ಬಳಕೂರು ವಿ ಎಸ್ ನಾಯಕ
ಕಲಾಪ್ರಕಾರಗಳಲ್ಲಿ ಚಿತ್ರಕಲೆ ಶಿಲ್ಪಕಲೆ ಹೀಗೆ ಪಟ್ಟಿ ಬೆಳೆಯುತ್ತಾ ಹೋಗುತ್ತದೆ. ಹಲವಾರು ಜನರು ಒಂದೊಂದು ವಿಷಯವನ್ನು ಆರಿಸಿಕೊಂಡು ವಿಭಿನ್ನವಾದ ಕಲಾತ್ಮಕ ಲೋಕವನ್ನು ಸೃಷ್ಟಿ ಮಾಡಿದ್ದಾರೆ. ತಾವು ಕಲಿತ ರಚಿಸಿದ ಅನುಭವಿಸಿದ ಹಲವಾರು ವಿಚಾರಗಳನ್ನು ತಾವು ಆರಿಸಿಕೊಂಡ ಕಲಾ ಮಾಧ್ಯಮದ ಮೂಲಕ ಬಿತ್ತರಿಸುತ್ತಾರೆ.
ಇಲ್ಲಿ ಅಂತರಾಷ್ಟ್ರೀಯ ಮಟ್ಟದಲ್ಲಿ ಪ್ರಸಿದ್ಧರಾದ ಶಿಲ್ಪ ಕಲಾವಿದರಾದ ವಿಶಾಲ್ ಕಾವ ಟೇಕರ್ ಮತ್ತು ಗೋಪಾಲ್ ಕಮ್ಮಾರ್ ರವರು ತಾವು ರಚಿಸಿರುವ ವಿಭಿನ್ನ ಶಿಲ್ಪಕಲಾಕೃತಿಗಳ ಗುಚ್ಛವನ್ನು ಏಕವ್ಯಕ್ತಿ ಕಲಾ ಪ್ರದರ್ಶನದ ಮೂಲಕ ಕಲಾಸಕ್ತರ ಮಡಿಲಿಗೆ ಅರ್ಪಿಸಲು ಹೊರಟಿದ್ದಾರೆ. ವಿಭಿನ್ನ ಕಲಾತ್ಮಕ ನೋಟಗಳನ್ನು ಒಳಗೊಂಡ ಶಿಲ್ಪಗಳು ವಿಭಿನ್ನ ಸಂದೇಶವನ್ನು ತರುವುದಲ್ಲದೆ ಎಲ್ಲರ ಮನಸ್ಸಿನಲ್ಲಿ ಸದಾಕಾಲ ನೆನಪಿಡುವಂತಹ ವಿಚಾರ ವಿನಿಮಯ ಮಾಡಲು ಹೊರಟಿರುವುದು ನಿಜವಾಗಿಯೂ ಶ್ಲಾಘನೀಯ.
ಕಾಣುವ ಮಾತುಗಳು ಶಿಲ್ಪ ಕಲಾ ಪ್ರದರ್ಶನ
ವಿಶಾಲ ಕಾವಟೇಕರ್ ಕನ್ನಡ ನಾಡು ಕಂಡ ಅದ್ಭುತ ಶಿಲ್ಪ ಕಲಾವಿದರಲ್ಲಿ ಒಬ್ಬರು. ಇವರು ಮೂಲತಃ ಶಿವಮೊಗ್ಗದವರು. ಪ್ರಸ್ತುತ ಕರ್ನಾಟಕ ಚಿತ್ರಕಲಾ ಪರಿಷತ್ತಿನ ಚಿತ್ರಕಲಾ ಮಹಾವಿದ್ಯಾಲಯದಲ್ಲಿ ಶಿಲ್ಪಕಲಾ ವಿಭಾಗದ ಉಪನ್ಯಾಸಕರಾಗಿ ಸೇವೆಯನ್ನು ಸಲ್ಲಿಸುತ್ತಿದ್ದಾರೆ. ಇವರ ತಂದೆ ಪ್ರಸಿದ್ಧ ಶಿಲ್ಪ ಕಲಾವಿದರಾದ ಶಿಲ್ಪಿ ನಾರಾಯಣರಾವ್. ಕೆ. ಇವರು ಚಿತ್ರಕಲಾ ಮಹಾವಿದ್ಯಾಲಯದಲ್ಲಿ ಬಿ. ವಿ. ಎ ಪದವಿಯನ್ನು ನಂತರ ಬೆಂಗಳೂರು ವಿಶ್ವವಿದ್ಯಾಲಯದಲ್ಲಿ ಎಂ.ವಿ. ಎ. ಸ್ನಾತಕೋತ್ತರ ಪದವಿಯನ್ನು ಪಡೆದುಕೊಂಡಿದ್ದಾರೆ. ಅಗಸ್ಟ್ ತಿಂಗಳ 8ರಂದು ಆರಂಭವಾಗುವ ಏಕವ್ಯಕ್ತಿ ಕಲಾ ಪ್ರದರ್ಶನದಲ್ಲಿ ಕಾಣುವ ಮಾತುಗಳು ಎಂಬ ಶೀರ್ಷಿಕೆಯಡಿ ಶಿಲ್ಪ ಕಲಾ ಪ್ರದರ್ಶನವನ್ನು ಏರ್ಪಡಿಸುತ್ತಿರುವುದು ವಿಶೇಷ.
ಶಿಲ್ಪ ಕಲಾ ಪ್ರದರ್ಶನದ ವಿಶೇಷತೆಯೆಂದರೆ ಮನುಷ್ಯನ ಮುಖಚರ್ಯೆ ಮಾತನಾಡದೆ ಶಬ್ದಗಳ ಹಂಗಿಲ್ಲದೆ ಹಲವಾರು ವಿಚಾರಗಳನ್ನು ಹೇಳಬಲ್ಲವು. ಅಭಿವ್ಯಕ್ತಿ ಎಂಬುದು ಒಂದು ನಿರ್ದಿಷ್ಟ ಕಾಲಕ್ಕೆ ಸೀಮಿತವಾದದ್ದಲ್ಲ ಅದು ಕಾಲಾತೀತವಾದ ವಿಷಯ. ಇಂತಹ ವಿಷಯವನ್ನು ತನ್ನ ಶಿಲ್ಪಕಲಾ ವಸ್ತುವನ್ನಾಗಿ ಮಾಡಿಕೊಂಡು ಹಲವಾರು ಶಿಲ್ಪಕಲಾಕೃತಿಗಳನ್ನು ಏಕವ್ಯಕ್ತಿ ಕಲಾ ಪ್ರದರ್ಶನದಲ್ಲಿ ಪ್ರದರ್ಶಿಸುತ್ತಿರುವುದು ವಿಶೇಷವಾಗಿ ದೆ. ಇವರ ಈ ಕಲಾಪ್ರದರ್ಶನದಲ್ಲಿ ಒಟ್ಟು ಏಳು ಶಿಲ್ಪ ಗಳು ಮತ್ತು 10 ಚಿತ್ರಕಲೆ ಸಂಬಂಧಿಸಿದ ವಿಭಿನ್ನ ಕಲಾಕೃತಿಗಳು ಅನಾವರಣಗೊಳ್ಳಲಿದೆ. ಕುಮಾರಕೃಪಾ ರಸ್ತೆಯಲ್ಲಿರುವ ಕರ್ನಾಟಕ ಚಿತ್ರಕಲಾ ಪರಿಷತ್ತಿನ ಕಲಾಗ್ಯಾಲರಿ -1 ರಲ್ಲಿ ಪ್ರದರ್ಶನ ಏರ್ಪಡಿಸಲಾಗಿದೆ.
ಒಡನಾಟ ಶಿಲ್ಪಕಲಾ ಪ್ರದರ್ಶನ
ಗೋಪಾಲ್ ಕಮ್ಮಾರ್ ಕನ್ನಡ ನಾಡು ಕಂಡ ಅದ್ವಿತೀಯ ಶಿಲ್ಪ ಕಲಾವಿದ ಇವರ ಒಂದೊಂದು ಶಿಲ್ಪಗಳು ವಿಭಿನ್ನ ಸಂದೇಶದ ಜೊತೆಗೆ ವಿಶಿಷ್ಟ ಅನುಭವವನ್ನು ಸಾರಿ ಹೇಳುವಂತದ್ದು. ಎಂಥವರ ಮನಸ್ಸನ್ನು ಆಕರ್ಷಿಸುವ ಕಲಾತ್ಮಕವಾದ ವಿಭಿನ್ನ ಶಿಲ್ಪಗಳು ಕಲಾಸಕ್ತರನ್ನು ಬೇರೆ ಒಂದು ಲೋಕಕ್ಕೆ ಕೊಂಡೊಯ್ಯುತ್ತವೆ. ಇಂತಹ ಕಲಾವಿದರ ಶಿಲ್ಪ ಕಲಾ ಪ್ರದರ್ಶನ ಕುಮಾರಕೃಪಾ ರಸ್ತೆಯಲ್ಲಿರುವ ಕರ್ನಾಟಕ ಚಿತ್ರಕಲಾ ಪರಿಷತ್ತಿನ ಕಲಾ ಗ್ಯಾಲರಿಯಲ್ಲಿ ನಡೆಯುತ್ತಿರುವುದು ವಿಶೇಷ.
ಗೋಪಾಲ ಕಮ್ಮಾರ್ ಅವರು ಬೆಳಗಾವಿಯ ಯರಗಟ್ಟಿ ಯವರು. ಈಗ ಕರ್ನಾಟಕ ಚಿತ್ರಕಲಾ ಪರಿಷತ್ತಿನ ಚಿತ್ರಕಲಾ ಮಹಾವಿದ್ಯಾಲಯದ ಶಿಲ್ಪಕಲಾ ವಿಭಾಗದಲ್ಲಿ ಉಪನ್ಯಾಸಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಅಗಸ್ಟ್ 8 ರಿಂದ ಆರಂಭವಾಗುವ ಇವರ ಕಲಾ ಪ್ರದರ್ಶನ ಒಡನಾಟವು ನಿಜವಾಗಿಯೂ ಕೂಡ ವಿಭಿನ್ನ ಸಂದೇಶವನ್ನು ನೀಡುವುದರಲ್ಲಿ ಸಂದೇಹವಿಲ್ಲ. ಬದುಕಿನ ಜೊತೆಗೆ ಒಡನಾಟ ಎಂಬ ಸಂದೇಶವನ್ನು ಸಾರುವ ಇವರೇ ಶಿಲ್ಪಗಳ ಪ್ರದರ್ಶನ ವಿಸ್ಮಯಕಾರಿ ತಾಣಕ್ಕೆ ಕಲಾಸಕ್ತರನ್ನು ಕೊಂಡೊಯ್ಯುತ್ತದೆ. ಕಲಾವಿದನಾದವನು ತನ್ನ ಸುತ್ತಮುತ್ತಲಿನ ಆಗುಹೋಗುಗಳ ಜೊತೆಗಿನ ಒಡನಾಟದಿಂದ ಪ್ರೇರೇಪಣೆಗೊಂಡು ಹಲವಾರು ಶಿಲ್ಪಕಲಾಕೃತಿಗಳನ್ನು ಕಲಾಸಕ್ತರ ಮಡಿಲಿಗೆ ಅರ್ಪಿಸುತ್ತಾನೆ. ಇವರು ಕೂಡ ವಿಭಿನ್ನ ಶಿಲ್ಪಕಲಾಕೃತಿಗಳನ್ನು ಅಂದರೆ 16 ಶಿಲ್ಪಗಳು ಸೇರಿ ಒಂದು ಪ್ರತಿಷ್ಠಾಪನಾ ಕಲೆ ಮೂಲಕವಾಗಿ ಪ್ರದರ್ಶನ ಮಾಡುತ್ತಿದ್ದಾರೆ.
ಒಟ್ಟಾರೆ ಇದರ ಸಂದೇಶವೆಂದರೆ ನಾವು ನಮ್ಮ ಜೀವನ ಸಾಗಿಸುವಾಗ ಎಡವಬಾರದು. ಹೊಟ್ಟೆಗಾಗಿ ನಾವು ಕೆಟ್ಟ ಕೆಲಸವನ್ನು ಮಾಡುವುದನ್ನು ಬಿಟ್ಟು ಸರಿಯಾದ ಮಾರ್ಗದಲ್ಲಿ ನಡೆದು ಚಿಂತನಾಶೀಲ ರಾದರೆ ನಮ್ಮ ಬದುಕು ಅರ್ಥಪೂರ್ಣ ಸಾರ್ಥಕವಾದ ಸಾಧನೆಯ ಉತ್ತುಂಗ ಎರಬಹು ದು ಎಂಬ ಸಂದೇಶ ಅಡಕವಾಗಿ ದೆ. ಇಂಥ ಏಕವ್ಯಕ್ತಿ ಕಲಾ ಪ್ರದರ್ಶನವನ್ನು ತಾವೆಲ್ಲರೂ ಕಣ್ತುಂಬಿಕೊಳ್ಳಬೇಕಾದರೆ ಬೆಂಗಳೂರಿನಲ್ಲಿ ಕುಮಾರಕೃಪಾ ರಸ್ತೆಯಲ್ಲಿರುವ ಚಿತ್ರಕಲಾ ಪರಿಷತ್ತಿನ ಕಲಾಗ್ಯಾಲರಿ ಒಂದು ಮತ್ತು ಎರಡರಲ್ಲಿ ಬಂದು ವೀಕ್ಷಿಸಬಹುದು.
ಕರ್ನಾಟಕ ಚಿತ್ರಕಲಾ ಪರಿಷತ್ ನಲ್ಲಿ ಉಪನ್ಯಾಸಕರಾಗಿರುವ ವಿ. ಎಸ್ . ನಾಯಕರ ಪೂರ್ಣ ಹೆಸರು ವೆಂಕಟದಾಸ್ ಎಸ್ . ನಾಯಕ. ನಾಡಿನ ಅನೇಕ ಪತ್ರಿಕೆಗಳಲ್ಲಿ ಇವರ ಬರಹಗಳು ಪ್ರಕಟವಾಗಿವೆ. ಅನೇಕ ಸಂಸ್ಥೆಗಳಲ್ಲಿ ಕಾರ್ಯಕ್ರಮ ಸಂಯೋಜಕರಾಗಿಯೂ ಪರಿಚಿತರು. ದೂರದರ್ಶನದಲ್ಲಿ ಗಾಂಧೀ ವಿಚಾರಧಾರೆ ಕುರಿತು ಅನೇಕ ಉಪನ್ಯಾಸಗಳನ್ನು ನೀಡಿದ್ದಾರೆ. ಹಲವಾರು ಸಂಸ್ಥೆಗಳ ಪುರಸ್ಕಾರಕ್ಕೂ ಪಾತ್ರರಾಗಿದ್ದಾರೆ.
