ಬಳಕೂರು ವಿ ಎಸ್ ನಾಯಕ
ಬೆಂಗಳೂರಿನ ಕುಮಾರ ಕೃಪ ರಸ್ತೆಯಲ್ಲಿರುವ ಕರ್ನಾಟಕ ಚಿತ್ರಕಲಾ ಪರಿಷತ್ ನ ಕಲಾಗ್ಯಾಲರಿ ಗೆ ಅಡಿ ಇಟ್ಟವರಿಗೆ ಒಂದು ವಿಸ್ಮಯಕಾರಿ ಕಲಾ ತಾಣಕ್ಕೆ ಹೋದಂತ ಅನುಭವ ಆಗಿತ್ತು. ಇಲ್ಲಿ ಪ್ರದರ್ಶನಗೊಂಡ ಕಲಾಕೃತಿಗಳು ಒಂದಕ್ಕಿಂದ ಒಂದು ವಿಭಿನ್ನವಾಗಿದ್ದು ವಿಶೇಷ ವಿನೂತನವಾದ ಅನುಭವ ನೀಡುವಂತಿತ್ತು. ಇದಕ್ಕೆಲ್ಲ ಕಾರಣ ಚಿತ್ರಕಲಾ ಮಹಾವಿದ್ಯಾಲಯದ ಹಳೆ ಕಲಾ ವಿದ್ಯಾರ್ಥಿಗಳ ಸಂಘದವರು ಹಮ್ಮಿಕೊಂಡಿರುವ ಆರ್ಟ್ ಅಕ್ರಾಸ್ ಟೈಮ್ ಎಂಬ ಕಲಾಪ್ರದರ್ಶನ.
ಚಿತ್ರಕಲಾ ಪರಿಷತ್ತಿನ ಚಿತ್ರಕಲಾ ಮಹಾವಿದ್ಯಾಲಯದಲ್ಲಿ ಸುಮಾರು 60 ವರ್ಷಗಳ ಸುದೀರ್ಘ ಇತಿಹಾಸವಿರುವ ಈ ಸಂಸ್ಥೆಯಲ್ಲಿ ಬಹಳಷ್ಟುಉನ್ನತ ಕಲಾವಿದರು ರಾಜ್ಯ ರಾಷ್ಟ್ರ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಅತ್ಯುತ್ತಮ ಕಲಾವಿದರಾಗಿ ಹೊರಹೊಮ್ಮಿದ್ದಾರೆ. ಎಲ್ಲಾ ಹಳೆಯ ಕಲಾ ವಿದ್ಯಾರ್ಥಿಗಳು ಸೇರಿ ತಾವು ರಚಿಸಿರುವ ವಿಭಿನ್ನ ಕಲಾಕೃತಿಗಳ ಸರಣಿಯನ್ನು ಕಲಾಸಕ್ತರ ಮಡಲಿಗೆ ಅರ್ಪಿಸಲು ಹೊರಟಿದ್ದಾರೆ. ಚಿತ್ರಕಲಾ ಪರಿಷತ್ತಿನ ಕಲಾ ಗ್ಯಾಲರಿಯಲ್ಲಿ ವಿಭಿನ್ನ ಕಲಾಕೃತಿಗಳು ವಿಸ್ಮಯಕಾರಿ ನೋಟಕ್ಕೆ ಸಾಕ್ಷಿಯಂತಿದೆ.
ಕಲಾ ಪ್ರದರ್ಶನದ ವಿಶೇಷತೆ
ಚಿತ್ರಕಲಾ ಮಹಾವಿದ್ಯಾಲಯದ ಹಳೆವಿದ್ಯಾರ್ಥಿಗಳ ಕಲಾ ಪ್ರದರ್ಶನ ವಿಶೇಷವಾದ ಮೆರಗನ್ನು ನೀಡುವಂತಿದೆ. ರಾಜ್ಯ ದೇಶ ಅಂತರಾಷ್ಟ್ರೀಯ ಮಟ್ಟದಲ್ಲಿ ಉನ್ನತ ಸ್ಥಾನದಲ್ಲಿರುವ ಹಲವಾರು ಕಲಾವಿದರು ತಮ್ಮ ಕಲಾಕೃತಿಗಳನ್ನು ಪ್ರದರ್ಶಿಸುವುದು ವಿಶೇಷ. ಒಂದೇ ಸೂರಿನಡಿ ವಿವಿಧ ಪ್ರಕಾರದ ಕಲಾಕೃತಿಗಳು ವಿಶೇಷ ಹಿನ್ನೆಲೆಯನ್ನು ಹೊಂದಿ ಪ್ರದರ್ಶನ ಮಾಡಿದ್ದಾರೆ.
ವಿಭಿನ್ನ ಕಲಾಕೃತಿಗಳ ಸರಣಿ
ಈಗ ಕಲಾಪ್ರದರ್ಶನದಲ್ಲಿ 60ಕ್ಕಿಂತ ಹಳೆಯ ಚಿತ್ರಕಲಾವಿದರು ಅದರಲ್ಲೂ ಚಿತ್ರಕಲೆ ಗ್ರಾಫಿಕ್ ಫೋಟೋಗ್ರಫಿ ಪ್ರತಿಷ್ಠಾಪನಾ ಕಲೆ. ಶಿಲ್ಪಕಲೆ ಎಲ್ಲವೂ ಕೂಡ ಒಂದೇ ಕಡೆಗೆ ಇರುವುದರಿಂದ ಕಲಾಸಕ್ತರಿಗೆ ವಿಭಿನ್ನ ಅನುಭವ ಸಿಗುತ್ತದೆ. ಇಲ್ಲಿ ಓದಿ ಸಾಧನೆಯನ್ನು ಮಾಡಿದ ಹಲವಾರು ಕಲಾವಿದರು ಇಡೀ ಭಾರತದಲ್ಲಿ ಕಾರ್ಯನಿರತ ರಾದ ಎಲ್ಲಾ ಕಲಾವಿದರ ಚಿತ್ರಗಳು ನೋಡಲು ಸಿಗುತ್ತದೆ
ಉದ್ದೇಶ
ಇಲ್ಲಿ ಪ್ರದರ್ಶನ ಗೊಳ್ಳುವ ಕಲಾಕೃತಿಗಳು ಕಲಾ ವಿದ್ಯಾರ್ಥಿಗಳಿಗೆ ಕಲಿಕೆ ಮಾಡಲು ಇದರ ಬಗ್ಗೆ ಸಂಪೂರ್ಣವಾಗಿ ತಿಳಿದುಕೊಳ್ಳಲು ಅನುಕೂಲವಾಗುತ್ತದೆ ಇಂದಿನ ಆಧುನಿಕ ತಂತ್ರಜ್ಞಾನ ಬಗ್ಗೆ ವಿವರಣೆ. ವಿಚಾರವಿನಿಮಯ. ಮತ್ತು ತಾವು ಕಲಿತದ್ದನ್ನು ಬೇರೆಯವರಿಗೆ ಯಾವ ರೀತಿಯಾಗಿ ತಿಳಿಸಿ ಕೊಡಬಹುದು ಎಂಬ ವಿಚಾರವೂ ಕೂಡ ಇಲ್ಲಿ ಕಾರ್ಯಾಗಾರಗಳ ಮೂಲಕ ಎಲ್ಲಾ ಕಲಾವಿದರು ವಿವರಿಸಿ ಹೇಳುತ್ತಾರೆ ಸಾಂಪ್ರದಾಯಿಕ ಚಿತ್ರಕಲೆಯಿಂದ ಹಿಡಿದು ಎಲ್ಲಾ ಪ್ರಕಾರದ ಮಾಧ್ಯಮದ ಚಿತ್ರಕಲೆಯ ಪ್ರದರ್ಶನ ಇದಾಗಿದ್ದು ತಮ್ಮ ಬಿಡುವಿನ ಸಮಯದಲ್ಲಿ ಚಿತ್ರಕಲಾ ಪರಿಷತ್ತಿನ ಆವರಣಕ್ಕೆ ಬಂದು ಕಣ್ಣುತುಂಬಿಕೊಳ್ಳಬಹುದು
ಚಿತ್ರಕಲಾ ಪ್ರದರ್ಶನ ನಡೆಯುವ ಸ್ಥಳ
ಕರ್ನಾಟಕ ಚಿತ್ರಕಲಾ ಪರಿಷತ್ತಿನ ಏಳನೇ ಕಲಾಗ್ಯಾಲರಿ
ಕುಮಾರಕೃಪಾ ರಸ್ತೆ ಬೆಂಗಳೂರು
ಪ್ರವೇಶ ಉಚಿತ
ಸಮಯ 11.00 ಗಂಟೆಯಿಂದ ಸಂಜೆ 6ರವರೆಗೆ
ಈ ಪ್ರದರ್ಶನವು ಅಕ್ಟೋಬರ್ 18 ರವರೆಗೆ ನಡೆಯಲಿದೆ.
ಕರ್ನಾಟಕ ಚಿತ್ರಕಲಾ ಪರಿಷತ್ ನಲ್ಲಿ ಉಪನ್ಯಾಸಕರಾಗಿರುವ ವಿ. ಎಸ್ . ನಾಯಕರ ಪೂರ್ಣ ಹೆಸರು ವೆಂಕಟದಾಸ್ ಎಸ್ . ನಾಯಕ. ನಾಡಿನ ಅನೇಕ ಪತ್ರಿಕೆಗಳಲ್ಲಿ ಇವರ ಬರಹಗಳು ಪ್ರಕಟವಾಗಿವೆ. ಅನೇಕ ಸಂಸ್ಥೆಗಳಲ್ಲಿ ಕಾರ್ಯಕ್ರಮ ಸಂಯೋಜಕರಾಗಿಯೂ ಪರಿಚಿತರು. ದೂರದರ್ಶನದಲ್ಲಿ ಗಾಂಧೀ ವಿಚಾರಧಾರೆ ಕುರಿತು ಅನೇಕ ಉಪನ್ಯಾಸಗಳನ್ನು ನೀಡಿದ್ದಾರೆ. ಹಲವಾರು ಸಂಸ್ಥೆಗಳ ಪುರಸ್ಕಾರಕ್ಕೂ ಪಾತ್ರರಾಗಿದ್ದಾರೆ.
