ್ತಾರೆ.
ಲಿಂಗದೇವರು ಅಭಿನಂದನೆ : ಚಿತ್ರೋತ್ಸವದ ಮುಖ್ಯ ಅತಿಥಿಯ ಗೌರವಕ್ಕೆ ಪಾತ್ರರಾದ ನಟ ಸುದೀಪ್ ಅವರನ್ನು ಕಳೆದ ಬಾರಿಯ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಆಯ್ಕೆ ಸಮಿತಿ ಸದಸ್ಯ ಮತ್ತು ಹೆಸರಾಂತ ನಿರ್ದೇಶಕ ಬಿ ಎಸ್ ಲಿಂಗದೇವರು ಅಭಿನಂದಿಸಿದ್ದಾರೆ.
