ಮೆಳೇಹಳ್ಳಿ ದೇವರಾಜ್
ಮನುಷ್ಯನ ಶಬ್ದ ಪ್ರಪಂಚದ ಆಚೆಗಿನ ದಿನಗಳಲ್ಲಿ ಸಂವಹನ ಆಂಗಿಕವಾಗಿತ್ತು,ಅಂದರೆ ಅಭಿನಯವೇ ಆಗಿತ್ತು. ಪ್ರಾಕೃತಿಕ ಬದಲಾವಣೆ ವಿಸ್ಮಯಗಳನ್ನ ಇಡೀ ಸಮೂಹ ಅಭಿನಯಿಸಿ ತೋರಿಸುತಿತ್ತು. ಕಾಲಾಂತರದಲ್ಲಿ ನೋಡುವ-ಆಡುವ ಎಂಬ ವರ್ಗೀಕರಣವಾಗಿ ನಂತರದಲ್ಲಿ ಬಿಡುವಿನ ವೇಳೆಯಲ್ಲಿ ಬೇಸರ ಕಳೆಯುವ ಸಾಧನವಾಯಿತು.
ಜಗತ್ತಿನಲ್ಲಿ ಎಲ್ಲಾ ಮನುಷ್ಯ ಜೀವಿಯು ರಂಗಭೂಮಿ ಬಾಂಧವ್ಯ ಹೊಂದಿದ್ದಾರೆ, ಮನುಷ್ಯ ತಾನು ಊಟ ಮಾಡುವ ತಟ್ಟೆ, ವಾಸಿಸುವ ಮನೆ, ತೊಡುವ ಉಡುಗೆ ಸುಂದರವಾಗಿರಬೇಕೆಂದು ಬಯಸುತ್ತಾನೆ. ಬದುಕಿನ ಈ ಸೌಂದರ್ಯ ಪ್ರಜ್ಞೆಯು ರಂಗದ ಬಂಧವನ್ನ ಸೂಚಿಸುತ್ತದೆ.
ಸ್ಥಳ, ಆಚರಣೆ, ಸಂಪ್ರದಾಯ, ಕಾಲಗಳಿಗೆ ತಕ್ಕಂತೆ ಹೊಸ ಹೊಸ ಪ್ರಕಾರಗಳು ಹುಟ್ಟಿಕೊಳ್ಳುತ್ತ ಕರ್ನಾಟಕ ರಂಗಸಂಪತ್ತಿನ ಸಮೃದ್ಧ ಕ್ಷೇತ್ರವಾಯಿತು. ಇಂದಿಗೂ ಕೂಡ ಜನಪದ ರಂಗಭೂಮಿಯಲ್ಲಿ ಕರ್ನಾಟಕವೇ ಮೊದಲು.
ಆಧುನಿಕವಾಗಿಯೂ ಎಲ್ಲಾ ರಾಜ್ಯಗಳಿಗಿಂತ ಹೆಚ್ಚು ರಂಗ ತರಬೇತಿ ಶಾಲೆಗಳನ್ನು ಕರ್ನಾಟಕ ಹೊಂದಿದೆ. ಆರು ರಂಗಾಯಣ ಕಾರ್ಯ ನಿರ್ವಹಿಸುತ್ತಿವೆ ಎರಡು ನಿರ್ಮಾಣ ಹಂತದಲ್ಲಿವೆ . ಪ್ರತಿ ದಿನ ಹೊಸ ಕಲಾವಿದ, ಹೊಸ ರಂಗ ಪಠ್ಯ, ಹೊಸ ರಂಗ ಪ್ರಯೋಗ ಸಿದ್ದಗೊಳ್ಳತ್ತಲೇ ಇವೆ. ಅಂತಾರಾಷ್ಟ್ರೀಯವಾಗಿ ಭಾರತವನ್ನು ಪ್ರತಿನಿಧಿಸುವಷ್ಟು ಶ್ರೀಮಂತವಾಗಿದೆ ಕನ್ನಡ ರಂಗಭೂಮಿ.
ರಂಗಭೂಮಿ ದಿನ
ಎಲ್ಲಾ ಕ್ಷೇತ್ರಗಳಲ್ಲಿ ವಿಶೇಷ ದಿನಗಳಂತೆ ರಂಗಭೂಮಿಗೂ ಒಂದು ವಿಶೇಷ ದಿನ ಬೇಕು ಎಂದು ಇಂಟರ್ ನ್ಯಾಷನಲ್ ಥಿಯೇಟರ್ ಇನ್‌ಸ್ಟಿಟ್ಯೂಟ್ ಪ್ರತಿ ವರ್ಷವೂ ಮಾರ್ಚ್ 27ರ ದಿನವನ್ನು ಅಂತಾರಾಷ್ಟ್ರೀಯ ರಂಗಭೂಮಿ ದಿನವಾಗಿ ಘೋಷಿಸಿತು. ಈ ದಿನ ವಿಶ್ವದ ಪ್ರಸಿದ್ಧ ರಂಗ ತಜ್ಞರನ್ನು ಆಯ್ಕೆ ಮಾಡಿ ರಂಗ ಸಂದೇಶ ನೀಡಿಸುವ ಪರಿಪಾಠ ಇದೆ. ಈ ವರ್ಷ ವಿಶೇಷವಾಗಿ ರಂಗನಟಿಗೆ ಈ ಅವಕಾಶ ದೊರೆತಿದೆ. ಯುನೈಟೆಡ್ ಕಿಂಗ್ಡಮ್ ನ ಹೆಲೆನ್ ಮಿರ್ರೇನ್ ರಂಗ ಸಂದೇಶ ನೀಡಿದ್ದಾರೆ.
ಸಾಕಷ್ಟು ಸವಾಲುಗಳು
ನಮ್ಮ ಮುಂದೆ ಸವಾಲುಗಳು ಸಾಕಷ್ಟು ಇವೆ. ರಂಗ ತರಬೇತಿ ಪಡೆದ ಕಲಾವಿದರ ದುಡಿಸಿಕೊಳ್ಳಬೇಕು. ಜಿಲ್ಲೆಗೊಂದು ರಂಗಾಯಣ ಆಗಬೇಕು. ಹಿರಿಯ ಕಲಾವಿದರ ಮಾಸಾಶನ ಹೆಚ್ಚಬೇಕು,ತಾಲ್ಲೂಕಿಗೊಂದು ರಂಗಮಂದಿರ ಬೇಕು. ಜಿಲ್ಲಾ ರಂಗಮಂದಿರಗಳ ನಿರ್ವಹಣೆ ಸಮರ್ಪಕವಾಗಬೇಕು. ರಾಜ್ಯದ ಎಲ್ಲಾ ರಂಗಮಂದಿರಗಳು ಏಕರೂಪ ಬಾಡಿಗೆ ಇರಬೇಕು. ಹೀಗೆ ಬೇಕುಗಳ ನಡುವೆಯೂ ನಾವು ಸಂಭ್ರಮಿಸೋಣ ನನ್ನದೇ ಎಂಬ ಭಾವ ತೀವ್ರತೆಯಿಂದ ಹೊರಗಿದ್ದು ನಮ್ಮದು ಎಂಬ ಭಾವಾನುಸಂಧಾನಕ್ಕಾಗಿ.
Photo by Rob Laughter on Unsplash
ತುಮಕೂರು ತಾಲ್ಲೂಕು ಮೆಳೇಹಳ್ಳಿಯ ದೇವರಾಜ್ ಕರ್ನಾಟಕದ ಸುಪ್ರಸಿದ್ಧ ರಂಗ ನಿರ್ದೇಶಖರು.ಇಪ್ಪತ್ತು ವರ್ಷಗಳಿಂದ ನಟನೆ, ನಿರ್ದೇಶನ, ನಾಟಕ ರಚನೆ ಮತ್ತು ಸಂಘಟನೆಯಲ್ಲಿ ತೊಡಗಿದ್ದಾರೆ.
ನಿರ್ದೇಶಸಿದ ನಾಟಕಗಳು-ದೂತವಾಕ್ಯ, ಸೇವಂತಿ ಪ್ರಸಂಗ, ಕೇಳು ಜನಮೇಜಯ, ಮತ್ತವಿಲಾಸ, ತೆರೆಗಳು, ಬಲಿಯಾದಳು ಭಾಗೀರಥಿ, ಯಾರಿಗೂ ಹೇಳೊಣು ಬ್ಯಾಡ, ಸಾಯೋಆಟ, ಅಂಗುಲಿಮಾಲ, ಕಾಲಜ್ಙಾನಿ ಕನಕ,ದೊರೆ ಈಡಿಪಸ್, ಹಳಿಯ ಮೇಲಿನ ಸದ್ದು, ಮೈಲಾರ ಮಹದೇವ ಇತ್ಯಾದಿ.ಸಂಪನ್ಮೂಲ ವ್ಯಕ್ತಿಯಾಗಿ-ಎನ್ ಎಸ್ ಡಿ ಆರ್ ಆರ್ ಸಿ ಬೆಂಗಳೂರು, ರಂಗಾಯಣ ಮೈಸೂರು, ರಂಗ ಅಧ್ಯಯನ ಕೇಂದ್ರ ಕುಂದಾಪುರ, ಎಂ ಇ ಎಸ್ ರಂಗಶಾಲೆ ಬೆಂಗಳೂರು, ಅಭಿನಯ ಶಿವಮೊಗ್ಗ, ಎನ್ ಎಸ್ ಡಿ ಬೆಂಗಳೂರು ಇಲ್ಲಿ ಕಾರ್ಯನಿರ್ವಹಿಸಿದ್ದಾರೆ.
ಪ್ರಯೋಗ ಪ್ರಮುಖ ಸ್ಥಳ-ಪುಣೆ,ದೆಹಲಿ, ಹೈದರಾಬಾದ್, ಮಲೆಷ್ಯಾ ಮತ್ತು ಕರ್ನಾಟಕ.
ಧನ್ಯವಾದಗಳು ದೇವರಾಜು ಗ್ರಾಮೀಣ ಪ್ರದೇಶದಲ್ಲಿ ರಂಗಪಯಣ ಮಾಡುತ್ತಾ. ಗಮನಾರ್ಹ ರಂಗ ಪ್ರಯೋಗಗಳನ್ನು ಕಟ್ಟಿಕೊಡುತ್ತಾ ಸಾಧನೆಗೈಯುತ್ತಿರುವ ರಂಗಕರ್ಮಿ ಮಲೇ ಹಳ್ಳಿ ದೇವರಾಜು ರವರು ವಿಶ್ವ ರಂಗಭೂಮಿ ದಿನದ ಸಂದರ್ಭದಲ್ಲಿ, ಸಮಯೋಚಿತ ಲೇಖನ ಬರೆದಿದ್ದಾರೆ.
ಧನ್ಯವಾದಗಳು