ಅಶೋಕ ಹೆಗಡೆ
ಕರ್ನಾಟಕದ ರಾಜಕಾರಣದಲ್ಲಿ ‘ಛಲದಂಕ ಮಲ್ಲ’ ಯಾರಾದರೂ ಇದ್ದರೆ ಅದು ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಮಾತ್ರ. ಹಾಗೆಯೇ ‘ದುರಂತ ನಾಯಕ’ ಎಂದು ಯಾರನ್ನಾದರೂ ಹೇಳವುದಿದ್ದರೆ ಅದೂ ಸಹ ಯಡಿಯೂರಪ್ಪನವರೇ. ನಾಲ್ಕು ಸಲ ಮುಖ್ಯಮಂತ್ರಿಯಾದರೂ ಒಮ್ಮೆಯೂ ಪೂರ್ಣಾವಧಿ ಪೂರೈಸುವ ಅದೃಷ್ಟವಿಲ್ಲ, ಒಮ್ಮೆಯೂ ನಿರಾತಂಕವಾಗಿ ಆಡಳಿತ ನಡೆಸುವ ಸೌಭಾಗ್ಯವಿಲ್ಲ. ಈಗಲೂ ಅಷ್ಟೇ, ಮುಖ್ಯಮಂತ್ರಿಯಾಗಿ ಭಾನುವಾರ (ಜುಲೈ ೨೬) ವರ್ಷ ತುಂಬಿದರೂ ಅದನ್ನು ಸಂಭ್ರಮಿಸಲು ಪರಿಸ್ಥಿತಿ ಇಲ್ಲ.
ಮೊದಲ ಸಲ ಮುಖ್ಯಮಂತ್ರಿಯಾಗಿದ್ದು ಬೆರಳೆಣಿಕೆಯ ದಿನಗಳ ಅವಧಿಗೆ. ೨೦೧೮ರ ವಿಧಾನಸಭೆ ಚುನಾವಣೆಯಲ್ಲಿ ಜೆಡಿಎಸ್ ನಾಯಕ ಎಚ್.ಡಿ.ಕುಮಾರಸ್ವಾಮಿ ಅವರ ‘ವಚನ ಭ್ರಷ್ಟತೆ’ಯನ್ನೇ ಜನರ ಮುಂದಿಟ್ಟು ಅನುಕಂಪ ಗಳಿಸುವಲ್ಲಿ ಯಶಸ್ವಿಯಾದರೂ ಅಧಿಕಾರಕ್ಕೆ ಏರುವಷ್ಟು ಬಹುಮತ ಸಿಗಲಿಲ್ಲ. ಬಿಜೆಪಿ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದರೂ ಸರಳ ಬಹುಮತಕ್ಕೆ ನಾಲ್ಕು ಸ್ಥಾನಗಳ ಅಗತ್ಯವಿತ್ತು. ಆರು ಪಕ್ಷೇತರ ಶಾಸಕರ ಬೆಂಬಲದೊಂದಿಗೆ ಮುಖ್ಯಮಂತ್ರಿಯಾಗಿ ಸರಕಾರ ರಚಿಸಿದರೂ, ಯಾವುದೇ ಕ್ಷಣದಲ್ಲಿ ಪಕ್ಷೇತರರು ಕೈ ಕೊಡಬಹುದು ಎಂಬ ಆತಂಕದಿಂದ ‘ಆಪರೇಷನ್ ಕಮಲ’ ನಡೆಸಿದರು.
ಅದೇ ‘ಆಪರೇಷನ್ ಕಮಲ’ವೇ ಅವರ ನೆಮ್ಮದಿ ಕಸಿದುಕೊಂಡಿದ್ದು ಸುಳ್ಳಲ್ಲ. ಬಿಜೆಪಿಯ ಆಂತರಿಕ ತಿಕ್ಕಾಟದಿಂದ ಮೂರೂವರೆ ವರ್ಷಕ್ಕೆ ರಾಜೀನಾಮೆ ನೀಡಬೇಕಾಯಿತು. ತಮ್ಮದೇ ಸ್ವತಂತ್ರ ಪಕ್ಷವನ್ನೂ ರಚಿಸಿ ಬಿಜೆಪಿ ಅಧಿಕಾರಕ್ಕೆ ಬರದಂತೆ ತಡೆದದ್ದೂ ಆಯಿತು.
೨೦೧೩ರ ಚುನಾವಣೆ ಸಂದರ್ಭದಲ್ಲಿ ಕೆಜೆಪಿ ರಚಿಸಿದಾಗ ಅವರ ಗುರಿ ತಾವು ಮತ್ತೆ ಅಧಿಕಾರಕ್ಕೆ ಏರುವುದಾಗಿರಲಿಲ್ಲ. ಬಿಜೆಪಿ ಅಧಿಕಾರಕ್ಕೆ ಬರದಂತೆ ತಡೆಯುವುದಾಗಿತ್ತು, ಯಡಿಯೂರಪ್ಪ ಇಲ್ಲದ ಬಿಜೆಪಿ ಕರ್ನಾಟಕದಲ್ಲಿ ಹೇಗಿರುತ್ತದೆ ಎಂಬುದನ್ನು ತೋರಿಸಿಕೊಡುವುದಾಗಿತ್ತು ಮತ್ತು ಅದರಲ್ಲಿ ಯಶಸ್ವಿಯೂ ಆದರು. ಮೂವರು ಮುಖ್ಯಮಂತ್ರಿಗಳೊಂದಿಗೆ ಐದು ವರ್ಷ ಆಡಳಿತ ನಡೆಸಿದ ನಡೆಸಿದ್ದ ಬಿಜೆಪಿ ಮತ್ತೆ ೫೦ಕ್ಕಿಂತ ಕಡಿಮೆ ಸ್ಥಾನ ಗಳಿಸಿ ನೆಲಕಚ್ಚಿತು. ಹೀಗೆ ತಮ್ಮ ‘ಸಾಮರ್ಥ್ಯ’ ತೋರಿಸಿದ ಯಡಿಯೂರಪ್ಪನವರನ್ನು ಬಿಜೆಪಿ ಪುನಃ ಪಕ್ಷಕ್ಕೆ ಸೇರಿಸಿಕೊಂಡು ಶಿವಮೊಗ್ಗದಿಂದ ಲೋಕಸಭೆಗೆ ಕಳುಹಿಸಿತು. ಅದರ ನಡುವೆಯೇ ಕಾನೂನು ಹೋರಾಟದಲ್ಲಿ ಜಯ ಗಳಿಸಿ ನಿರ್ದೋಷಿಯೂ ಆದರು.
ಎರಡನೇ ಅಧ್ಯಾಯ: ಆದರೆ ರಾಷ್ಟ್ರ ರಾಜಕಾರಣದಲ್ಲಿ ಯಡಿಯೂರಪ್ಪನವರಿಗೆ ಯಾವತ್ತೂ ಆಸಕ್ತಿ ಇರಲಿಲ್ಲ. ಅವರ ಗಮನ ಇದ್ದುದೆಲ್ಲ ಕರ್ನಾಟಕದ ಮೇಲೆಯೇ. ಅದನ್ನು ಹಲವು ಸಲ ನರೇಂದ್ರ ಮೋದಿ-ಅಮಿತ್ ಶಾ ಬಳಿ ಹೇಳಿಕೊಂಡಿದ್ದರು. ಗುಮಾಸ್ತನಾಗಿ ರೈಸ್‌ಮಿಲ್ ಮ್ಯಾನೇಜರ್, ಹಾರ್ಡ್‌ವೇರ್ ಅಂಗಡಿ ಮಾಲೀಕನ ಸ್ಥಾನದವರೆಗೆ; ಪುರಸಭೆ ಸದಸ್ಯನಿಂದ ಮುಖ್ಯಮನಂತ್ರಿ ಹುದ್ದೆವರೆಗೆ ಏರಿದ್ದ ಅವರಿಗೆ ಈ ನೆಲದ ಇಂಚಿಂಚೂ ರಾಜಕಾರಣ ಗೊತ್ತು. ಜಾತಿ ಸಮೀಕರಣದಲ್ಲಿ ಯಡಿಯೂರಪ್ಪನವರ‍್ನು ಹೊರಗಿಟ್ಟು ಚುನಾವಣೆ ಎದುರಿಸುವುದು ಸುಲಭವಲ್ಲ ಎನ್ನುವುದು ಮೋದಿ-ಶಾ ಜೋಡಿಗೂ ಅರ್ಥವಾಗಲು ಹೆಚ್ಚುಕಾಲ ಬೇಕಾಗಲಿಲ್ಲ.
ಹೀಗಾಗಿ ಮತ್ತೆ ಅವರಿಗೇ ರಾಜ್ಯಾಧ್ಯಕ್ಷ ಪದವಿ ನೀಡಿ, ಅವರ ನೇತೃತ್ವದಲ್ಲೇ ಚುನಾವಣೆ ಎಂದು ಘೋಷಿಸಿದರು. ಖುದ್ದು ಅಮಿತ್ ಶಾ ಅವರೇ ‘ಯಡಿಯೂರಪ್ಪ ಮುಂದಿನ ಮುಖ್ಯಮಂತ್ರಿ’ ಎಂದು ಘೋಷಿಸಿದರು. ಅವರಿಗೆ ಇಷ್ಟ ಇತ್ತೋ, ಇಲ್ಲವೋ, ಹಾಗೆ ಘೋಷಿಸಬೇಕಾದ ಅನಿವಾರ್ಯತೆಯನ್ನು ಸೃಷ್ಟಿಸಿದ್ದು ಯಡಿಯೂರಪ್ಪನವರ ಚಾಣಾಕ್ಷತೆ.
೨೦೧೮ರ ವಿಧಾನಸಭೆಯಲ್ಲಿ ಚುನಾವಣೆಯಲ್ಲಿ ಪುನಃ ಬಿಜೆಪಿ ಅತಿದೊಡ್ಡ ಪಕ್ಷವಾದರೂ ಬಹುಮತ ಸಿಗಲಿಲ್ಲ. ಯಡಿಯೂರಪ್ಪ ಎರಡು ದಿನಗಳ ಅವಧಿಗೆ ಸಿಎಂ ಹುದ್ದೆ ಅಲಂಕರಿಸಿದ್ದಷ್ಟೇ ಬಂತು. ಕಾಂಗ್ರೆಸ್ ರಾಷ್ಟ್ರೀಯ ನಾಯಕರ ಮಿಂಚಿನ ನಡೆಯಿಂದ ಜೆಡಿಎಸ್-ಕಾಂಗ್ರೆಸ್ ಮೈತ್ರಿಕೂಟ ಅಧಿಕಾರಕ್ಕೆ ಬಂದಿತು. ಈ ಮೈತ್ರಿ ಹೆಚ್ಚುಕಾಲ ಬಾಳುವುದಿಲ್ಲ ಎನ್ನುವುದು ಯಡಿಯೂರಪ್ಪನವರಿಗೆ ಸ್ಪಷ್ಟವಾಗಿ ಗೊತ್ತಿತ್ತು. ಹೀಗಾಗಿ ಮೈತ್ರಿಕೂಟದ ಅತೃಪ್ತ ಶಾಸಕರ ಬಗ್ಗೆ ಕಣ್ಣಿಟ್ಟಿದ್ದರು. ಆರೇಳು ಸಲ ‘ಆಪರೇಷನ್’ಗೆ ಪ್ರಯತ್ನಿಸಿ, ಕೊನೆಗೂ ಯಶಸ್ವಿಯಾಗಿ ಬರೋಬ್ಬರಿ ೧೭ ಶಾಸಕರ ರಾಜೀನಾಮೆ ಕೊಡಿಸಿ ನಾಲ್ಕನೇ ಅವಧಿಗೆ ಮುಖ್ಯಮಂತ್ರಿಯಾದರು. ಉಪ ಚುನಾವಣೆಯಲ್ಲಿ ಶಾಸಕನ್ನು ಗೆಲ್ಲಿಸಿಕೊಂಡು ಸ್ಪಷ್ಟಬಹುತದ ಸರಕಾರವನ್ನು ಮುನ್ನಡಸುತ್ತಿದ್ದಾರೆ. ಉಪ ಚುನಾವಣೆಯಲ್ಲಿ ಸೋತವರನ್ನು ವಿಧಾನ ಪರಿಷತ್ ಸದಸ್ಯರಾಗಿ ನೇಮಕ ಮಾಡುವ ಮೂಲಕ ಕೊಟ್ಟ ಮಾತು ಉಳಿಸಿಕೊಂಡಿದ್ದಾರೆ.
ಅಡಿಗಡಿಗೂ ಹೆಜ್ಜೆ: ಜುಲೈ ೨೬, ೨೦೧೯ರಂದು ಯಡಿಯೂರಪ್ಪ ನಾಲ್ಕನೇ ಅವಧಿಗೆ ಮುಖ್ಯಮಂತ್ರಿಯಾದರು ಖರೆ. ಆದರೆ ಒಂದು ಹೆಜ್ಜೆಯನ್ನೂ ಸಮಾಧಾನದಿಂದ ಇಡಲು ಅವರಿಗೆ ಸಾಧ್ಯವಾಗಿಲ್ಲ ಎನ್ನುವುದೂ ಸತ್ಯ. ಪೂರ್ಣ ಪ್ರಮಾಣದ ಸಂಪುಟ ರಚನೆಗೆ ಅವಕಾಶ ನೀಡದೇ ಶುರುವಿನಲ್ಲೇ ವರಿಷ್ಠರು ಕೈ ಕಟ್ಟಿ ಹಾಕುವ ಪ್ರಯುತ್ನ ಮಾಡಿದರು. ಮಿಗಿಲಾಗಿ ಈ ಬಾರಿ ಯಡಿಯೂರಪ್ಪ ಸರಕಾರ ರಚಿಸುವುದು ಮೋದಿ-ಶಾಗೆ ಇಷ್ಟವಿರಲಿಲ್ಲ. ಹಾಗಂತ ದೂರ ಇಡುವುದೂ ಸಾಧ್ಯವಿರಲಿಲ್ಲ. ಈ ಅಸಮಾಧಾನವನ್ನು ಅವರ ತೀರಿಸಿಕೊಂಡಿದ್ದು ಶಿವಮೊಗ್ಗದವರೇ ಆದ ಬಿಜೆಪಿ ರಾಷ್ಟ್ರೀಯ ಸಂಘಟನಾ ಕಾರ್ಯದರ್ಶಿ ಬಿ.ಎಲ್.ಸಂತೋಷ್ ಅವರ ಮೂಲಕ.
ಯಡಿಯೂರಪ್ಪನವರಿಗೂ, ಸಂತೋಷ್‌ಗೂ ಎಣ್ಣೆ-ಸೀಗೆಕಾಯಿ ಸಂಬಂಧ ಎನ್ನುವುದರ ಅರಿವಿದ್ದ ದಿಲ್ಲಿ ಜೋಡಿ ಅವರನ್ನೇ ಬಿಎಸ್‌ವೈ ವಿರುದ್ಧದ ಅಸ್ತ್ರವಾಗಿ ಬಳಸಿಕೊಂಡಿತು. ಅಷ್ಟು ಸಾಲದಂತೆ ಸಂತೋಷ್ ಅವರ ಪರಮಾಪ್ತ ನಳಿನ್‌ಕುಮರ್ ಕಟೀಲು ಅವರನ್ನು ಬಿಜೆಪಿ ರಾಜ್ಯಾಧ್ಯಕ್ಷರಾಗಿ ನೇಮಕ ಮಾಡಿತು. ಮೂವರು ಉಪ ಮುಖ್ಯಮಂತ್ರಿಗಳ ಮೂಲಕ ಪರ್ಯಾಯ ನಾಯಕತ್ವದ ಸೂಚನೆಯನ್ನೂ ರವಾನಿಸಿತು.
ಅದಕ್ಕಿಂತ ದೊಡ್ಡ ಸವಾಲು ಯಡಿಯೂರಪ್ಪನವರಿಗೆ ಎದುರಾದದ್ದು ಅಧಿಕಾರ ವಹಿಸಿಕೊಂಡ ತಕ್ಞಣ ಸುರಿದ ಭಾರಿ ಮಳೆ. ೨೦೦೮ರಲ್ಲಿ ಸಿಎಂ ಆದಾಗಲೂ ಅತಿವೃಷ್ಟಿ, ಪ್ರವಾಹದಿಂದ ರಾಜ್ಯ ಕಂಗೆಟ್ಟಿತ್ತು. ೨೦೧೯ರಲ್ಲಿಯೂ ಬರದ ಛಾಯೆಯಲ್ಲಿದ್ದ ರಾಜ್ಯದಲ್ಲಿ ಯಡಿಯೂರಪ್ಪ ಸಿಎಂ ಆಗುತ್ತಿದ್ದಂತೆ ಸಾಕು ಅನ್ನಿಸುವಷ್ಟು ಮಳೆ ಸುರಿಯಿತು. ಒಂದೆಡೆ ಪೂರ್ಣ ಪ್ರಮಾಣದ ಸಂಪುಟವಿಲ್ಲ, ತಮ್ಮದೇ ಪಕ್ಷ ಕೇಂದ್ರದಲ್ಲಿ ಅಧಿಕಾರದಲ್ಲಿದ್ದರೂ ಬಿಡಿಗಾಸಿನ ನೆರವೂ ಇಲ್ಲ. ಖುದ್ದು ಗೃಹ ಸಚಿವ, ಹಣಕಾಸು ಸಚಿವರು ರಾಜ್ಯಕ್ಕೆ ಭೇಟಿ ನೀಡಿ ಹೋದರೂ ರಾಜ್ಯದ ಬಗ್ಗೆ ಕಿಂಚಿತ್ತೂ ಮಮಕಾರ ತೋರಲಿಲ್ಲ. ಪ್ರತಿಪಕ್ಷಗಳ ಟೀಕೆಗೂ ಇದು ಆಹಾರವಾಯಿತು. ಆದರೂ ಯಡಿಯೂರಪ್ಪ ಕುಗ್ಗಲಿಲ್ಲ, ಅಳುಕಲಿಲ್ಲ. ಏಕಾಂಗಿ ಯೋಧನಂತೆ ಮಡಿಕೇರಿಯಿಂದ ಕಲಬುರಗಿವರೆಗೆ ಸುತ್ತಾಡಿದರು,. ತಾವೇ ಖುದ್ದು ಪರಿಹಾರ ಕಾರ್ಯಗಳ ನಿಗಾವಹಿಸಿದರು. ಇಳಿವಯಸ್ಸಿನಲ್ಲಿಯೂ ಅವರ ಕ್ರಿಯಾಶೀಲತೆ ನೋಡಿ ರಾಜ್ಯಕ್ಕೆ ರಾಜ್ಯವೇ ಬೆರಗಾಯಿತು.
ಅತಿವೃಷ್ಟಿ ಸಮಸ್ಯೆ ಮುಗಿಯಿತು ಎನ್ನುವಷ್ಟರಲ್ಲಿ ಸಂಪುಟ ರಚನೆ, ಅದರ ಬಳಿಕ ಖಾತೆ ಹಂಚಿಕೆ ಕಸರತ್ತಿನಲ್ಲಿ ಕೆಲದಿನಗಳು ಕಳೆದವು. ಎಲ್ಲವೂ ಒಂದು ಹಂತಕ್ಕೆ ಬಂತು ಎನ್ನುವಷ್ಟರಲ್ಲಿ ಕೊರೊನಾ ವಕ್ಕರಿಸಿದೆ. ಕೋವಿಒಡ್-೧೯ ಸೋಂಕು ನಿಯಂತ್ರಣದಲ್ಲೂ ಯಡಿಯೂರಪ್ಪನವರ ನಡೆ, ಪ್ರಯತ್ನ ಪ್ರತಿಪಕ್ಷಗಳ ಶ್ಲಾಘನೆಗೂ ಪಾತ್ರವಾಗಿದೆ. ಗಮನಿಸಬೇಕಾದ ಅಂಶವೆಂದರೆ ಅತಿವೃಷ್ಟಿ ಇರಲಿ, ಕೊರೊನಾ ಇರಲಿ, ಯಡಿಯೂರಪ್ಪನವರಿಗೆ ಸಂಪುಟದ ಹಳೆ ಸದಸ್ಯರಿಂದ ಅಷ್ಟಾಗಿ ಬೆಂಬಲ ಸಿಕ್ಕಿಲ್ಲ. ‘ಆಪರೇಷನ್’ಗೆ ಒಳಗಾಗಿ ಬಿಜೆಪಿಗೆ ಬಂದು ಸಚಿವರಾದವರು ಸಿಎಂ ಹೆಗೆಲಿಗೆ ಹೆಗಲು ಕೊಟ್ಟು ಕೆಲಸ ಮಾಡುತ್ತಿದ್ದಾರೆ. ಹಳಬರು ವರಿಷ್ಠರಿಗೆ ನಿಷ್ಠರಾಗಿ ಯಡಿಯೂರಪ್ಪನರಿಂದ ಅಂತರ ಕಾಪಾಡಿಕೊಂಡರೆ, ಹೊಸಬರು ಕೊಟ್ಟ ಮಾತಿನಂತೆ ಮಂತ್ರಿ ಮಾಡಿದ ಯಡಿಯೂರಪ್ಪನವರ ವಿಶ್ವಾಸಕ್ಕೆ ಚ್ಯುತಿ ಬಾರದಂತೆ ಕೆಲಸ ಮಾಡುತ್ತಿದ್ದಾರೆ.
ಬೊಕ್ಕಸವೂ ಖಾಲಿ: ರಾಜಕೀಯ ಅಡೆತಡೆಗಳು ಯಡಿಯೂರಪ್ಪನವರಿಗೆ ಹೊಸತೇನಲ್ಲ. ಅವರಿಗೆ ದೊಡ್ಡ ಸವಾಲು ಇರುವುದು ಹಣಕಾಸು ಖಾತೆ ನಿರ್ವಹಣೆಯಲ್ಲಿ. ಹಿಂದಿನ ಸರಕಾರಗಳ ಬೇಕಾಬಿಟ್ಟಿ ಯೋಜನೆಗಳಿಂದ ರಾಜ್ಯದ ಮೇಲೆ ಸಾಲದ ದೊಡ್ಡ ಹೊರೆ ಇದೆ. ವಿತ್ತೀಯ ಕೊರತೆ ಮಿತಿ ಕಾಪಾಡಿಕೊಂಡು, ಆರ್ಥಿಕ ಶಿಸ್ತು ಕಾಪಾಡಿಕೊಳ್ಳಬೇಕೆಂದರೆ ಹೊಸದಾಗಿ ಭಾರಿ ಪ್ರಮಾಣದ ಸಾಲ ಪಡೆಯುವಂತಿಲ್ಲ. ಕೇಂದ್ರ ಸರಕಾರವೂ ರಾಜ್ಯಕ್ಕೆ ಬರಬೇಕಾದ ಅನುದಾನ, ತೆರಿಗೆ ಪಾಲನ್ನು ಸಕಾಲದಲ್ಲಿ ಬಿಡುಗಡೆ ಮಾಡುತ್ತಿಲ್ಲ. ಬಜೆಟ್ ಮಂಡನೆ ವೇಳೆ ಹಣಕಾಸು ಖಾತೆ ಹೊಂದಿ ಮುಖ್ಯಮಂತ್ರಿಯೊಬ್ಬರು ತಮ್ಮದೇ ಪಕ್ಷ ಕೇಂದ್ರದಲ್ಲಿದ್ದರೂ, ‘ಕೇಂದ್ರದಿಂದ ನೆರವು ಸಿಗುತ್ತಿಲ್ಲ’ ಎಂದು ಸದನದಲ್ಲೇ ಹೇಳಿದ್ದು ಇದೇ ಮೊದಲು.
ಇದೆಲ್ಲದರ ನಡುವೆಯೂ ಮುಖ್ಯಮಂತ್ರಿಯಾಗಿ ಒಂದು ವರ್ಷದ ಅವಧಿಯಲ್ಲಿ ಯಡಿಯೂರಪ್ಪನವರ ಕಾರ್ಯವೈಖರಿ ಬಗ್ಗೆ ಯಾರದ್ದೂ ಆಕ್ಷೇಪವಿಲ್ಲ. ಬಿಜೆಪಿಯಲ್ಲಿನ ಮುಖಂಡರೇ ಹೇಳುವಂತೆ ಯಡಿಯೂರಪ್ಪ ‘ಹಠವಾದಿ’. ಅಂದುಕೊಂಡಿದ್ದನ್ನು ಸಾಧಿಸುವವರೆಗೂ ವಿರಮಿಸುವುದು ಅವರಿಗೆ ಗೊತ್ತಿಲ್ಲ. ರಾಜ್ಯದ ಬಗ್ಗೆ ಅವರಿಗೆ ಸ್ಪಷ್ಟ ಕನಸುಗಳಿವೆ, ರೈತ ನಾಯಕನಾಗಿ ರೈತರಿಗೆ ಮತ್ತಷ್ಟು ನೆರವು ನೀಡಬೇಕೆಂಬ ಹಂಬಲವಿದೆ. ಜನಪರ ಯೋಜನೆಗಳನ್ನು ನೀಡಬೇಕೆಂಬ ಆಸೆಯಿದೆ. ಇನ್ನೂ ಎರಡೂವರೆ ವರ್ಷ ಅಧಿಕಾರವಿದೆ. ‘ಛಲದಂಕ ಮಲ್ಲ’ನ ಒಳಗಿರುವ ‘ಹಠವಾದಿ’ ಎದ್ದುಕುಳಿತಿದ್ದಾನೆ. ೭೭ರಲ್ಲಿರುವ ಯಡಿಯೂರಪ್ಪನವರಿಗೆ ಇದು ಕೊನೆಯ ಅವಕಾಶ. ಈ ಸಲವೂ ಯಡಿಯೂರಪ್ಪ ರಾಜಕಾರಣದ ‘ದುರಂತ ನಾಯಕ’ ಆಗದಿರಲಿ.
