ಹೋಗಿ ಬನ್ನಿ ಕವಿಗಳೇ

ರತ್ನಾ ಶ್ರೀನಿವಾಸ್

ಯಾರಿಗೆ ಬಂತು ಎಲ್ಲಿಗೆ ಬಂತು 47 ರ  ಸ್ವಾತಂತ್ರ್ಯ ಎಂದು ಹಾಡುತ್ತಾ  ಸಮುದಾಯದ ದನಿಯಾಗಿದ್ದವರು ಶುಕ್ರವಾರ ನಿಧನರಾದ
ಕವಿ ಸಿದ್ಧಲಿಂಗಯ್ಯ.  ದಲಿತ ಸಮುದಾಯದ ದನಿಯಾಗಿಯೇ ಬಂಡಾಯ ಸಾಹಿತ್ಯ, ಕಾವ್ಯ ಜಗತ್ತಿಗೆ ಹೊಸ ಹಾದಿಯನ್ನು ತೋರಿದವರು ಸಿದ್ಧಲಿಂಗಯ್ಯನವರು. ಸಾಹಿತ್ಯದ ಮೂಲಕ ಜನನಾಡಿಯನ್ನು ಹಿಡಿದು ಅವರು ತುಂಬ ಎತ್ತರಕ್ಕೆ ಬೆಳೆದರು, ಸಮಾಜವನ್ನೂ ಬೆಳೆಯುವಂತೆ ಮಾಡಿದರು.

1954 ಫೆಬ್ರವರಿ 3 ರಂದು ರಾಮನಗರ ಜಿಲ್ಲೆ ಮಾಗಡಿ ತಾಲೂಕಿನ ಮಂಚನಬೆಲೆಯಲ್ಲಿ ಜನಿಸಿದರು. ಶೋಷಣೆ,ತಾರತಮ್ಯ ಅನುಭವಿಸುತ್ತಲೆ ಮಾಗಡಿಯಲ್ಲಿ ಅಕ್ಷರಾಭ್ಯಾಸ ಆರಂಭಿಸಿದರು. 1974 ರಲ್ಲಿ ಬೆಂಗಳೂರು ವಿಶ್ವವಿದ್ಯಾಲಯದಲ್ಲಿ ಬಿ.ಎ.ಆನರ್ಸ್, 1976 ರಲ್ಲಿ ಡಿ.ಎಲ್. ನರಸಿಂಹಾಚಾರ್ಯ ಸ್ವರ್ಣಪದಕ ಗಳಿಸಿ ಸ್ನಾತಕೋತ್ತರ  ಪದವಿ ಪಡೆದರು. ಡಾ.ಜಿ.ಎಸ್.ಶಿವರುದ್ರಪ್ಪನವರ ಮಾರ್ಗದರ್ಶನದಲ್ಲಿ ” ಗ್ರಾಮ ದೇವತೆಗಳು ” ಎಂಬ ಪ್ರೌಢ ಪ್ರಬಂಧ ಮಂಡಿಸಿ ಪಿಎಚ್.ಡಿ.ಪದವಿ ಗಳಿಸಿಕೊಂಡರು.

ವೃತ್ತಿಜೀವನ

ಬೆಂಗಳೂರು ವಿಶ್ವವಿದ್ಯಾಲಯದಲ್ಲಿ  ಅಧ್ಯಾಪಕರಾಗಿ, ಕನ್ನಡ ಅಧ್ಯಯನ ಕೇಂದ್ರದ ನಿರ್ದೇಶಕರಾಗಿ ಸೇವೆ ಸಲ್ಲಿಸಿದ್ದಾರೆ. ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ,ಕನ್ನಡ ಪುಸ್ತಕ ಪ್ರಾಧಿಕಾರದ ಅಧ್ಯಕ್ಷ ರಾಗಿಯೂ ಕಾರ್ಯನಿರ್ವಹಿಸಿದ್ದರು. ದಲಿತ ಸಂಘರ್ಷ ಸಮಿತಿ ಮತ್ತು ಬಂಡಾಯ ಸಾಹಿತ್ಯ ಸಂಘಟನೆಗಳ  ಸ್ಥಾಪಕ ಸದಸ್ಯರಾಗಿದ್ದರು. ಡಾ.ಅಂಬೇಡ್ಕರ್ ಕೃತಿಗಳ ಕನ್ನಡ ಭಾಷಾಂತರ ಮತ್ತು ರಾಮಮನೋಹರ  ಲೋಹಿಯಾ ಕೃತಿಗಳ ಭಾಷಾಂತರ ಮತ್ತು ಸಂಪಾದನಾ ಸಮಿತಿಗಳಲ್ಲಿ ಸಹ ತಮ್ಮನ್ನು ತೊಡಗಿಸಿಕೊಂಡಿದ್ದರು.

ಇವರ ಪ್ರಮುಖ ಕೃತಿಗಳು.

ಕವನ ಸಂಕಲನಗಳು
* ಹೊಲೆಮಾದಿಗರ ಹಾಡು
* ಕಪ್ಪುಕಾಡಿನ ಹಾಡು.
* ಸಾವಿರಾರು ನದಿಗಳು.
* ಮೆರವಣಿಗೆ
* ಅಲ್ಲೇ ಕುಂತವರು.
* ನನ್ನ ಜನಗಳು  ಮುಂತಾದವು.

ನಾಟಕಗಳು.
ಪಂಚಮ ಮತ್ತು ನೆಲಸಮ
ಏಕಲವ್ಯ.
ಹಕ್ಕಿನೋಟ
ರಸಗಳಿಗೆಗಳು
ಎಡ ಬಲ

ಜನ ಸಂಸ್ಕೃತಿ ಮುಂತಾದವು ಲೇಖನ ಸಂಗ್ರಹಗಳು.
ಊರುಕೇರಿ ಎಂಬ ಇವರ ಆತ್ಮಕಥನ ಇದು ತಮಿಳು,ಇಂಗ್ಲಿಷ್ ಭಾಷೆಗೆ ಅನುವಾದಗೊಂಡಿದೆ.

ಸಿದ್ದಲಿಂಗಯ್ಯನವರ ಪ್ರತಿಭೆಗೆ ಹಲವಾರು  ಪ್ರಶಸ್ತಿಗಳು ದೊರೆತಿವೆ.

* ಪುಟ್ಟಣ್ಣಕಣಗಾಲ್ ಅವರು ನಿರ್ದೇಶಿಸಿದ ‘ಧರಣಿ ಮಂಡಲ ಮಧ್ಯದೊಳಗೆ ಚಿತ್ರಕ್ಕೆ ಬರೆದ ಗೀತೆಗೆ ರಾಜ್ಯ ಪ್ರಶಸ್ತಿ ದೊರೆತಿದೆ.

ಬಾ ನಲ್ಲೇ ಮಧು ಚಂದ್ರಕೆ ಚಲನ ಚಿತ್ರದ ” ಆ ಬೆಟ್ಟದಲ್ಲಿ ಬೆಳದಿಂಗಳಲ್ಲಿ ಸುಳಿದಾಡ ಬೇಡ ಗೆಳತಿ ಈ ಗೀತೆ ಅತ್ಯಂತ ಜನಪ್ರಿಯ ಗೀತೆಯಾಗಿದೆ.

* 1986ರಲ್ಲಿ ರಾಜ್ಯೋತ್ಸವ ಪ್ರಶಸ್ತಿ.
* 1992 ರಲ್ಲಿ ಡಾ.ಅಂಬೇಡ್ಕರ್ ಶತಮಾನೋತ್ಸವ ಪ್ರಶಸ್ತಿ
* 1996 ರಲ್ಲಿ ಕರ್ನಾಟಕ ಸಾಹಿತ್ಯ ಅಕಾಡೆಮಿ ಗೌರವ ಪ್ರಶಸ್ತಿ
* 2001 ರಲ್ಲಿ ಜಾನಪದ ತಜ್ಞ ಪ್ರಶಸ್ತಿ.
* 2002 ರಲ್ಲಿ ಸತ್ಯಕಾಮ ಪ್ರತಿಷ್ಠಾನ ಪ್ರಶಸ್ತಿ.
* 2005 ರಲ್ಲಿ ಬಾಬು ಜಗಜೀವನ ರಾಂ  ಪ್ರಶಸ್ತಿ.
* 2007 ರಲ್ಲಿ ನಾಡೋಜ ಪ್ರಶಸ್ತಿ.
* 2012 ರಲ್ಲಿ ಆಳ್ವಾಸ್ ನುಡಿ ಸಿರಿ ಪ್ರಶಸ್ತಿ.ಹಾಗು ಪ್ರೆಸಿಡೆನ್ಸಿ ಇನ್ಸ್ಟಿಟ್ಯೂಷನ್ ಪ್ರಶಸ್ತಿ.

ಶ್ರ ವಣಬೆಳಗೊಳದಲ್ಲಿ ನಡೆದ 81ನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರೂ ಆಗಿದ್ದರು

ಇಷ್ಟೆಲ್ಲಾ ಪದವಿ, ಗೌರವವನ್ನು ಪಡೆದಿದ್ದ ಉಲ್ಲಾಸ, ಉತ್ಸಾಹ,ಅರಿವು ಮತ್ತು ವಿರೋಧಗಳ ಸಮ್ಮಿಶ್ರದಂತೆ ಇದ್ದ ಜೀವವೊಂದು ಇಂದು ನಮ್ಮಿಂದ ದೂರವಾಗಿ ಊರು ಕೇರಿ ಬರಡಾಗಿದೆ.ಇದೊಂದು ಯಾರೂ ತುಂಬಲಾರದ ನಷ್ಟ. ಆ ಮಹಾನ್ ಚೇತನಕ್ಕೆ ನನ್ನೀ ನುಡಿ ನಮನಗಳು.