Sample Page - Page 40 of 180

ಕುಲ ಕುಲ ಕುಲವೆಂದು ಹೊಡೆದಾಡದಿರಿ….

ನಾಡು ನುಡಿ

-

November 22, 2021

‘ನಾವು ಕುರುಬರು. ನಮ್ಮ ದೇವರು ಬೀರಯ್ಯ. ಕಾವ ನಮ್ಮಜ್ಜ. ನರಕುರಿ ಹಿಂಡುಗಳ’ ಎಂಬ ವಿನೀತ ಜಾತಿ ಭಾವದಿಂದ ‘ಕುಲ
ಕುಲ ಕುಲವೆಂದು ಹೊಡೆದಾಡದಿರಿ ನಿಮ್ಮ ಕುಲದ ನೆಲೆಯನೆನಾದರೂ ಬಲ್ಲಿರಾ…; ಎಂಬ ಪಾರಮಾರ್ಥಿಕ ದಿಗ್ದರ್ಶನದಿಂದ
ದಾಸಶ್ರೇಷ್ಠರಾಗಿ ಕನಕದಾಸರು ಜನ ಮಾನಸದಲ್ಲಿ ನಿಷ್ಕಲ್ಮಶ ಭಕ್ತನಾಗಿ ನೆಲೆ ನಿಂತಿದ್ದಾರೆ.

ಕನಕದಾಸರು ಈಗಿನ ಹಾವೇರಿ ಜಿಲ್ಲೆ ಶಿಗ್ಗಾಂವ್ ತಾಲೂಕಿನ ಬಾಡ ಗ್ರಾಮದಲ್ಲಿ ಹದಿನೈದನೇ ಶತಮಾನದ ಕೊನೆಭಾಗದಲ್ಲಿ
ಜನಿಸಿದರು. ತಂದೆ ಬೀರಪ್ಪ, ತಾಯಿ ಬಚ್ಚಮ್ಮ ಅವರ ಏಕೈಕ ಪುತ್ರ. ತಂದೆ-ತಾಯಿ ತಿರುಪತಿ ತಿಮ್ಮಪ್ಪನ ಭಕ್ತರಾಗಿದ್ದರಿಂದ
ತಿಮ್ಮಪ್ಪ ಎಂದು ನಾಮಕರಣ. ಬಾಲ್ಯದಲ್ಲಿಯೇ ವ್ಯಾಕರಣ, ತರ್ಕ, ಮೀಮಾಂಸೆ, ಗರಡಿ ಸಾಧನೆ, ಕುಸ್ತಿ, ಕತ್ತಿವರಸೆಯಲ್ಲಿ
ಪರಿಣತಿ. ತಂದೆ ವಿಜಯ ನಗರ ಅರಸರಲ್ಲಿ ದಂಡನಾಯಕ. ಚಿಕ್ಕ ವಯಸ್ಸಿನಲ್ಲಿ ತಂದೆ ಬೀರಪ್ಪ ಮರಣ ಹೊಂದಿದ್ದರಿಂದ
ತಿಮ್ಮಪ್ಪ ದಂಡನಾಯಕನಾಗಿ ನೇಮಕಗೊಂಡರು. ದಕ್ಷತೆ, ಶೌರ್ಯದಿಂದ ಯುದ್ದಗಳಲ್ಲಿ ಭಾಗವಹಿಸಿದ್ದರು ಎಂದು
ಇತಿಹಾಸದ ಪುಟಗಳಿಂದ ತಿಳಿದಿದೆ.

ಒಮ್ಮೆ ಭೂ ಅಗೆತದಲ್ಲಿ ಅಪಾರ ಸಂಪತ್ತು ಒದಗಿಬಂದಿತು. ಆದ್ದರಿಂದ ತಿಮ್ಮಪ್ಪ ಕನ್ನಕನೆಂದ ಕರೆದರೆಂತಲೂ ಐತಿಹ್ಯ ಇದೆ.
ದೊರೆತ ಸಂಪತ್ತಿನಿಂದ ಬಾಡ ಗ್ರಾಮದಲ್ಲಿ ಭವ್ಯವಾದ ದೇಗುಲ ನಿರ್ಮಿಸಿ ಆದಿಕೇಶವ ಮೂರ್ತಿ ಪ್ರತಿಷ್ಠಾಪಿದರು. ತಿರುಪತಿ
ಮಹಾಕ್ಷೇತ್ರದ ಪೂಜಾಪದ್ಧತಿ ಅಳವಡಿಸಿದ್ದರು. ಆದಿಕೇಶವ ಅಂಕಿತ ನಾಮದಲ್ಲಿಯೇ ದೇವರನಾಮ ಬರೆಯಲು ತೊಡಗಿಕೊಂಡರು
ಎಂದು ಹೇಳಲಾಗಿದೆ.

ದಂಡನಾಯಕನಾಗಿದ್ದರೂ ದೇವರಲ್ಲಿ ಅಪಾರ ಭಕ್ತಿ. ಪತ್ನಿ ಹಾಗೂ ತಾಯಿ ಇಹಲೋಕ ತ್ಯಜಿಸಿದ ನಂತರ ಸಂಸಾರದ
ಜಿಗುಪ್ಸೆಯಿಂದ ದೇವರಿಗೆ ಸಂಪೂರ್ಣ ತಮ್ಮ ಜೀವನ ಮುಡುಪಾಗಿಟ್ಟರು. ಕನಕದಾಸರಾಗಿ ಅಜರಾಮರಾಗಿದ್ದಾರೆ. ಅಧಿಕಾರ
ತೊರೆದು ವ್ಯಾಸರಾಯರ ಶಿಷ್ಯರಾದರು. ಜ್ಞಾನರ್ಜನೆ ಪಡೆದು ತೀರ್ಥಕ್ಷೇತ್ರಗಳ ಯಾತ್ರೆ ಮಾಡಿದರು.

ಉಡುಪಿಯ ಕನಕನ ಕಿಂಡಿ ಈಗಲೂ ಪ್ರಸಿದ್ಧ. ಬೇಲೂರಿನಲ್ಲಿ ವೈಕುಂಠದಾಸರೊಡನೆ ಬಹಳ ದಿನಗಳ ಸಾಂಗತ್ಯ. ಆನಂತರ
ವಿಜಯನಗರದಲ್ಲಿ ವ್ಯಾಸರಾಯರ ಸನ್ನಿಧಿಯಲ್ಲಿ ಜ್ಞಾನಾರ್ಜನೆ. ತತ್ವೋಪದೇಶಗಳಿಂದ ಮೂಢನಂಬಿಕೆ ಹೋಗಲಾಡಿಸಲು
ಪ್ರಯತ್ನಿಸದರು.

ಕನಕದಾಸರು ಮೋಹನ ತರಂಗಿಣಿ, ನಳಚರಿತ್ರೆ, ರಾಮಧಾನ್ಯ ಚರಿತೆ, ಹರಿಭಕ್ತಿಸಾರ, ನೃಸಿಂಹಸ್ತವ(ಉಪಲಬ್ಧವಿಲ್ಲ) ಐದು
ಮುಖ್ಯ ಕಾವ್ಯಗಳು ರಚಿಸಿದ್ದಾರೆ. ಮೋಹನ ತರಂಗಿಣಿಯಲ್ಲಿ ಕೃಷ್ಣ ಚರಿತೆ ಆಗಿದೆ. ಇದರಲ್ಲಿ ಪಾತ್ರಸೃಷ್ಟಿ, ಜೀವನದೃಷ್ಟಿ,
ವರ್ಣನಾ ವೈಖರಿ, ಪದಜೋಡಣೆ ವಿಶಿಷ್ಟವಾಗಿದೆ. ನಳ ಚರಿತ್ರೆ ಭಾಮಿನಿ ಷಟ್ಪದಿಯಲ್ಲಿ ರಚಿತವಾದ ನಳ ದಮಯಂತಿ ಕಥೆ.

ರಾಮಧಾನ್ಯ ಚರಿತ್ರೆಯಲ್ಲಿ ಕೆಳವರ್ಗದ ಧಾನ್ಯ ರಾಗಿ ಹಾಗೂ ಧನಿಕರ ಧಾನ್ಯ ಅಕ್ಕಿ ನಡುವಿನ ಸಂಭಾಷಣೆ ಮೂಲಕ ರಾಗಿ ತನ್ನ ಔನ್ಯತ್ಯ ಸಾಬೀತು ಪಡಿಸಿದ ಬಗೆ. ರಾಮಧಾನ್ಯ ಎಂಬ ಹೆಸರು ಪಡೆದ ಬಗೆ ನಿರೂಪಿಸಲಾಗಿದೆ. ಹರಿ ಭಕ್ತಸಾರ 110 ಭಕ್ತಿ ಪದ್ಯದ ಗ್ರಂಥ. ಕನ್ನಡದ ಭಗವದ್ಗೀತೆಯಂತಿದೆ.ಕೀರ್ತನೆ, ಉಗಾಭೋಗ, ಮುಂಡಿಗೆ, ಕಾವ್ಯ ಕನದದಾಸರ ಕಾವ್ಯ ಪ್ರಾಕಾರಗಳು. ತರಕಾರಿಗಳನ್ನು ಬಳಸಿಕೊಂಡು
ಮುಂಡಿಗೆಗಳ ರೂಪದಲ್ಲಿ ನಿಗೂಡಾರ್ಥ ಕಾವ್ಯಸೃಷ್ಟಿ ಅದ್ಭುತ.

ಪರಮ ಪುರುಷ ನೀನೆಲ್ಲಿಕಾಯಿ. ಸರಸಿಯೊಳಗೆ ಕರಿಕೂಗಲಕಾಯಿ. ಹಿರಿದು ಮಾಡಿದ ಪಾಪ ನುಗ್ಗೆಕಾಯಿ, ಹರಿ ನಿನ್ನ ಧ್ಯಾನ ಬಾಳೇಕಾಯಿ, ಸರುವ ಜೀವರ್ಗುಣಿಸಿಯೂ ಬದನೆಕಾಯಿ, ರಿಷಡ್ವರ್ಗಗಳೊದಗಿಲಿಕಾಯಿ ಎಂಬ ಪರಮ ಪುರುಷ ನೀನೆಲ್ಲಿಕಾಯಿ ಮುಂಡಿಗೆ ಕಾವ್ಯದ ಸೃಷ್ಟಿಯ ನಿಲುಕದ ಸಂವಹನ.

ನೀ ಮಾಯೆಯೊಳಗೋ, ನಿನ್ನೊಳು ಮಾಯೆಯೋ, ನೀ ದೇಹದೊಳಗೊ, ನಿನ್ನೊಳು ದೇಹವೊ… ಕೀರ್ತನೆ ಇಂದಿಗೂ
ಪ್ರಸ್ತುತ. ಮಾಯೆಯ ಪ್ರಭಾವದಿಂದ ಪ್ರಕ್ಷುಬ್ಧತೆಗೆ ಜಾರಿದ ಸಮಾಜಕ್ಕೆ ಸಾಂತ್ವನ ನೀಡುವ ಸಾಹಿತ್ಯ ಕನಕದಾಸರ ಕೊಡುಗೆ.

ಕನ್ನಡ ಸಾಹಿತ್ಯ ಶ್ರೀಮಂತಗೊಳಿಸಿದ ದಾಸ ಶ್ರೇಷ್ಟ. ಭಕ್ತಿ ಮಾರ್ಗದಿಂದ ಮುಕ್ತಿ ಸಾಧ್ಯ ಎಂಬ ನಿಲುವು ತಳೆದ ಧೀಮಂತ ಇಂದಿಗೂ ಪೂಜನೀಯ. ಅವರ ಸಾಹಿತ್ಯ ಅಧ್ಯಯನದಿಂದ ಸಮಾಜದ ಪರಿವರ್ತನೆ ಮಾರ್ಗ. ಕನ್ನಡ ನಾಡಿನಲ್ಲಿ ಕನಕ ದಾಸರ ಭಕ್ತಿ, ಕಾವ್ಯ, ತ್ಯಾಗ, ಜಾತ್ಯತೀತ ಭಾವ ಸದಾ ಅಜರಾಮರ.

ಭೂಮಿಯೆ ಬಾಯಿಬಿಟ್ಟರೆ ಅದರ ಮೇಲಿನ ಮನೆಯಾದರು ಹೇಗೆ ಉಳಿದೀತು?

ಕನ್ನಡಪ್ರೆಸ್.ಕಾಮ್ ವರದಿ

-

November 21, 2021

0

ಭೂಮಿಯೆ ಬಾಯಿಬಿಟ್ಟರೆ ಅದರ ಮೇಲಿನ ಮನೆಯಾದರು ಹೇಗೆ ಉಳಿದೀತು?

ಸುಮಾವೀಣಾ

ಸಿಡಿಲು ಹೊಡೆವಡೆ ಹಿಡಿದ ಕೊಡೆ ಕಾವುದೆ– ‘ಕರುಣಾ ರಸ’ಕ್ಕೆಂದೇ ಮೀಸಲಾಗಿರುವ ಕಾವ್ಯ ಎಂದರೆ ರಾಘವಾಂಕನ ‘ಹರಿಶ್ಚಂದ್ರಕಾವ್ಯ’ ಈ ಕಾವ್ಯದ ವಸಿಷ್ಠ ವಿಶ್ವಾಮಿತ್ರರ ಸಂವಾದದಲ್ಲಿ ಪ್ರಸ್ತುತ ಮಾತು ಬರುತ್ತದೆ. ವಿಶ್ವಾಮಿತ್ರರು ತಾವು ಒಡ್ಡುವ ಸವಾಲುಗಳಿಂದ ಹರಿಶ್ಚಂದ್ರ ಯಾವುದೇ ಕಾರಣಕ್ಕೂ ತಪ್ಪಿಸಿಕೊಳ್ಳಲು ಸಾಧ್ಯವಿಲ್ಲವೆಂದು ಹೇಳುವ ಮಾತು.

ಸಿಡಿಲು ಅಂದರೆ ಅಲ್ಲೊಂದು ಅಬ್ಬರ,ಅಪಾಯ ,ಕೋಪ ಇತ್ಯಾದಿಗಳೆ ನೆನಪಾಗುವುದು. ಬಿರುಗಾಳಿ ಸಹಿತ ಮಳೆಗೆ ಕೆಲವೊಮ್ಮೆ ನಾವು ಹಿಡಿಯುವ ಕೊಡೆಗಳು ತಡೆಯುವುದಿಲ್ಲ ಇನ್ನು ಸಿಡಿಲಿಗೆ ತಡೆಯುತ್ತದೆಯೇ ಖಂಡಿತಾ ಇಲ್ಲ ಎಂದೇ ಅರ್ಥ ಅಲ್ವೆ! ಉಪಮೆಯ ಮೂಲಕ ಲೋಕಾನುಭವವನ್ನು ಹೇಳುವ ಈ ಮಾತು ಮಾರ್ಮಿಕವಾಗಿದೆ.

ರಾಘವಾಂಕನೆ ಹರಿಶ್ಚಂದ್ರ ಕಾವ್ಯದಲ್ಲಿ ವಿಶ್ವಾಮಿತ್ರರನ್ನು ಮುನಿರಕ್ಕಸ ಎಂದು ಉಲ್ಲೇಖಿಸಿರುವಂತೆ ಅಂಥ ದೈತ್ಯ ಮುನಿಯ ಸವಾಲುಗಳನ್ನು ರಾಜನೊಬ್ಬ ಅದರಲ್ಲೂ ಉದ್ದೇಶಪೂರ್ವಕವಾಗಿ ಸವಾಲುಗಳನ್ನು ಒಡ್ಡುವಾಗ ಹರಿಶ್ಚಂದ್ರನ ಸಂಯಮ,ಸತ್ಯನಿಷ್ಟುರತೆ ಇತ್ಯಾದಿಗಳು ತಡೆಯಲಾರವು ಎನ್ನುವ ಅರ್ಥದಲ್ಲಿಯೇ ಸಿಡಿಲು ಹೊಡೆವಡೆ ಹಿಡಿದ ಕೊಡೆ ಕಾವುದೆ ಎಮಬ ಮಾತು ಬಂದಿದೆ

ಜೊತೆಗೆ ವಸಿಷ್ಟರಿಗೂ ಕೂಡ ನಾನು ಭೋರ್ಗರೆದರೆ ನಿನ್ನ ಬೋಧನೆಗಳೂ ಏನೂ ಮಾಡಲು ಸಾಧ್ಯವಿಲ್ಲ. ಸುಂಕದವರ ಹತ್ತಿರ ಕಷ್ಟ ಸುಖ ಹೇಳಿಕೊಳ್ಳಲಾಗದು, ಆಗುವ ಗಂಡಾಂತರಗಳನ್ನು ತಪ್ಪಿಸಲು ಸಾಧ್ಯವಿಲ್ಲ ನಿಮ್ಮ ಶಿಷ್ಯ ನನಗೆಷ್ಟರವನು ಎಂದು ಅಹಂಕಾರದಿಂದ ಬೀಗುತ್ತಾ ಹರಿಶ್ಚಂದ್ರನಿಂದ ಅನಿವಾರ್ಯವಾಗಿ ಸುಳ್ಳನ್ನು ಹೇಳಿಸುವ ಪ್ರಯತ್ನ ಮಾಡುತ್ತಾನೆ.

ಸಂಪೂರ್ಣ ಭೂಮಿಯೇ ಲಯವಾಗುತ್ತಿರುವಾಗ ಭೂಮಿಯ ಮೇಲೆ ನಿರ್ಮಿತವಾಗಿರುವ ಚಿಕ್ಕ ಮನೆಯೊಂದು ತನ್ನ ಅಸ್ತಿತ್ವವನ್ನು ಉಳಿಸಿಕೊಳ್ಳಲು ಸಾಧ್ಯವೇ ಎಂಬ ಅರ್ಥ ಇಲ್ಲಿದೆ.

This image has an empty alt attribute; its file name is suma-veena-2-edited.jpg

ವೃತ್ತಿಯಿಂದ ಉಪನ್ಯಾಸಕಿ ಪ್ರವೃತ್ತಿಯಿಂದ ಲೇಖಕಿ ಆಗಿರುವ ಸುಮಾವೀಣಾರ ಬರೆಹಗಳು ನಾಡಿನ ಪ್ರಮುಖ ಮುದ್ರಿತ ಮತ್ತು ಅಂತರ್ಜಾಲ ಪತ್ರಿಕೆಗಳಲ್ಲಿ ಪ್ರಕಟವಾಗಿ ಜನಮನ್ನಣೆ ಗಳಿಸಿವೆ. ಇವೆ ಸಂಶೋಧನಾತ್ಕ ಬರೆಹಗಳು ಅನನ್ಯವಾಗಿದ್ದು ISBN &ISSN ಸಂಖ್ಯೆಗಳಲ್ಲಿ ಅಚ್ಚಾಗಿವೆ. ಉತ್ತಮ ವಾಗ್ಮಿಯೂ ಆಗಿರುವ ಇವರ ಸೋದಾಹರಣ ಭಾಷಣಗಳು, ಕತೆಗಳು ಆಕಾಶವಾಣಿಯಲ್ಲಿ ರಾಜ್ಯವ್ಯಾಪಿ ಪ್ರಸಾರ ಆಗಿವೆ. ಇವರ ‘ನಲಿವಿನ ನಾಲಗೆ’, ‘ಮನಸ್ಸು ಕನ್ನಡಿ’, ‘ಸೂರ್ಪನಖಿ ಅಲ್ಲ ಚಂದ್ರನಖಿ’, ಲೇಖಮಲ್ಲಿಕಾ ಕೃತಿಗಳು ಬಿಡುಗಡೆಯಾಗಿದ್ದು ಸಾಹಿತ್ಯಾಸಕ್ತರ ಅಪಾರ ಮೆಚ್ಚುಗೆಗೆ ಪಾತ್ರವಾಗಿವೆ.

Indian Stock Market: ಷೇರುಪೇಟೆಯಲ್ಲಿ ಕಂಪೆನಿಗಳ ನಡುವೆ ಹೋಲಿಕೆ ಸಲ್ಲ

ಕೆ ಜಿ ಕೃಪಾಲ್

-

November 21, 2021

0

Indian Stock Market: ಷೇರುಪೇಟೆಯಲ್ಲಿ ಕಂಪೆನಿಗಳ ನಡುವೆ ಹೋಲಿಕೆ ಸಲ್ಲ

ಐಪಿಒ ಗಳನ್ನು ತೇಲಿಬಿಟ್ಟ ಸಂದರ್ಭದಲ್ಲಿ ವೈವಿಧ್ಯಮಯ ಸಮಾಚಾರಗಳನ್ನೂ ಸಹ ತೇಲಿಬಿಡಲಾಗುತ್ತದೆ. ಕೆಲವು ಕಂಪನಿಯ ಕಡೆಯಿಂದ ಬಂದರೆ ಮತ್ತೆ ಕೆಲವು ವಿಶ್ಲೇಷಕರ, ಮಾಧ್ಯಮಗಳ ಮೂಲಕ ಪ್ರಸ್ತುತಗೊಳ್ಳುತ್ತವೆ. ಇತ್ತೀಚಿನ ಐ ಪಿ ಒ ಗಳ ಸಂದರ್ಭದಲ್ಲಿ ಆ ಕಂಪನಿಯನ್ನು ಈಗಾಗಲೇ ಲಿಸ್ಟಿಂಗ್‌ ಆಗಿ ಚುರುಕಾಗಿರುವ ಕಂಪನಿಗಳಿಗೆ ಹೋಲಿಸುತ್ತಿದ್ದಾರೆ. ಇದನ್ನು ಕಣ್ಮುಚ್ಚಿ ಅನುಸರಿಸಿ, ಅಳವಡಿಸುವುದು ಸರಿಯಲ್ಲ. ಲಿಸ್ಟಿಂಗ್‌ ಆದ ಕಂಪನಿಗಳು ದೀರ್ಘಸಮಯದಲ್ಲಿ ಕಲ್ಪಿಸಿಕೊಟ್ಟಂತಹ ಲಾಭಗಳನ್ನೂ ಸಹ ಪರಿಶೀಲಿಸಿ ನಿರ್ಧರಿಸಬೇಕು.

ಪೇಟಿಎಂ ಕಂಪನಿಯ ಷೇರಿನ ಬೆಲೆ ಸುಮಾರು ಶೇ.27 ರಷ್ಟು ಕುಸಿದಿದೆ ಎಂದು ಅದನ್ನು 2010 ರಲ್ಲಿನ ಮತ್ತೊಂದು ಭಾರಿ ಗಾತ್ರದ ಷೇರು ವಿತರಣೆ ಮಾಡಿದ ಕೋಲ್‌ ಇಂಡಿಯಾ ಕಂಪನಿಗೆ ಹೋಲಿಸುವುದು ಸರಿಯಲ್ಲ.

ಪೇಟಿಎಂ ಕಂಪನಿಯು ರೂ.1 ರ ಮುಖಬೆಲೆಯ ಷೇರನ್ನು ರೂ.2,150 ಕ್ಕೆ ವಿತರಿಸಿದೆ. ಆದರೆ ಕೋಲ್‌ ಇಂಡಿಯಾ ವಿತರಿಸಿದ ಷೇರಿನ ಮುಖ ಬೆಲೆ ರೂ.10 ವಿತರಿಸಿದ ಬೆಲೆ ರೂ.245.00

ಪೇಟಿಎಂ ಕಳೆದ ಕೆಲವು ವರ್ಷಗಳಿಂದಲೂ ಉತ್ತಮ ಎನ್ನಬಹುದಾದ ಡಿವಿಡೆಂಡ್ ನ್ನು ಹೂಡಿಕೆದಾರರರಿಗೆ ನೀಡಿಲ್ಲ. ಆದರೆ ಕೋಲ್‌ ಇಂಡಿಯಾ ವಿತರಣೆಯಾದಾಗಲಿಂದಲೂ ಸತತವಾಗಿ ಲಾಭಗಳಿಸಿ ಷೇರುದಾರರಿಗೆ ಸುಮಾರು ರೂ.353 ಕ್ಕೂ ಹೆಚ್ಚಿನ ಡಿವಿಡೆಂಡ್‌ ವಿತರಿಸಿದೆ, 2016 ರಲ್ಲಿ ಮತ್ತು 2019 ರಲ್ಲಿ ಷೇರುದಾರಿಂದ ಹಿಂಕೊಳ್ಳುವ ಪ್ರಕ್ರಿಯೆ ನಡೆಸಿದೆ. ಅಂದರೆ ಮೊದಲಿನಿಂದಲೂ ಷೇರುದಾರರ ಹಿತ ಕಾಪಾಡಿದೆ.

2010 ರಲ್ಲಿ ಕೋಲ್‌ ಇಂಡಿಯಾ ಷೇರು ವಿತರಣೆ ಮೂಲಕ ಸಂಗ್ರಹಿಸುವ ಗುರಿ ಇದ್ದುದು ರೂ.15,000 ಕೋಟಿ ಆದರೆ ಆಗ ಸಂಗ್ರಹಣೆಯಾಗಿದ್ದು ರೂ.1.85 ಲಕ್ಷ ಕೋಟಿಯಷ್ಟು. ಲಿಸ್ಟಿಂಗ್‌ ಆದ ವರ್ಷ ರೂ.357 ರವರೆಗೂ ಏರಿಕೆ ಕಂಡು, 2011 ಮತ್ತು 2014, 2015 ರಲ್ಲಿ ರೂ.400 ರ ಗಡಿದಾಟಿದ ಸಂದರ್ಭಗಳಿವೆ.

2013 ರಲ್ಲಿ ರೂ.238 ರ ಸಮೀಪಕ್ಕೆ, 2014 ಲ್ಲಿ ರೂ.240 ರ ಸಮೀಪಕ್ಕೆ, 217 ರಲ್ಲಿ ರೂ.234 ರ ಸಮೀಪಕ್ಕೆ ತಲುಪಿ, 2018 ರಲ್ಲಿ ರೂ.228 ರ ಸಮೀಪ, 2019 ರಲ್ಲಿ ರೂ.177 ರ ಸಮೀಪಕ್ಕೆ 2020 ರಲ್ಲಿ ರೂ.109 ರ ಸಮೀಪಕ್ಕೆ ಕುಸಿದು, ರೂ.123 ರಿಂದ ರೂ.203 ರ ಅಂತರದಲ್ಲಿ ಏರಿಳಿತ ಕಂಡಿದೆ. ಐ ಪಿ ಒ ಮೂಲಕ ಅಲಾಟ್‌ ಆದವರಿಗೆ ಮಾರಾಟಮಾಡಲು ಅವಕಾಶ ಕಲ್ಪಿಸಿದೆ ಮತ್ತು ಆಕರ್ಷಕ ಡಿವಿಡೆಂಡ್‌ ಗಳನ್ನು ವಿತರಿಸಿ ಹೂಡಿಕೆದಾರರ ಹಿತ ಕಾಪಾಡಿದೆ.

ಮತ್ತೊಂದು ಪ್ರಮುಖ ಅಂಶ ಎಂದರೆ ಪೇಟಿಎಂ ಕಂಪನಿಯ ಷೇರಿನ ಮುಖಬೆಲೆಯನ್ನು ಜೂನ್‌ 2021 ರಲ್ಲಿ ರೂ.10 ರಿಂದ ರೂ.1 ಕ್ಕೆ ಸೀಳಲಾಗಿದೆ. ಅಂದರೆ ಐಪಿಒ ನಲ್ಲಿ ರೂ.10 ರ ಮುಖಬೆಲೆ ಷೇರು ರೂ.21,500 ರಲ್ಲಿ ವಿತರಿಸಲು ಸಾರ್ವಜನಿಕ ಸ್ಫಂದನೆ ಇರಲಾರದೆಂಬ ಕಾರಣಕ್ಕಾಗಿ ಈ ಕ್ರಮಕ್ಕೆ ಕಂಪನಿ ಮುಂದಾಗಿದೆ. ಇದು ಆಡಳಿತ ಮಂಡಳಿಯ ಉದ್ದೇಶಕ್ಕೆ ಹಿಡಿದ ಕನ್ನಡಿಯಾಗಿದೆ.

ಮತ್ತೊಂದೆಡೆ ಪೇಟಿಎಂ ಷೇರಿನ ಏರಿಳಿತವನ್ನು ಸಾರ್ವಜನಿಕ ವಲಯದ ಕಂಪನಿಯಾದ ನ್ಯೂ ಇಂಡಿಯಾ ಅಶುರನ್ಸ್ ನ ರೂ.800 ರಂತೆ ವಿತರಿಸಿದ ಐಪಿಒಗೆ ಹೋಲಿಸುತ್ತಾರೆ. ನ್ಯೂ ಇಂಡಿಯಾ ಅಶುರನ್ಸ್‌ ರೂ.5 ಮುಖಬೆಲೆ ಹೊಂದಿದೆ. ಆದರೆ ವಿತರಣೆ ನಂತರದಲ್ಲಿ ಅಂದರೆ 2018 ರಲ್ಲಿ 1:1 ರ ಅನುಪಾತದ ಬೋನಸ್‌ ಷೇರು ವಿತರಿಸಿದೆ. ಇದರಿಂದ ಷೇರಿನ ಮೇಲಿನ ಹೂಡಿಕೆಯು ರೂ.400 ರಾಯಿತು. ಮೂರು ಬಾರಿ ಡಿವಿಡೆಂಡ್‌ ಸಹ ವಿತರಿಸಿದ್ದಾರೆ. ಜನರಲ್ ಇನ್ಶೂರನ್ಸ್‌ ಕಂಪನಿ ಆಫ್‌ ಇಂಡಿಯಾ ಸಹ ರೂ.5 ರಮುಖಬೆಲೆ ಷೇರನ್ನು 2017 ರಲ್ಲಿ ರೂ.912 ರಂತೆ ಐ ಪಿ ಒ ವಿತರಣೆ ಮಾಡಿ 2018 ರಲ್ಲಿ 1:1 ರ ಅನುಪಾತದ ಬೋನಸ್‌ ಷೇರು ವಿತರಿಸಿದೆ. ಇನ್ನು ಹಿಂದೂಸ್ಥಾನ್‌ ಏರೋನಾಟಿಕ್ಸ್‌ ಕಂಪನಿ 2018 ರಲ್ಲಿ ರೂ.1,215 ರಂತೆ ಐಪಿಒ ಮೂಲಕ ವಿತರಣೆ ಮಾಡಿದರೂ ಇದುವರೆಗೂ ಪ್ರತಿ ಷೇರಿಗೆ ರೂ.93 ರಷ್ಠು ಡಿವಿಡೆಂಡ್‌ ವಿತರಿಸುವ ಮಟ್ಟದಲ್ಲಿದೆ.

ಷೇರು ವಿತರಣೆ ನಂತರದಲ್ಲಿ ವಿತರಣೆ ಬೆಲೆಗಿಂತ ಕಡಿಮೆ ದರದಲ್ಲಿ ವಹಿವಾಟಾಗುತ್ತಿತ್ತು. 2020 ರಲ್ಲಿ ಮತ್ತು ಈ ವರ್ಷ ವಿತರಣೆ ಬೆಲೆಗಿಂತ ಹೆಚ್ಚಿನ ಬೆಲೆಯಲ್ಲಿ ವಹಿವಾಟಾಗುತ್ತಿದೆ. ಈ ವರ್ಷ ಈ ಷೇರನ್ನು ಡೆರಿವೇಟೀವ್ಸ್‌ ಗುಂಪಿಗೆ ಸೇರಿಸಿದ್ದು ಈ ಕಂಪನಿಯ ಷೇರಿನಲ್ಲಿ ಮಿಂಚು ಸಂಚರಿಸುವಂತೆ ಮಾಡಿತು.

ಒಂದು ಉತ್ತಮ ಕಂಪನಿಯ ಷೇರಿನ ಬೆಲೆಯು ಕುಸಿತ ಕಂಡರೂ, ಆಂತರಿಕ ಸಾಮರ್ಥ್ಯದ ಕಾರಣ ಪೇಟೆಯಲ್ಲಿ ರಭಸದ ಏರಿಕೆಯಿಂದ ಹೂಡಿಕೆದಾರರನ್ನು ಹರ್ಷಿತಗೊಳಿಸುತ್ತವೆ. ಆದರೆ ಆ ಸಮಯದವರೆಗೂ ಕಾಯಬೇಕಾದ ಗುಣವನ್ನು ಅಳವಡಿಸಿಕೊಳ್ಳಬೇಕು. ಪೇಟೆಗಳಲ್ಲಿ, ಮಾಧ್ಯಮಗಳಲ್ಲಿ ಹರಿದಾಡುವ ವೈವಿಧ್ಯಮಯ ವಿಶ್ಲೇಷಣೆಗಳನ್ನು ತುಲನೆಮಾಡಿ ನಿರ್ಧರಿಸಿದರೆ ಮಾತ್ರ ಬಂಡವಾಳ ಸ್ವಲ್ಪಮಟ್ಟಿನ ಸುರಕ್ಷತೆ ಕಾಣಬಹುದಲ್ಲವೇ?

ನೆನಪಿರಲಿ: ಉಳಿಸಿದ ಹಣ -ಗಳಿಸಿದ ಹಣ. ಈ ಅಂಕಣ ಷೇರು ಪೇಟೆಯ ಚಟುವಟಿಕೆಯಾಧರಿತ ಸುದ್ದಿ ವಿಶ್ಲೇಷಣೆ ಮಾತ್ರ . ಅಂತಿಮವಾಗಿ ಹೂಡಿಕೆ ನಿರ್ಧಾರ ಯಾವಾಗಲು ನಿಮ್ಮದೇ ಆಗಿರುತ್ತದೆ. ಅಂಕಣಕಾರರಾಗಲಿ ,ಕನ್ನಡಪ್ರೆಸ್ .ಕಾಮ್ ಆಗಲಿ ನಿಮ್ಮ ಹೂಡಿಕೆ ನಿರ್ಧಾರಗಳಿಗೆ ಜವಾಬ್ದಾರಿ ಆಗದು.

ಕಚಗುಳಿ ಇಡುತ್ತ ಆಪ್ತ ಸಂವಾದ ನಡೆಸಿಕೊಟ್ಟ ಚೇತನ್ ಭಗತ್; ಸಾಟಿ ಇಲ್ಲದ ಸ್ಟಾರ್ಟಪ್ ಸಂಸ್ಕೃತಿಯ ತವರು ಬೆಂಗಳೂರು!

ವಿಜ್ಞಾನ ಮತ್ತು ತಂತ್ರಜ್ಞಾನ

ಕನ್ನಡಪ್ರೆಸ್.ಕಾಮ್ ವರದಿ

-

November 18, 2021

0

ಕಚಗುಳಿ ಇಡುತ್ತ ಆಪ್ತ ಸಂವಾದ ನಡೆಸಿಕೊಟ್ಟ ಚೇತನ್ ಭಗತ್; ಸಾಟಿ ಇಲ್ಲದ ಸ್ಟಾರ್ಟಪ್ ಸಂಸ್ಕೃತಿಯ ತವರು ಬೆಂಗಳೂರು!

BENGALURU NOV 18

ಅಲ್ಲಿ ಉತ್ಸಾಹದ ಕಚಗುಳಿ ಇತ್ತು; ಬೆಂಗಳೂರಿನ ನವೋದ್ಯಮ ಸಂಸ್ಕೃತಿಯ ಬಗ್ಗೆ ರೋಮಾಂಚನವಿತ್ತು; ಇಲ್ಲಿನ ಉದ್ಯಮ ನಾಳೆ ಜಿಗಿಯುವ ದಿಗಂತದ ಬಗ್ಗೆ ಕುತೂಹಲವಿತ್ತು; ಇಲ್ಲಿನ ಟ್ರಾಫಿಕ್ ಸಮಸ್ಯೆ ಬಗ್ಗೆ ಗಮನ ಸೆಳೆಯುವ ಪ್ರಯತ್ನವಿತ್ತು; ಜತೆಗೆ ಸಮಸ್ಯೆಗಳೇ ಹೇಗೆ ಹೊಸ ಉದ್ಯಮದ ಹುಟ್ಟಿಗೆ ಪ್ರೇರಣೆಯಾಗುತ್ತದೆಂಬ ತಮಾಷೆ ಇತ್ತು; ಯಶಸ್ವಿ ಹೂಡಿಕೆದಾರರಿಗೆ ಪ್ರಶ್ನೆಗಳಿದ್ದವು; ಪ್ರತಿಯಾಗಿ ಉತ್ತರಗಳು ಬರುತ್ತಿದ್ದವು; ಬೆಂಗಳೂರಿಗೂ ದೇಶದ ಉಳಿದ ನಗರಗಳಿಗೂ ಇರುವ ವ್ಯತ್ಯಾಸವೇನೆಂದು ಬೆಳಕು ಚೆಲ್ಲಲಾಗುತ್ತಿತ್ತು. ಇವೆಲ್ಲವನ್ನೂ ಚುಂಬಕಶಕ್ತಿಯಂತೆ ಹಿಡಿದಿಟ್ಟಿದ್ದಅಂಶ ಒಂದೇಒಂದು- ಅದು, ಬೆಂಗಳೂರು!

ಬೆಂಗಳೂರು ತಂತ್ರಜ್ಞಾನ ಶೃಂಗಸಭೆಯಲ್ಲಿ ಜನಪ್ರಿಯ ಲೇಖಕ ಮತ್ತು ಅಂಕಣಕಾರ ಚೇತನ್ ಭಗತ್ ಗುರುವಾರದಂದು ನಡೆಸಿಕೊಟ್ಟ `ಬೆಂಗಳೂರು ನೆಕ್ಸ್ಟ್’ ಸಮಾವೇಶ ಸಂವಾದದಲ್ಲಿದ್ದ ಲಹರಿಗಳಿವು. ಇದಕ್ಕೆ ತಕ್ಕಂತೆ ಚೇತನ್ ಭಗತ್ ಉದ್ದಿಮೆ, ಬದುಕಿನ ಸತ್ಯಗಳು, ಕನಸುಗಾರಿಕೆ, ಉದ್ಯಮಿಗಳು ಪಾಲಿಸುವ ಮೌ್ಲ್ಯಗಳು, ಯುವಜನರ ಸೆಳೆತ ಎಲ್ಲವುಗಳನ್ನೂ ನಡುನಡುವೆ ಹೇಳುತ್ತಿದ್ದರು; ಹಾಗೆಯೇ ಉದ್ಯಮಗಳ ಯಶೋಗಾಥೆಯನ್ನು ಹಂಚಿಕೊಳ್ಳುವಂತೆ ಸಭಾಂಗಣದಲ್ಲಿದ್ದ ಅನೇಕ ಉದ್ಯಮಿಗಳನ್ನು ಆಮಂತ್ರಿಸುತ್ತಿದ್ದರು.

ಮೊದಲಿಗೆ ಚೇತನ್ ಭಗತ್ ಅವರಿಗೆ ಬೆಂಗಳೂರೊಂದರಲ್ಲೇ 36 ಯೂನಿಕಾರ್ನ್ ಸ್ಥಾನಮಾನದ ಕಂಪನಿಗಳಿರುವ ಬಗ್ಗೆ ರೋಮಾಂಚನವಿತ್ತು. ಇದು ಅಲ್ಲೇ ಪ್ರಶ್ನೆಯಾಗಿ ರೂಪಾಂತರ ಹೊಂದಿತು. ಇದಕ್ಕೆ ರಾಜ್ಯ ಸ್ಟಾರ್ಟಪ್ ವಿಷನ್ ಗ್ರೂಪಿನ ಮುಖ್ಯಸ್ಥ ಪ್ರಶಾಂತ್ ಪ್ರಕಾಶ್ ಉತ್ತರಿಸಿದರು.

`ಕರ್ನಾಟಕ ಇವತ್ತು ನವೋದ್ಯಮಕ್ಕೆ ಇನ್ನೊಂದು ಹೆಸರಾಗಿದೆ. ಇದರ ಶ್ರೇಯಸ್ಸು ಶೇ.90ರಷ್ಟು ನಮ್ಮ ರಾಜ್ಯದ ಸುಸಂಸ್ಖೃತಿಗೆ ಸಲ್ಲಬೇಕು. ಇಲ್ಲಿ ಯಾವ ಪಕ್ಷದ ಸರಕಾರ ಬಂದರೂ ಉದ್ಯಮಸ್ನೇಹಿಯಾಗಿರುತ್ತದೆ. ವಿಷನ್ ಗ್ರೂಪ್ ಗಳನ್ನು ಸ್ಥಾಪಿಸಿದವರಲ್ಲಿ ನಮ್ಮವರೇ ಮೊದಲಿಗರು. ಇಡೀ ದೇಶದಲ್ಲಿ ಇಂತಹ ಇನ್ನೊಂದು ನಗರವಿಲ್ಲ,’ ಎನ್ನುವುದು ಅವರ ಉತ್ತರವಾಗಿತ್ತು.

ಇದಕ್ಕೆ ವೇದಿಕೆಯ ಮೇಲಿದ್ದ ಉದ್ಯಮಿಗಳಾದ ಸುಜಿತ್ ಕುಮಾರ್, ಹರ್ಷಿಲ್ ಮಾಥೂರ್ ದನಿಗೂಡಿಸಿದರು. ಜತೆಗೆ ಬೆಂಗಳೂರಿನಲ್ಲಿ ಇಂತಹ ಸ್ಟಾರ್ಟಪ್-ಸ್ನೇಹಿ ವಾತಾವರಣ ಇರುವುದನ್ನು ಕಂಡೇ ತಾವಿಬ್ಬರೂ ದೂರದ ದೆಹಲಿ ಮತ್ತು ಜೈಪುರಗಳಿಂದ ಇಲ್ಲಿಗೆ ಕಂಪನಿಗಳನ್ನು ಸ್ಥಳಾಂತರಿಸಿದ್ದಾಗಿ ಹೇಳಿದರು. ಪಕ್ಕದಲ್ಲಿದ್ದ ಕಿಂಡ್ರೆಲ್ ಕಂಪನಿಯ ಲಿಂಗರಾಜ ಸಾಹುಕಾರ್ ಕೂಡ 19 ಸಾವಿರ ಉದ್ಯೋಗಿಗಳಿರುವ ತಮ್ಮ ಕಂಪನಿಯನ್ನು ಸ್ಟಾರ್ಟಪ್ ಎಂದೇ ಆರಂಭಿಸಿರುವುದಾಗಿ ಗುಟ್ಟು ಬಿಟ್ಟುಕೊಟ್ಟರು.

ಆಗ ಹುಬ್ಬೇರಿಸುವ ಸರದಿ ಚೇತನ್ ಭಗತ್ ಅವರದಾಗಿತ್ತು! ಕೂಡಲೇ ಅವರು ಮುಂಬೈನಲ್ಲಿ ಸಿನಿಮಾ ಸಂಸ್ಕೃತಿ ಇದೆ; ಅಲ್ಲಿ ಎಲ್ಲರೂ ಇಲ್ಲಿ ಶಾರುಖ್ ಖಾನ್ ಮನೆ ಇದೆ, ಅಲ್ಲಿ ಸಲ್ಮಾನ್ ಖಾನ್ ಮನೆ ಇದೆ’ ಎಂದು ಮಾತಾಡುತ್ತಿರುತ್ತಾರೆ. ಹಾಗೆಯೇ ಬೆಂಗಳೂರಿನಲ್ಲಿ ಉದ್ಯಮಸಂಸ್ಕೃತಿ ಇದೆ. ಇಲ್ಲಿನ ಜನಇದು ಇನ್ಫೋಸಿಸ್ ನಾರಾಯಣಮೂರ್ತಿಗಳ ಮನೆ, ಅದು ವಿಪ್ರೋ ಸಂಸ್ಥಾಪಕ ಅಜೀಂ ಪ್ರೇಂಜಿ ಮನೆ ಇದೆ ಅಂತ ಹೇಳ್ತಾರೆ. ನನ್ನನ್ನು ಇಲ್ಲಿಗೆ ಕರೆದುಕೊಂಡು ಬಂದ ಟ್ಯಾಕ್ಸಿ ಚಾಲಕ ಕೂಡ ಇಲ್ಲಿನ ಯಾವುದೋ ಒಂದು ಯೂನಿಕಾರ್ನ್ ಕಂಪನಿಗೆ ಕೆಲಸ ಮಾಡ್ತಾ ಇದ್ದವನೇ!’ ಎಂದು ಉದ್ಗರಿಸಿದರು.

ಸಚಿವರಿಗೂ ಪ್ರಶ್ನೆ ಹಾಕಿದ ಚೇತನ್ ಭಗತ್!

ಸಭಿಕರ ಮಧ್ಯೆ ಇದ್ದ ಐಟಿ ಸಚಿವ ಅಶ್ವತ್ಥನಾರಾಯಣ ಅವರತ್ತಲೂ ಚೇತನ್ ಭಗತ್ ಪ್ರಶ್ನೆಗಳನ್ನೆಸೆದರು. ಇದಕ್ಕೆ ಉತ್ತರಿಸಿದ ಸಚಿವರು, `ಹಣ ಸರಿಯಾದವರ ಬಳಿ ಇರಬೇಕು. ಆಗ ಅದು ಬೆಳೆಯುತ್ತ ಹೋಗುತ್ತದೆ. ಅಂಥವರನ್ನು ನಮ್ಮ ಸರಕಾರ ಗುರುತಿಸಿ, ಪುರಸ್ಕರಿಸುತ್ತಿದೆ. ಇದು ನಮ್ಮ ಕರ್ತವ್ಯ. ಇಂಥವರಿಂದ ರಾಜ್ಯ ಪ್ರಗತಿ ಸಾಧಿಸುತ್ತದೆ. ನೂತನ ಶಿಕ್ಷಣ ನೀತಿಯಲ್ಲಿ ನಾವು ನಾವೀನ್ಯತೆ, ಕೌಶಲ್ಯ ಪೂರೈಕೆ ಮತ್ತು ಗುಣಮಟ್ಟದ ಬೋಧನೆಗೆ ಒತ್ತು ಕೊಟ್ಟಿದ್ದೇವೆ. ಇವೆಲ್ಲದರ ಹಿಂದೆ ಪ್ರಧಾನಿ ಮೋದಿಯವರ ಒತ್ತಾಸೆ, ದೂರದೃಷ್ಟಿ ಕೂಡ ಇವೆ,’ ಎಂದರು.

ಜತೆಗೆ ಅಮೆರಿಕದ ಸ್ಯಾನ್ ಫ್ರಾನ್ಸಿಸ್ಕೋದಲ್ಲಿರುವ ಸಿಲಿಕಾನ್ ಸಿಟಿಯಲ್ಲಿ ಕೂಡ ಬಿಟಿಎಸ್ ನಂತಹ ಕಾರ್ಯಕ್ರಮವನ್ನು ನಡೆಸುವ ಮಹತ್ವಾಕಾಂಕ್ಷೆ ತಮಗಿದೆ ಎಂದು ಅವರು ಹೇಳಿದರು. ಇದರ ಬೆನ್ನಲ್ಲೇ ಪ್ರಶಾಂತ್ ಪ್ರಕಾಶ್, `ಕರ್ನಾಟಕದಲ್ಲಿರುವ ಉದ್ಯಮಿಗಳು ಕೆರೆಯ ನೀರನು ಕೆರೆಗೆ ಚೆಲ್ಲುವ ಸಂಸ್ಕೃತಿಯವರು,’ ಎನ್ನುತ್ತ, ಎದುರಲ್ಲೇ ಆಸೀನರಾಗಿದ್ದ ಉದ್ಯಮಿ ಕ್ರಿಸ್ ಗೋಪಾಲಕೃಷ್ಣನ್ ಅವರ ಮಾದರಿ ಹಾದಿಯನ್ನು ಉಲ್ಲೇಖಿಸಿದರು.

ಚೇತನ್ ಭಗತ್ ನಡೆಸಿಕೊಟ್ಟ ಆಪ್ತ ಶೈಲಿಯ ಸಂವಾದಕ್ಕೆ ಸಭಾಂಗಣದಲ್ಲಿದ್ದವರೆಲ್ಲ ಕಿವಿ ತೆರೆದಿದ್ದರು; ನಡುನಡುವೆ ಚಪ್ಪಾಳೆಯ ಮಳೆ ಬೀಳುತ್ತಿತ್ತು; ವೇದಿಕೆಯ ಮೇಲಿದ್ದ ಉದ್ಯಮಿಗಳು ಬೆಂಗಳೂರಿನ ಹಿತಕರ ಹವೆಯನ್ನು ಹೊಗಳಿದ್ದಕ್ಕೆ ತಕ್ಕಂತೆ ಹೊರಗಡೆಯೂ ವರ್ಷಧಾರೆ ಸುರಿಯುತ್ತಿತ್ತು.

ಬೆಂಗಳೂರಿನಲ್ಲಿ ಈಗ ಶತಕೋಟಿ ಡಾಲರ್ ವಹಿವಾಟು ನಡೆಸುವ ಯೂನಿಕಾರ್ನ್ ಕಂಪನಿಗಳು ಸದ್ದು ಮಾಡುತ್ತಿವೆ. ಇನ್ನು ಒಂದೆರಡು ವರ್ಷಗಳಲ್ಲಿ ಇಲ್ಲಿ 10 ಶತಕೋಟಿ ಡಾಲರ್ ವಹಿವಾಟು ನಡೆಸುವ ಡೆಕಾಕಾರ್ನ್ ಕಂಪನಿಗಳು ರಾರಾಜಿಸಲಿವೆ.

-ಪ್ರಶಾಂತ್ ಪ್ರಕಾಶ್, ಸ್ಟಾರ್ಟಪ್ ವಿಷನ್ ಗ್ರೂಪ್ ಮುಖ್ಯಸ್ಥ

2013ರಲ್ಲಿ ನಾನು ಜೈಪುರದಿಂದ ಬೆಂಗಳೂರಿಗೆ ಬಂದೆ. ಅದಕ್ಕೂ ಮುನ್ನ ನಾನು ಈ ನಗರವನ್ನೇ ನೋಡಿರಲಿಲ್ಲ. ಕರ್ನಾಟಕದಲ್ಲಿ ಎಲ್ಲ ಕೆಲಸಗಳೂ ಕ್ಷಿಪ್ರ ಗತಿಯಲ್ಲಿ ಆಗುತ್ತವೆ. ನಾನೀಗ ಸರಕಾರದ ಫಿನ್ಟೆಕ್ ಕಾರ್ಯಪಡೆಯ ಮುಖ್ಯಸ್ಥನಾಗಿದ್ದೇನೆ.

-ಹರ್ಷಿಲ್ ಮಾಥೂರ್, ಸಂಸ್ಥಾಪಕ, ರೇಜರ್ ಪೇ.

ಭವಿಷ್ಯದ ಉದ್ಯೋಗದಾತ ಮಷೀನ್‌ ಲರ್ನಿಂಗ್‌ ಮತ್ತು ಕೃತಕ ಬುದ್ಧಿಮತ್ತೆ

ಕನ್ನಡಪ್ರೆಸ್.ಕಾಮ್ ವರದಿ

-

November 18, 2021

0

ಭವಿಷ್ಯದ ಉದ್ಯೋಗದಾತ ಮಷೀನ್‌ ಲರ್ನಿಂಗ್‌ ಮತ್ತು ಕೃತಕ ಬುದ್ಧಿಮತ್ತೆ

BENGALURU NOV 18
ಕೃತಕ ಬುದ್ಧಿಮತ್ತೆ ಮತ್ತು ಮಷೀನ್‌ ಲರ್ನಿಂಗ್‌ ಎನ್ನುವುದು ಪ್ರಚಲಿತದಲ್ಲಿರುವ ಬಹು ಬೇಡಿಕೆಯ ಅಧ್ಯಯನ ಕ್ಷೇತ್ರವಾಗಿದ್ದು, ಭವಿಷ್ಯದ ಉದ್ಯೋಗದಾತ ಎಂಬ ಅಭಿಪ್ರಾಯ 24ನೇ ಬೆಂಗಳೂರು ತಂತ್ರಜ್ಞಾನ ಶೃಂಗದಲ್ಲಿ ಗುರುವಾರ ನಡೆದ ಗೋಷ್ಠಿಯಲ್ಲಿ ತಜ್ಞರಿಂದ ವ್ಯಕ್ತವಾಯಿತು.

“ಡ್ರೈವಿಂಗ್‌ ನೆಕ್ಟ್‌ ವಿತ್‌ ಆರ್ಟಿಫಿಯಲ್‌ ಇಂಟೆಲಿಜೆನ್ಸ್‌ ಅಂಡ್‌ ಮಷೀನ್‌ ಲರ್ನಿಂಗ್‌” ಕುರಿತು ನಡೆದ ಗೋಷ್ಠಿಯಲ್ಲಿ ಭಾರತವು ಈ ಕ್ಷೇತ್ರದ ಅತಿದೊಡ್ಡ ಮಾರುಕಟ್ಟೆಯಾಗಿರುವ ಜೊತೆಗೆ ಕರ್ನಾಟಕವು ಜಾಗತಿಕ ಕಂಪನಿಗಳಿಗೆ ಅಗತ್ಯವಿರುವಷ್ಟು ತಂತ್ರಜ್ಞರನ್ನು ಪೂರೈಸಲು ಸಮರ್ಥವಾಗಿದೆ ಎನ್ನಲಾಯಿತು.

ಆಟೊಮೊಬೈಲ್‌, ಸ್ಮಾರ್ಟ್‌ ಡ್ರೈವಿಂಗ್‌, ಇ-ಕಾಮರ್ಸ್‌, ಬ್ಯಾಂಕಿಂಗ್‌, ಎನರ್ಜಿ ಟ್ರಾನ್ಸ್‌ಫಾರ್ಮೇಶನ್‌, ಕ್ಲೈಮೇಟ್‌ ಫ್ರೈಂಡ್ಲಿ ಸಿಸ್ಟಮ್‌, ಪ್ಲಾಂಟ್‌ ಎಂಜಿನಿಯರಿಂಗ್‌, ರಿಮೋಟ್‌ ಮಾನಿಟರಿಂಗ್‌, ಅರ್ಲಿ ಪ್ರಿಡಿಕ್ಷನ್ಸ್‌, ಡಿಜಿಟಲ್‌ ಫಾರ್ಮಿಂಗ್‌, ಹೆಲ್ತ್ ಕೇರ್‌ ಡೇಟಾ ಅನಾಲಿಸಿಸ್‌, ಗ್ರಾಹಕ ಸೇವೆ ಹೀಗೆ ಬಹುತೇಕ ಕ್ಷೇತ್ರಗಳಲ್ಲಿ ಮಷೀನ್‌ ಲರ್ನಿಂಗ್‌ಗೆ ಭಾರಿ ಬೇಡಿಕೆ ಇದ್ದು, ನೂರಾರು ಜನರಿಗೆ ಉದ್ಯೋಗ ಸಿಗಲಿದೆ. ಈ ಉದ್ದೇಶದೊಂದಿಗೆ ಭಾರತವು ಈಗಾಗಲೇ ಜರ್ಮನಿ, ಆಸ್ಟ್ರೇಲಿಯಾ ಸೇರಿ ಹಲವು ದೇಶಗಳೊಂದಿಗೆ ಕಲಿಕೆ ಹಾಗೂ ತಂತ್ರಜ್ಞಾನ ವಿನಿಮಯ ಒಪ್ಪಂದಗಳನ್ನು ಮಾಡಿಕೊಂಡಿದೆ. ಇದರಿಂದ ಭವಿಷ್ಯದಲ್ಲಿ ಭಾರತದಲ್ಲಿ ಉದ್ಯೋಗಾವಕಾಶಗಳು ಹೆಚ್ಚಲಿವೆ ಎಂದು ಇನ್ಫೋಸಿಸ್‌ನ ಚೀಫ್‌ ಆಪರೇಟಿಂಗ್‌ ಆಫಿಸರ್‌ ಯು.ಬಿ. ಪ್ರವೀಣ್‌ ರಾವ್‌ ಅಭಿಪ್ರಾಯಪಟ್ಟರು.

ಭವಿಷ್ಯದ ಅಗತ್ಯತೆಗಳನ್ನು ಗಮನದಲ್ಲಿರಿಸಿಕೊಂಡೇ ನಮ್ಮ ಸಂಸ್ಥೆಯು, ಡಿಜಿಟಲ್‌ ಇನ್ನೋವೇಷನ್‌ ಸೆಂಟರ್‌ ಮೂಲಕ ದೇಶೀಯ ಹಾಗೂ ಜಾಗತಿಕ ಪಾಲುದಾರ ಕಂಪನಿಗಳ ಸಹಯೋಗದೊಂದಿಗೆ ಉದ್ಯೋಗಿಗಳನ್ನು ಹೊಸ ಸವಾಲುಗಳಿಗೆ ಸಜ್ಜುಗೊಳಿಸಲು ಹಾಗೂ ಅವರಲ್ಲಿ ಕೌಶಲ್ಯ ಹೆಚ್ಚಿಸಲು ಒತ್ತು ನೀಡಿದೆ. ನಾನಾ ಕಂಪನಿಗಳ ಹಾಗೂ ಶೈಕ್ಷಣಿಕ ಸಂಸ್ಥೆಗಳ ಜತೆ ಕೈಜೋಡಿಸಿ ಕೌಶಲ್ಯ ಕೊರತೆ ನಿವಾರಿಸುವತ್ತ ಹೆಜ್ಜೆ ಇರಿಸಲಾಗಿದೆ ಎಂದರು.

ತಂತ್ರಜ್ಞಾನ ವಿನಿಮಯ ವಿಚಾರದಲ್ಲಿ ಇಂಡೋ-ಜರ್ಮನ್‌ ಚೇಂಬರ್‌ ಆಫ್‌ ಕಾಮರ್ಸ್‌ ಹಲವು ಉಪಕ್ರಮಗಳನ್ನು ಕೈಗೊಂಡಿದೆ. ಕಾಲೇಜುಗಳು, ವಿಶ್ವವಿದ್ಯಾಲಯಗಳು, ಸ್ಟಾರ್ಟಪ್‌ಗಳ ಜತೆ ಜರ್ಮನಿ ಕೈಜೋಡಿಸಿದೆ. ಪಿಪಿಪಿ ಮಾದರಿಯಲ್ಲಿ ಅನುಷ್ಠಾನಕ್ಕೆ ಬರುವ ಯೋಜನೆಗಳ ಪರಿಣಾಮಕಾರಿ ಜಾರಿಗೆ ಉಭಯ ದೇಶಗಳ ಸರ್ಕಾರಗಳ ಬೆಂಬಲ ಅಗತ್ಯವಾಗಿದೆ,ʼʼ ಎಂದು ಬೆಂಗಳೂರಿನಲ್ಲಿರುವ ಜರ್ಮನಿಯ ಕಾನ್ಸುಲೇಟ್‌ನ ಕಾನ್ಸುಲ್‌ ಜನರಲ್‌ ಅಚಿಮ್‌ ಬುರ್ಕಾಟ್‌ ಹೇಳಿದರು.

ಬೆಂಗಳೂರಿನಲ್ಲಿ ನೂತನ ಕಚೇರಿ
ಆಸ್ಟ್ರೇಲಿಯಾದಲ್ಲಿ ಮಷೀನ್‌ ಲರ್ನಿಂಗ್‌ಗೆ ಭಾರಿ ಬೇಡಿಕೆ ಇದ್ದು, ಇಲ್ಲಿನ ಕಂಪನಿಗಳು, ವಿಶ್ವವಿದ್ಯಾಲಯಗಳು, ಕಾಲೇಜುಗಳು ಪಾಲುದಾರಿಕೆಯೊಂದಿಗೆ ಕೈಜೋಡಿಸಲು ಮುಂದೆ ಬಂದರೆ ತಮ್ಮ ಕಂಪನಿ ಎಲ್ಲ ರೀತಿಯ ನೆರವು ನೀಡಲಿದೆ. ಬಂಡವಾಳ ಹೂಡಿಕೆಯೊಂದಿಗೆ ಉತ್ತಮ ಆದಾಯ ಮಾರ್ಗಗಳನ್ನು ಕಂಡುಕೊಳ್ಳಬಹುದು ಎಂದು ವರ್ಚ್ಯುಯಲ್ ಆಗಿ ಪಾಲ್ಗೊಂಡಿದ್ದ ಆಸ್ಟ್ರೇಲಿಯಾದ ಎನ್‌ಆರ್‌ಡಬ್ಲ್ಯೂ ಗ್ಲೋಬಲ್‌ ಬ್ಯುಸಿನೆಸ್‌ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಫಿಲಿಕ್ಸ್‌ ನಿಯೊಗ್ರಾಟ್‌ ಗೋಷ್ಠಿಯಲ್ಲಿಯೇ ಭಾರತದ ಟೆಕ್‌ ದಿಗ್ಗಜರಿಗೆ ಆಹ್ವಾನ ನೀಡಿದರು.

ಈ ಕಂಪನಿಯು ಇತ್ತೀಚಿನ ತಿಂಗಳ ಹಿಂದೆ ಬೆಂಗಳೂರಿನಲ್ಲಿ ನೂತನ ಕಚೇರಿ ತೆರೆದಿದ್ದು, ಅದರ ಮುಖ್ಯ ಪ್ರತಿನಿಧಿ ಅಂಬಿಕಾ ಬನೋತ್ರಾ, ಕಂಪನಿಯು ಮುಂದಿನ ದಿನಗಳಲ್ಲಿ ಬ್ಯುಸಿನೆಸ್‌ ಮಾಡ್ಯುಲ್‌ಗಳನ್ನು ಅನಾವರಣಗೊಳಿಸಲಿದೆ ಎಂದರು.

ಗೋಷ್ಠಿಯಲ್ಲಿ ಜರ್ಮನಿಯ ಇಂಟೆಲಿಜೆಂಟ್‌ ಟೆಕ್ನಿಕಲ್‌ ಸಿಸ್ಟಮ್ಸ್‌ ಒಎಸ್‌ಟಿ ವೆಸ್ಟ್‌ಫ್ಯಾಲೆನ್‌ ಲಿಪ್ಪೆ ಕಂಪನಿಯ ಸ್ಟ್ರ್ಯಾಟಜಿ ಹಾಗೂ ಆರ್‌ ಅಂಡ್‌ ಡಿ ವಿಭಾಗದ ವ್ಯವಸ್ಥಾಪಕ ನಿರ್ದೇಶಕ ಪ್ರೊ. ಡಾ. ರೊಮನ್‌ ಡ್ಯುಮಿಟ್ರಿಸ್ಕೂ ಸೇರಿ ಹಲವರು ಪಾಲ್ಗೊಂಡಿದ್ದರು.

ಏನಿದು ಮಷೀನ್‌ ಲರ್ನಿಂಗ್‌ ?
ಮಷೀನ್‌ ಲರ್ನಿಂಗ್‌ ಎಂಬುದು ಕೃತಕ ಬುದ್ಧಿಮತ್ತೆಯ ಒಂದು ಮೂಲ ಅಂಶ. ಗಣಕಯಂತ್ರ ಅಥವಾ ಎಲೆಕ್ಟ್ರಾನಿಕ್‌ ಸಾಧನ ತನಗೆ ತಾನೇ ಕಲಿತುಕೊಳ್ಳುವಂತೆ ಅದನ್ನು ಯೋಜಿಸಲಾಗುತ್ತದೆ. ಮೂಲದಲ್ಲಿ ನೋಡುವುದಾದರೆ ಇದೊಂದು ಬಿಗ್‌ ಡೇಟಾಗಳ ವಿಶ್ಲೇಷಣೆ. ಮಾಹಿತಿಯನ್ನು ತನಗೆ ತಾನೇ ತೆಗೆದುಕೊಂಡು ಪ್ರೋಗ್ರಾಮ್‌ಗಳನ್ನು ರೂಪಿಸಿಕೊಳ್ಳುವುದಕ್ಕೆ ಬಳಕೆಯಾಗುತ್ತದೆ. ಗೂಗಲ್‌, ಅಮೆಜಾನ್‌, ಫ್ಲಿಪ್‌ ಕಾರ್ಟ್‌ ಹೀಗೆ ಇ-ಕಾಮರ್ಸ್‌ ವೆಬ್‌ಸೈಟ್‌ಗಳು ಗ್ರಾಹಕರ ಖರೀದಿ ಚರಿತ್ರೆಯ ಅಂಕಿ-ಅಂಶ ಮತ್ತು ದಾಖಲೆ ಸಂಗ್ರಹಿಸಿಕೊಂಡು ನಿಮಗೆ ಏನು ಬೇಕು ಎಂಬುದನ್ನು ಊಹಿಸಿ, ನಿಮ್ಮ ಮೇಲ್‌ಗಳಿಗೆ ನೋಟಿಫಿಕೇಷನ್‌ಗಳನ್ನು ರವಾನಿಸುತ್ತದೆ. ಇದೆಲ್ಲವೂ ಮಷೀನ್‌ ಲರ್ನಿಂಗ್‌ ಚಾಕಚಕ್ಯತೆಯಾಗಿದೆ. ಇನ್ನು ಡ್ರೈವರ್‌ ಲೆಸ್‌ ಕಾರಿನ ಚಾಲನೆಯೂ ಇದಕ್ಕೊಂದು ಉದಾಹರಣೆಯಾಗಿದೆ. ನೇರವಾದ ರಸ್ತೆ ಎಲ್ಲಿದೆ? ತಿರುವು ಬಂದರೆ ಹೇಗೆ ತೆಗೆದುಕೊಳ್ಳಬೇಕು? ಹಂಪ್ ಬಂದರೆ, ಟ್ರಾಫಿಕ್‌ನಲ್ಲಿ ಹೇಗೆ ವಾಹನದ ವೇಗ ನಿಧಾನಗೊಳಿಸಬೇಕು? ಎಲ್ಲದರ ಹಿಂದೆಯೂ ಸೆನ್ಸಾರ್‌ ಹಾಗೂ ಮಷೀನ್‌ ಲರ್ನಿಂಗ್‌ ಕೆಲಸ ಮಾಡುತ್ತಿರುತ್ತದೆ.

car t cell therapy ಕ್ಯಾನ್ಸರ್ ಚಿಕಿತ್ಸೆಗೆ ಪರಿಣಾಮಕಾರಿ ವಿಧಾನ: ಭಾರತದಲ್ಲೂ ಕೈಗೆಟುಕುವ ದರದಲ್ಲಿ ಸಿಗಬೇಕಿದೆ ಈ ಚಿಕಿತ್ಸೆ

ಕನ್ನಡಪ್ರೆಸ್.ಕಾಮ್ ವರದಿ

-

November 18, 2021

0

car t cell therapy ಕ್ಯಾನ್ಸರ್ ಚಿಕಿತ್ಸೆಗೆ ಪರಿಣಾಮಕಾರಿ ವಿಧಾನ: ಭಾರತದಲ್ಲೂ ಕೈಗೆಟುಕುವ ದರದಲ್ಲಿ ಸಿಗಬೇಕಿದೆ ಈ ಚಿಕಿತ್ಸೆ

BENGALURU NOV 19

ಕ್ಯಾನ್ಸರ್ ಬಾಧೆಗೆ ಪರಿಣಾಮಕಾರಿ ಚಿಕಿತ್ಸೆಯು ಜನರ ಕೈಗೆಟುಕಬೇಕಾದರೆ ದೇಶದಲ್ಲಿ ಕಾರ್ಟಿ ಕಂಪನಿಗಳು ಸ್ಥಾಪನೆಯಾಗಬೇಕು ಎಂದು ಪುಲಿಟ್ಜರ್ ಪ್ರಶಸ್ತಿ ಪುರಸ್ಕೃತ ವೈದ್ಯವಿಜ್ಞಾನ ಲೇಖಕ ಡಾ.ಸಿದ್ಧಾರ್ಥ ಮುಖರ್ಜಿ Dr Siddartha Mukharji -ಅಭಿಪ್ರಾಯಪಟ್ಟರು.

ಬೆಂಗಳೂರು ತಂತ್ರಜ್ಞಾನ ಶೃಂಗಸಭೆಯನ್ನು ಉದ್ದೇಶಿಸಿ ಗುರುವಾರ ವರ್ಚುಯಲ್ ರೂಪದಲ್ಲಿ ಮಾತನಾಡಿದ ಅವರು, ಪಕ್ಕದ ಚೀನಾದಲ್ಲಿ ಇಂತಹ 300 ಕಂಪನಿಗಳಿದ್ದು, ಅಮೆರಿಕದಲ್ಲಿ ನೂರಾರು ಉದ್ದಿಮೆಗಳಿವೆ. ಆದರೆ, ಐಟಿ ವಲಯದಲ್ಲಿ ಜಗತ್ತಿಗೇ ಮಾದರಿಯಾಗಿರುವ ಭಾರತದಲ್ಲಿ ಕಾರ್ಟಿ ಕಂಪನಿಗಳು ಇಲ್ಲದಿರುವುದು ನೋವಿನ ಸಂಗತಿ ಎಂದರು.

ಭಾರತವು ಕಂಪ್ಯೂಟರ್ ವಿಜ್ಞಾನ ಮತ್ತು ಮಾಹಿತಿ ತಂತ್ರಜ್ಞಾನದಲ್ಲಿ ಅಪಾರ ಪರಿಣತಿ ಸಾಧಿಸಿರುವುದು ನಿಜ. ಆದರೆ ಇಲ್ಲಿ ಕ್ಯಾನ್ಸರ್ ನಂತಹ ಗಂಭೀರ ಕಾಯಿಲೆಗಳೂ ಹೆಚ್ಚಾಗಿದ್ದು, ಇದಕ್ಕೆ ಕೈಗೆಟುಕುವಂತಹ ಚಿಕಿತ್ಸೆ ಸಿಕ್ಕುತ್ತಿಲ್ಲ. ಇದಕ್ಕಾಗಿ ಎಲ್ಲರೂ ಅಮೆರಿಕ, ಇಂಗ್ಲೆಂಡ್ ಮತ್ತು ಜರ್ಮನಿಗಳಿಗೆ ಹೋಗುವುದು ಸಾಧ್ಯವಿಲ್ಲ. ಆದ್ದರಿಂದ ನಮ್ಮಲ್ಲಿ ವ್ಯವಸ್ಥೆ ಮತ್ತು ಶೋಧನಾ ನಿಧಿ ಹೂಡಿಕೆದಾರರ ಮನೋಭಾವನೆ ಬದಲಾಗಬೇಕಾದ ಜರೂರಿದೆ ಎಂದು ಅವರು ಹೇಳಿದರು.

ಕ್ಯಾನ್ಸರ್ ಚಿಕಿತ್ಸೆಗೆ ಈಗ ಕಾರ್ಟಿ ಥೆರಪಿ, ಇಮ್ಯುನೋಥೆರಪಿ, ಜೀನ್ ಥೆರಪಿ, ಜೀನ್ ಎಡಿಟಿಂಗ್ ಮುಂತಾದವು ಪ್ರವರ್ಧಮಾನಕ್ಕೆ ಬರುತ್ತಿರುವ ಕ್ರಮಗಳಾಗಿವೆ. ಇವು ಮಕ್ಕಳಲ್ಲಿ ಕಂಡುಬರುವ ಕ್ಯಾನ್ಸರ್, ಮೈಲೋಮಾ, ಲಿಂಫೋಮಾ, ಸ್ತನ ಕ್ಯಾನ್ಸರ್ ಮುಂತಾದವನ್ನು ವಾಸಿ ಮಾಡುವಷ್ಟು ಪರಿಣಾಮಕಾರಿಯಾಗಿವೆ ಎಂದು ಸಿದ್ಧಾರ್ಥ ವಿವರಿಸಿದರು.

ಕ್ಯಾನ್ಸರ್ ಚಿಕಿತ್ಸೆಯಲ್ಲಿ ಈಗ ರೇಡಿಯೇಷನ್ ಮತ್ತು ಕೀಮೋಥೆರಪಿಗಳಲ್ಲದೆ ಹೊಸ ವಿಧಾನಗಳೂ ಬರುತ್ತಿವೆ. ಆದರೆ, ಇವುಗಳನ್ನು ಸರಿಯಾಗಿ ಗುರುತಿಸುವ ಕೆಲಸವಾಗಿಲ್ಲ. ಚೀನಾ ಸಾಧನೆ ಮಾಡುವುದು ಸಾಧ್ಯವಾದರೆ ಭಾರತವೂ ಮಾಡಬಹುದು ಎಂದು ಅವರು ಅಭಿಪ್ರಾಯಪಟ್ಟರು.

ಆರೋಗ್ಯ ಕ್ಷೇತ್ರವನ್ನು ರಾಷ್ಟ್ರ ನಿರ್ಮಾಣದ ಭಾಗವೆಂದು ಪರಿಗಣಿಸಬೇಕು. ಇದಕ್ಕಾಗಿ ಸರಕಾರಗಳು ಅಮೆರಿಕದ ಮಾದರಿಯಲ್ಲಿ ಆಯೋಗ ರಚಿಸಿ, 6ರಿಂದ 8 ತಿಂಗಳಲ್ಲಿ ವರದಿ ಪಡೆದುಕೊಳ್ಳಬೇಕು. ಜತೆಗೆ ಅಗತ್ಯ ಭೂಮಿ ಮೀಸಲಿಟ್ಟು, ಬಂಡವಾಳ ನೆರವು, ತೆರಿಗೆ ಕಡಿತ ಮತ್ತು ಇನ್ನಿತರ ಉತ್ತೇಜಕ ಕ್ರಮಗಳನ್ನು ತ್ವರಿತ ಗತಿಯಲ್ಲಿ ಅನುಷ್ಠಾನಕ್ಕೆ ತರಬೇಕು ಎಂದು ಸಲಹೆ ನೀಡಿದರು.

ರಾಜ್ಯ ಸರಕಾರದ ಜೈವಿಕ ತಂತ್ರಜ್ಞಾನ ವಿಷನ್ ಗ್ರೂಪ್ ಮುಖ್ಯಸ್ಥೆ ಮತ್ತು ಬಯೋಕಾನ್ ಸಂಸ್ಥಾಪಕಿ ಕಿರಣ್ ಮಜುಂದಾರ್ ಷಾ ಸಂವಾದವನ್ನು ನಡೆಸಿಕೊಟ್ಟರು.

ಯಾವ ಚಿಕಿತ್ಸಾ ಕ್ರಮಗಳೂ ಇದ್ದಕ್ಕಿದ್ದಂತೆ ಬರುವುದಿಲ್ಲ. ಒಂದೊಂದರ ಹಿಂದೆಯೂ 25-30 ವರ್ಷಗಳ ಪರಿಶ್ರಮ, ತ್ಯಾಗ ಮತ್ತು ಬದ್ಧತೆ ಇದೆ. ಇವೆಲ್ಲ ಬರೀ ಪ್ರಯೋಗಾಲಯಗಳಲ್ಲೇ ಉಳಿದರೆ ವ್ಯರ್ಥ. ಅಮೆರಿಕದಲ್ಲಿ ಒಂದು ಡೋಸ್ ಕಾರ್ಟಿ car t therapy ಥೆರಪಿಗೆ 4-5 ಸಾವಿರ ಡಾಲರ್ ಆಗುತ್ತದೆ. ಅಲ್ಲಿಯ ಶ್ರೀಮಂತರಿಗೂ ಇದು ಕೈಗೆಟುಕುವುದಿಲ್ಲ. ಆದ್ದರಿಂದ ಚಿಕಿತ್ಸೆಗಳು ಜನರಿಗೆ ಅಗ್ಗದ ದರದಲ್ಲಿ ಸಿಗಬೇಕಾದ್ದು ಮುಖ್ಯ. ಇದನ್ನು ಮಾಡಬೇಕಾದ್ದು ಸರಕಾರಗಳ ಕರ್ತವ್ಯ.
ಡಾ.ಸಿದ್ಧಾರ್ಥ ಮುಖರ್ಜಿ, ಪುಲಿಟರ್ಜರ್ ಪುರಸ್ಕೃತ ವೈದ್ಯಕೀಯ ಲೇಖಕ

BENGALURU TECH SUMMIT:10 ತಿಂಗಳಲ್ಲಿ ಸೃಷ್ಟಿಯಾದ ಕೋವ್ಯಾಕ್ಸಿನ್ ಅಭಿವೃದ್ಧಿಯ ಯಶೋಗಾಥೆ

ಕನ್ನಡಪ್ರೆಸ್.ಕಾಮ್ ವರದಿ

-

November 18, 2021

0

BENGALURU TECH SUMMIT:10 ತಿಂಗಳಲ್ಲಿ ಸೃಷ್ಟಿಯಾದ ಕೋವ್ಯಾಕ್ಸಿನ್ ಅಭಿವೃದ್ಧಿಯ ಯಶೋಗಾಥೆ

BENGALURU NOV 18

ಕೋವಿಡ್ ಪಿಡುಗು ದೇಶದ ಮೇಲೆರಗಿದಾಗ ಯಾವುದೇ ಲಸಿಕೆ ಇರಲಿಲ್ಲ. ಇದೊಂದು ಕಂಡು ಕೇಳರಿಯದಂತಹ ಸವಾಲಾಗಿತ್ತು. ಏಕೆಂದರೆ, ಕೇವಲ 10 ತಿಂಗಳಷ್ಟೇ ನಮಗೆ ಕಾಲಾವಕಾಶವಿತ್ತು. ಆದರೆ ಮಿಂಚಿನ ವೇಗದಲ್ಲಿ ಕೆಲಸ ಮಾಡಿದ ನಾವು ಕೋವ್ಯಾಕ್ಸಿನ್-COVAXIN- ಲಸಿಕೆಯನ್ನು ಅಭಿವೃದ್ಧಿ ಪಡಿಸಿದೆವು. ಇದು ನಿಜಕ್ಕೂ ಸವಾಲಿನಿಂದ ಕೂಡಿದ್ದ ಮತ್ತು ಅನನ್ಯ ಅನುಭವ.’

ಬೆಂಗಳೂರು ತಂತ್ರಜ್ಞಾನ ಶೃಂಗಸಭೆಯಲ್ಲಿ ಗುರುವಾರ ನಡೆದ `ಕೋವಿಡ್ ಲಸಿಕೆಯಲ್ಲಿ ಭಾರತದ ನಾಯಕತ್ವ ಗುಣದ ಪ್ರದರ್ಶನ’ ಗೋಷ್ಠಿಯಲ್ಲಿ, ಭಾರತ್ ಬಯೋಟೆಕ್-Bharath Bio Tech- ಕಂಪನಿಯ ನಿರ್ದೇಶಕ ಡಾ.ವಿ.ಕೃಷ್ಣಮೋಹನ್ ಆಡಿದ ಮಾತುಗಳಿವು.

ಸಂವಾದಕ್ಕೆ ಚಾಲನೆ ನೀಡಿದ ಡಾ.ಮಹೇಶ್ ಬಾಲಘಾಟ್ ಅವರು `ಕೋವ್ಯಾಕ್ಸಿನ್ ಅಭಿವೃದ್ಧಿಯ ಪಯಣದ ಏಳುಬೀಳುಗಳ ಬಗ್ಗೆ’ ಕೇಳಿದ ಪ್ರಶ್ನೆಗೆ ಮೇಲಿನಂತೆ ಉತ್ತರಿಸಿದ ಅವರು, “ಕೇಂದ್ರ ಸರಕಾರ ಈ ಬಿಕ್ಕಟ್ಟಿನ ಸಂದರ್ಭದಲ್ಲಿ ಸರಿಯಾದ ಹೆಜ್ಜೆಗಳನ್ನಿಟ್ಟಿತು; ಜೈವಿಕ ತಂತ್ರಜ್ಞಾನ ಇಲಾಖೆಯು ಮೈ ಕೊಡವಿಕೊಂಡು ಎದ್ದಿತು. ಕೆಲವು ವರ್ಷಗಳ ಹಿಂದೆ ಇಂತಹುದನ್ನು ನಾವು ಕಂಡುಕೇಳರಿಯುವುದು ಸಾಧ್ಯವಿರಲಿಲ್ಲ,’’ ಎಂದರು.

“ಭಾರತ್ ಬಯೋಟೆಕ್ ಕಂಪನಿಯ ಮುಂದೆ ಕೋವ್ಯಾಕ್ಸಿನ್ ಲಸಿಕೆಯನ್ನು ಭಾರತದಲ್ಲೇ ಸಂಪೂರ್ಣವಾಗಿ ಅಭಿವೃದ್ಧಿಪಡಿಸಿ, ಉತ್ಪಾದಿಸುವ ಗುರಿ ಇತ್ತು. ಇದಕ್ಕಾಗಿ ಪಟ್ಟಿರುವ ಪರಿಶ್ರಮಕ್ಕೆ ಬೆಲೆ ಕಟ್ಟುವುದು ಸಾಧ್ಯವಿಲ್ಲ. ಆದರೆ, ಲಸಿಕೆ ಉತ್ಪಾದನೆಯಲ್ಲಿ ಗುಣಮಟ್ಟದೊಂದಿಗೆ ಯಾವುದೇ ರಾಜಿ ಮಾಡಿಕೊಂಡಿಲ್ಲ. ಒಟ್ಟಿನಲ್ಲಿ ದಾಖಲೆ ಸಮಯದಲ್ಲಿ ನಾವು ಕೋಟ್ಯಂತರ ಜನರ ಜೀವವನ್ನು ಉಳಿಸಬಲ್ಲ ಕೋವ್ಯಾಕ್ಸಿನ್ ಲಸಿಕೆಯು ಸುಲಭವಾಗಿ ಸಿಗುವಂತೆ ಮಾಡಿದೆವು” ಎಂದು ಅವರು ನೆನಪಿನ ಸುರುಳಿ ಬಿಚ್ಚಿದರು.

ಭಾರತದ ವೈದ್ಯಕೀಯ ನಿಯಂತ್ರಣ ವ್ಯವಸ್ಥೆ ಕಳೆದ 10 ವರ್ಷಗಳಲ್ಲಿ ಸಕಾರಾತ್ಮಕವಾಗಿ ಬದಲಾಗಿದೆ. ಕೇಂದ್ರ ಸರಕಾರವು ಈಗ ಲಸಿಕೆ ಅಭಿವೃದ್ಧಿ ಯೋಜನೆಗಳಿಗೆ ಕನಿಷ್ಠ 50 ಲಕ್ಷ ರೂ.ಗಳಿಂದ ಹಿಡಿದು ಗರಿಷ್ಠ 50 ಕೋಟಿ ರೂ.ಗಳವರೆಗೂ ನೆರವು ನೀಡುತ್ತಿದೆ. ಆದ್ದರಿಂದ ಈಗ ಔಷಧ ತಯಾರಿಕೆ ಕಂಪನಿಗಳು ಸರಿಯಾದ ಯೋಜನೆಗಳನ್ನು ರೂಪಿಸಬೇಕಾಗಿದೆ ಎಂದು ಕೃಷ್ಣ ಮೋಹನ್ ಪ್ರತಿಪಾದಿಸಿದರು.

ಸಂವಾದದಲ್ಲಿ ಪಾಲ್ಗೊಂಡಿದ್ದ ಡಾ.ರೆಡ್ಡೀಸ್ ಲ್ಯಾಬೊರೇಟರೀಸ್ ಸಿಇಒ ಡಾ.ದೀಪಕ್ ಸಕ್ರಾ, “ಕೋವಿಡ್ ಸಂದರ್ಭವು ನಮ್ಮೆಲ್ಲರಿಗೂ ಒಳ್ಳೆಯ ಪಾಠ ಕಲಿಸಿತು. ರಷ್ಯಾದ ಕಂಪನಿಗಳಿಂದ ಸಿಕ್ಕಿದ ಸಹಭಾಗಿತ್ವದಿಂದಾಗಿ ನಾವು ಸ್ಪುಟ್ನಿಕ್ ಲಸಿಕೆಯನ್ನು ಅಭಿವೃದ್ಧಿ ಪಡಿಸುವುದು ಸಾಧ್ಯವಾಯಿತು. ಇದರಿಂದ ಭಾರತದ ಜೊತೆಗೆ ಇತರ ಅಭಿವೃದ್ಧಿಶೀಲ ದೇಶಗಳಿಗೂ ನೆರವಾಯಿತು. ಆದರೆ, ಸಂಶೋಧನೆ ಮತ್ತು ಅಭಿವೃದ್ಧಿಯ ವಿಚಾರದಲ್ಲಿ ಭಾರತ ಕ್ರಮಿಸಬೇಕಾದ ಹಾದಿ ಬಹಳಷ್ಟಿದೆ,’ ಎಂದರು.

ಅರಬಿಂದೋ ಫಾರ್ಮಾದ ಹಿರಿಯ ಉಪಾಧ್ಯಕ್ಷೆ ಡಾ.ದಿವ್ಯಾ ಬಿಜಲ್ವಾನ್ ಅವರು, `ದೇಶದಲ್ಲಿ ವಿಜ್ಞಾನ ಪ್ರತಿಭೆಗಳಿಗೇನೂ ಕೊರತೆ ಇಲ್ಲ. ಆದರೆ ಅದನ್ನು ಗುರುತಿಸಿ, ಸೂಕ್ತ ಸ್ಥಾನಮಾನಗಳನ್ನು ಕೊಡುವ ವಾತಾವರಣ ನಮ್ಮಲ್ಲಿಲ್ಲ. ಇದರ ಬಗ್ಗೆ ಲಸಿಕೆ ಮತ್ತು ಔಷಧ ಕಂಪನಿಗಳು ಅವಲೋಕನ ಮಾಡಿಕೊಂಡು, ತಮ್ಮ ಸಂಕುಚಿತ ಧೋರಣೆಯಿಂದ ಹೊರಬರಬೇಕು’ ಎಂದರು.

ಸಂವಾದದಲ್ಲಿ ಯಾಪನ್ ಬಯೋಪ್ರೈವೇಟ್ ಲಿಮಿಟೆಡ್ ಸಹಸಂಸ್ಥಾಪಕ ಅತಿನ್ ತೋಮರ್ ಭಾಗವಹಿಸಿದ್ದರು.

1 ರೂಪಾಯಿ ಕಾಯಿನ್ ಮಾತ್ರ ಪಡೆಯುತ್ತಿದ್ದ ಬುದ್ಧಿಮಾಂದ್ಯನ ಅಂತಿಮಯಾತ್ರೆಗೆ ಜನಸಾಗರ

ತಾಜಾ ವರದಿ

ಕನ್ನಡಪ್ರೆಸ್.ಕಾಮ್ ವರದಿ

-

November 18, 2021

5

1 ರೂಪಾಯಿ ಕಾಯಿನ್ ಮಾತ್ರ ಪಡೆಯುತ್ತಿದ್ದ ಬುದ್ಧಿಮಾಂದ್ಯನ ಅಂತಿಮಯಾತ್ರೆಗೆ ಜನಸಾಗರ

ಉಜ್ಜಿನಿ ರುದ್ರಪ್ಪ

KOTTUR NOV 18

ಆತನ ಶವಯಾತ್ರೆಗೆ ಇಡೀ ಹಡಗಲಿಯೇ ಸೇರಿತ್ತು. ಬೀದಿ ಬೀದಿಯಲ್ಲಿ ಫ್ಲೆಕ್ಸ್ ಗಳನ್ನು ಹಾಕಲಾಗಿತ್ತು.ಸೇರಿದವರೆಲ್ಲರೂ ಹೀಗಾಗಬಾರದಿತ್ತು ಎಂದು ಕಂಬನಿಗೆರೆಯುತ್ತಿದ್ದರು. ಬಡವರು ಶ್ರೀಮಂತರೆನ್ನದೆ ನಡೆದುಕೊಂಡು, ಬೈಕನ್ನೇರಿ, ಕಾರನ್ನೇರಿ ಸಾವಿರಾರು ಜನರು ಆತನ ಅಂತಿಮ ಯಾತ್ರೆಯಲ್ಲಿ ಭಾಗವಹಿಸಿದ್ದರು.

ಇಷ್ಟೊಂದು ಜನಪ್ರಿಯತೆ ಇರಬೇಕೆಂದರೆ ಈತ ಹಡಗಲಿಯ ರಾಜಕಾರಣಿಯೋ, ದೊಡ್ಡ ಶ್ರೀಮಂತನೋ,ದೇಶಕ್ಕಾಗಿ ಪ್ರಾಣತ್ಯಾಗ ಮಾಡಿದ ಯೋಧನೋ, ಸ್ವಾತಂತ್ರ್ಯ ಹೋರಾಟಗಾರನೋ ಅಥವಾ ಧಾರ್ಮಿಕ ಗುರುವೋ ಆಗಿರಬೇಕು ಎಂದು ನೀವು ಭಾವಿಸಿದ್ದರೆ ಅದು ತಪ್ಪು . ಈತ ಹಡಗಲಿಯಲ್ಲಿ ಅವರಿವರ ಹತ್ತಿರ ಬಿಕ್ಷೆ ಬೇಡಿ, ನೆರಳಿದ್ದಲ್ಲಿ ಮಲಗಿ , ಯಾರಾದರೂ ಕರೆದು ರೊಟ್ಟಿ ಅಥವಾಇನ್ನೇನಾದರೂ ತಿನ್ನಲು ಕೊಟ್ಟರೆ ತಿಂದು ಗುಡಿ ಗುಂಡಾರದಲ್ಲಿರುತ್ತಿದ್ದ ‘ಹುಚ್ಚ’ ಬಸ್ಯಾ!

ಒಬ್ಬ ಬುದ್ಧಿ ಮಾಂದ್ಯನ ಶವ ಸಂಸ್ಕಾರಕ್ಕೆ ಇಡೀ ಹಡಗಲಿ ಪಟ್ಟಣ ಜನತೆ ಹಾಗೂ ಸುತ್ತಮುತ್ತಲ ಗ್ರಾಮಸ್ಥರು ಸಾವಿರ ಸಂಖ್ಯೆಯಲ್ಲಿ ಸೇರಿರುವುದು ಬಹುಶಃ ಜಿಲ್ಲೆ, ರಾಜ್ಯ,ದೇಶದಲ್ಲಿ ಎಲ್ಲಿಯೂ ಇರಲಿಕ್ಕೆ ಸಾಧ್ಯವಿಲ್ಲ. ಶರಣರ ಸಾವನ್ನು ಮರಣದಲ್ಲಿ ಕಾಣು ಎಂಬಂತೆ ಬಸ್ಯಾ ಸಾವಿನಲ್ಲಿ ಶರಣನಾದ.

ವೈದ್ಯಕೀಯ ಚಿಕಿತ್ಸೆ ಪಡೆಯದೇ ಬೀದಿ ಬೀದಿ ಅಲೆಯವು ಅನಾಥ ಬುದ್ಧಿಮಾಂದ್ಯರು ಎಲ್ಲಾ ಊರಿನಲ್ಲಿಯೂ ಇರುತ್ತಾರೆ. ಕೆಲವರು ಇಂಥವರಿಗೆ ಕಲ್ಲು ಹೊಡೆಯುವುದು. ಬಾಯಿಗೆ ಬಂದಂತೆ ಬೈಯುವುದು ಮಾಡುತ್ತಾರೆ. ಚಿಕಿತ್ಸೆ ಕೊಡಿಸುವ ಮಾತಿರಲಿ ಇಂಥ ಅನಾಥರನ್ನು ಮನುಷ್ಯರೆಂದೇ ಭಾವಿಸುವುದಿಲ್ಲ.

ಆದರೆ ಈ ಬಸ್ಯಾ ತುಸು ಭಿನ್ನ. ಈತನಿಗೆ ಬಸ್ಯಾ ಎಂದು ಯಾವಾಗ ನಾಮಕರಣವಾಯಿತೋ ಗೊತ್ತಿಲ್ಲ. ಹುಟ್ಟವಾಗಲೆ ಅರೆ ಹುಚ್ಚನಾಗಿದ್ದ ಬಸ್ಯಾನ ತಲೆ ಸ್ವಲ್ಪ ಚಿಕ್ಕದಾಗಿತ್ತು. ತಾಯಿಯ ಜೊತೆಗಿದ್ದ . ಇತ್ತೀಚಿಗೆ ಈತನ ತಾಯಿಯೂ ತೀರಿದ ಮೇಲೆ ತುಸು ಖಿನ್ನನಾಗಿದ್ದ. ತಾಯಿ ಸತ್ತ ಮೇಲೆ ಸಂಪೂರ್ಣ ಅನಾಥನೇ ಆಗಿ ಬಿಟ್ಟ.

ಯಾರೂ ಕಂಡರೂ ಪ್ರೀತಿಯಿಂದ ಅಪ್ಪಾಜಿ ಅನ್ನುತ್ತಿದ್ದ. ಮುಖ್ಯವಾಗಿ ತಮಗೆ ಇಷ್ಟವಾದರ ಹತ್ತಿರ ಹೋಗಿ ಕೇಳುತ್ತಿದ್ದದ್ದು ಕೇವಲ ಒಂದೇ ಒಂದು ರೂಪಾಯಿ ಮಾತ್ರ. ಅ ದಿನ ಒಂದು ರೂಪಾಯಿ ಕೊಟ್ಟ ವ್ಯಕ್ತಿಗೆ ಅದೃಷ್ಟವೊ ಅದೃಷ್ಟ. ಆಗದಿದ್ದ ಕೆಲಸಗಳೆಲ್ಲ ಆಗುತ್ತಿದ್ದವು.

ಈ ಬಸ್ಯಾ ಯಾವುದಾದರೂ ಅಂಗಡಿ. ಹೋಟಲ್ ಮುಂದೆ ನಿಂತು ಒಂದು ರೂಪಾಯಿ ಕೇಳಿದನಂದರೆ. ಆ ದಿನ ಅ ಅಂಗಡಿ. ಹೋಟಲ್ ಗೆ ಭರ್ಜರಿ ವ್ಯಾಪಾರ ಆಗಾಗಿ ಈತನ ಬರುವಿಕೆಗಾಗಿ. ಒಂದು ರೂಪಾಯಿ ಕೇಳಲಿ ಎಂದು ಜನರು ಸದಾ ಕಾಯುತ್ತಿರುವುದು ಹಡಗಲಿಯಲ್ಲಿ ಸಾಮಾನ್ಯ ದೃಶ್ಯ.

ಮಾಜಿ ಉಪ ಮುಖ್ಯಮಂತ್ರಿ ದಿ. ಎಂ.ಪಿ. ಪ್ರಕಾಶ. ಮಾಜಿ ಸಚಿವ ಹಾಲಿ ಶಾಸಕ ಪಿ.ಟಿ. ಪರಮೇಶ್ವರ ಅಂದ್ರೆ ಈ ಬಸ್ಯಾನಿಗೆ ಅತಿ ಪ್ರೀತಿ ಅವರನ್ನು ಅಪ್ಪಾಜಿ ಅನ್ನುತ್ತಿದ್ದ ಬಸ್ಯಾ. ಯಾರೂ ಎಷ್ಟು ರೊಕ್ಕ ಕೊಟ್ಟರೂ ಬೇಡ ಎನ್ನುತ್ತಿದ್ದ ಈತನಿಗೆ ಬೇಕಾಗಿದ್ದು ಕೇವಲ ಒಂದು ರೂಪಾಯಿ ಮಾತ್ರ. ಅದು ಕೂಡ ನಾಣ್ಯವೇ ಆಗಬೇಕಿತ್ತು. ನೋಟು ಕೊಟ್ಟರೆ ಕಣ್ಣೆತ್ತಿಯೂ ನೋಡುತ್ತಿರಲಿಲ್ಲ.

ಆಗಾಗಿ ಇಡೀ ಹಡಗಲಿ ಜನತೆಪಾಲಿಗೆ ಈ ಬಸ್ಯಾ ಒಂದು ರೀತಿಯಲ್ಲಿ ಅದೃಷ್ಟವಂತ. ವರಕೊಡುವ ದೇವರಾಗಿದ್ದ. ದಿನವೂ ಬಸ್ಯಾನಿಗಾಗಿ ಕಾಯುತ್ತಿದ್ದರು. ಮಾತನಾಡಿಸಲು ಹಂಬಲಿಸುತ್ತಿದ್ದರು. ಬಸ್ಯಾನಿಂದ ತನ್ನ ಸಂಕಷ್ಟ ಪರಿಹಾರವಾಗಲಿ. ಅದೃಷ್ಟ ಕುದುರಲಿ ಎಂದು ಕಾಯುತ್ತಿದ್ದರೂ ಈ ‘ದೇವ ಮಾನವ ‘ ಬಸ್ಯಾ ತನಗೆ ಇಷ್ಟವಾದಾಗ. ಇಷ್ಟವಾದವರಲ್ಲಿ ಮಾತ್ರ ಕೇವಲ ಒಂದು ರೂಪಾಯಿ ಕೇಳುವ ರೂಪಾಯಿ ರಾಜನಾಗಿದ್ದ.

ನವೆಂಬರ್ 15ರಂದು ಅ ದಿನ ಹಡಗಲಿಯಲ್ಲಿ ಜಿಟಿಜಿಟಿ ಮಳೆ. ಪಟ್ಟಣದ ಲಾಲ್ ಬಹಾದ್ದೂರ್ ಶಾಸ್ತ್ರಿ ಸರ್ಕಲ್ ಹತ್ತಿರ ರಾತ್ರಿ ಅಪರಿಚಿತ ವಾಹನ ಕಾಲ ಮೇಲೆ ಹರಿದು ಹೋಗಿದೆ. ಮೊದಲೆ ನಿಶಕ್ತನಾಗಿದ್ದ. ನೋಡಿದವರು ಅಯ್ಯೊ ನಮ್ಮ ಬಸ್ಯಾ ಎಂದು ಆಸ್ಪತ್ರೆಗೆ ಸೇರಿಸಿದರೂ ಪ್ರಯೋಜವಾಗದೆ ಕೊನೆ ಉಸಿರು ಎಳೆದ. ಸತ್ತಾಗ ಅವನಿಗೆ 45 ವರ್ಷ.

ಬಸ್ಯಾನ ಕುರಿತು ಆತನ ಒಳ್ಳೆತನ,ಒಂದು ರೂಪಾಯಿ ಕೊಟ್ಟವರಿಗೆ ಒಲಿಯುತ್ತಿದ್ದ ಅದೃಷ್ಟ, ಹಡಗಲಿಯ ವರದಾದನ ಕುರಿತು ಇಂದಿಗೂ ಪಟ್ಟಣವಾಸಿಗಳು ಕಂಬನಿ ಸುರಿಸುತ್ತಾರೆ. ಶರಣನ ಸಾವನ್ನು ಮರಣದಲ್ಲಿ ಕಾಣು ಎಂಬಂತೆ ಬಸ್ಯಾ ಶರಣನಾಗಿದ್ದಾನೆ.

ಕನ್ನಡಪ್ರಭ ಸೇರಿದಂತೆ ನಾಡಿ ಹಲವು ಪತ್ರಿಕೆಗಳಲ್ಲಿ ಕಾರ್ಯನಿರ್ವಹಿಸಿರುವ ಉಜ್ಜಿನಿ ರುದ್ರಪ್ಪ ಮಾನವಾಸಕ್ತಿಯ ಸಂಗತಿಗಳನ್ನು ಹೆಕ್ಕಿ ತೆಗೆಯಬಲ್ಲ ಚತುರ ವರದಿಗಾರ. ಈಗ ಕೊಟ್ಟೂರಿನಲ್ಲಿ ನೆಲಸಿರುವ ಅವರು ಸ್ವತಂತ್ರ ಪತ್ರಕರ್ತರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.

INDIAN FESTIVAL: ಇಂದು ತುಳಸಿ ಕಲ್ಯಾಣ ಉತ್ಥಾನ ದ್ವಾದಶಿ

ನಾಡು ನುಡಿ

ಕನ್ನಡಪ್ರೆಸ್.ಕಾಮ್ ವರದಿ

-

November 16, 2021

0

INDIAN FESTIVAL: ಇಂದು ತುಳಸಿ ಕಲ್ಯಾಣ ಉತ್ಥಾನ ದ್ವಾದಶಿ

ಎಂ. ವಿ. ಶಂಕರಾನಂದ

ತುಳಸಿಯೊಂದಿಗೆ ಶ್ರೀವಿಷ್ಣುವಿನ (ಬಾಲಕೃಷ್ಣನ ಮೂರ್ತಿಯ) ವಿವಾಹವನ್ನು ಮಾಡುವುದೇ ತುಳಸಿ ವಿವಾಹದ ವಿಧಿಯಾಗಿದೆ. ವಿವಾಹದ ಹಿಂದಿನ ದಿನ ತುಳಸಿ ಬೃಂದಾವನವನ್ನು ಬಣ್ಣ ಹಚ್ಚಿ ಅಲಂಕರಿಸುತ್ತಾರೆ. ಬೃಂದಾವನದಲ್ಲಿ ಕಬ್ಬು, ಚೆಂಡು ಹೂವುಗಳನ್ನು ಹಾಕುತ್ತಾರೆ ಮತ್ತು ಅದರ ಬುಡದಲ್ಲಿ ಹುಣಸೇಕಾಯಿ ಮತ್ತು ನೆಲ್ಲಿಕಾಯಿಗಳನ್ನು ಇಡುತ್ತಾರೆ. ಈ ವಿವಾಹದ ವಿಧಿಯನ್ನು ಸಾಯಂಕಾಲ ಮಾಡುತ್ತಾರೆ.

ವೈಶಿಷ್ಟ್ಯ :ತುಳಸಿ ವಿವಾಹದ ಬಳಿಕ ಚಾತುರ್ಮಾಸದಲ್ಲಿ ಕೈಗೊಂಡ ಎಲ್ಲ ವ್ರತಗಳನ್ನು ಸಮಾಪ್ತಗೊಳಿಸುತ್ತಾರೆ. ಚಾತುರ್ಮಾಸದಲ್ಲಿ ಯಾವ ಪದಾರ್ಥಗಳನ್ನು ವರ್ಜ್ಯ ಮಾಡಿರುತ್ತಾರೆಯೋ, ಆ ಪದಾರ್ಥಗಳನ್ನು ಬ್ರಾಹ್ಮಣರಿಗೆ ದಾನ ಮಾಡಿ ನಂತರ ತಾವೂ ಸೇವಿಸುತ್ತಾರೆ.

ದೀಪಾವಳಿ ಹಬ್ಬದ ನಂತರ ಬರುವ ಇನ್ನೊಂದು ಹಬ್ಬ ತುಳಸಿ ಹಬ್ಬ ಅಥವಾ ತುಳಸಿ ಮದುವೆ. ಕಾರ್ತಿಕ ಮಾಸದ ಶುಕ್ಲ ಪಕ್ಷದ ದ್ವಾದಶಿಯಂದು ಈ ಪವಿತ್ರದಿನವನ್ನು ತುಳಸಿ ಮದುವೆಯನ್ನಾಗಿ ಆಚರಿಸುವರು. ಅಂದಿನ ದಿನ ರೇವತಿ ನಕ್ಷತ್ರದ ಯೋಗವಿದ್ದರೆ ಇನ್ನೂ ಶ್ರೇಷ್ಠ. (ಈ ದಿನದ ವಿಶೇಷ ಹಾಡುಗಳು ಮತ್ತು ವಿವರಗಳಿಗೆ ನಮ್ಮ ಈ ವಿಡಿಯೋ ನೋಡಿ)

ಉತ್ಥಾನವೆಂದರೆ ಏಳು ಎಂಬರ್ಥ. ಶ್ರೀಮನ್ನಾರಾಯಣನು ತನ್ನ ನಿದ್ರಾವಸ್ಥೆಯಿಂದ ಹೊರ ಬಂದು ತನ್ನ ಭಕ್ತಾದಿಗಳಿಗೆ ದರ್ಶನ ಕೊಡುವನೆಂಬ ಪ್ರತೀತಿ ಇದೆ. ಆ ಭಗವಂತನು ಹಾಲ್ಗಡಲಿನಲ್ಲಿ ಮಲಗಿದ್ದು, ಅವನನ್ನು ಸುಪ್ರಭಾತ ಸೇವೆಯ ಮೂಲಕ ಎಬ್ಬಿಸುವುದರಿಂದ ಈ ವ್ರತವನ್ನು ಕ್ಷೀರಾಬ್ಧಿ ವ್ರತವೆಂದೂ ಕರೆಯುವರು.

ಕಾರ್ತಿಕ ಶುಕ್ಲ ಪಕ್ಷ ಏಕಾದಶಿಯಂದು ಪ್ರಾತಃಕಾಲದಲ್ಲಿ ಕುಂಭದಾನವನ್ನು ಮಾಡಿ ಉಪವಾಸ ವ್ರತವನ್ನಾಚರಿಸಬೇಕು. ಅಂದು ಸೋಮವಾರವಾಗಿದ್ದು, ಉತ್ತರಾಷಾಢ ನಕ್ಷತ್ರವಾಗಿದ್ದರೆ ತುಂಬಾ ಶ್ರೇಷ್ಠ. ಅಂದಿನ ರಾತ್ರಿಯಂದೇ ವಿಷ್ಣುವನ್ನು ಎಬ್ಬಿಸಬೇಕು. ಹಾಗೆ ಎಬ್ಬಿಸುವಾಗ ಈ ಕೆಳಕಂಡ ವೇದೋಕ್ತ ಮಂತ್ರವನ್ನು ಹೇಳಬೇಕು.

ಇದಂ ವಿಷ್ಣುರ್ವಿಚಕ್ರಮೇ ತ್ರೇಧಾ ನಿದಧೇ ಪದಮ್‌।
ಸಮೂಢಮಸ್ಯ ಪಾಗೇಂಸುರೇ।।

ಮಳೆಗಾಲದ ನಾಲ್ಕು ತಿಂಗಳುಗಳಲ್ಲಿ ಮಳೆಯು ಹೆಚ್ಚಾಗಿದ್ದು, ಜನಜೀವನ ಅಸ್ತವ್ಯಸ್ತವಾಗಿರುತ್ತದೆ. ಇಂತಹ ಸಂದರ್ಭದಲ್ಲಿ ಸನ್ಯಾಸಿಗಳು ದೇಶ ಸಂಚಾರವನ್ನು ಮಾಡದೇ ಒಂದೆಡೆಯಲ್ಲಿ, ಚಾತುರ್ಮಾಸ್ಯ ವ್ರತವನ್ನು ಆಚರಿಸುವರು. ಆ ಸಂದರ್ಭದಲ್ಲಿ ಶ್ರೀಮನ್ನಾರಾಯಣನು ನಿದ್ರಾವಸ್ಥೆಯಲ್ಲಿರುತ್ತಾನೆಂದೂ, ಚಾತುರ್ಮಾಸ್ಯ ಮುಗಿಯುವ ವೇಳೆಯಲ್ಲಿ ಅವನನ್ನು ಎಬ್ಬಿಸಲು ಸುಪ್ರಭಾತವನ್ನು ಹಾಡುವರು. ಅದು ಸಂಕ್ಷಿಪ್ತವಾಗಿ ಹೀಗಿದೆ.

ಉತ್ತಿಷ್ಠೋತ್ತಿಷ್ಠ ಗೋವಿಂದ ಉತ್ತಿಷ್ಠ ಗರುಡಧ್ವಜ।
ಉತ್ತಿಷ್ಠ ಕಮಲಾಕಾಂತ ತ್ರೈಲೋಕ್ಯಂ ಮಂಗಲಂಕುರು।।

ಚಾತುರ್ಮಾಸ್ಯದ ಕೊನೆಯ ಹಂತದ ಏಕಾದಶಿಯ ರಾತ್ರಿ ಒಂದು ಕುಂಭದಲ್ಲಿ ಉದ್ದಿನಕಾಳಿನ ಪ್ರಮಾಣದ ಚಿನ್ನದ ಮೀನಿನ ಮೂರ್ತಿಗೆ ಪಂಚಾಮೃತ ಅಭಿಷೇಕ ಮಾಡಿ, ಪೂಜಿಸಿ, ಅಂದು ಜಾಗರಣೆಯನ್ನು ಮಾಡಿ, ದ್ವಾದಶಿಯ ಬೆಳಗ್ಗೆ ಮತ್ತೆ ಪೂಜಿಸಿ ಬ್ರಾಹ್ಮಣರಿಗೆ ದಕ್ಷಿಣೆ ಸಮೇತವಾಗಿ ದಾನ ಮಾಡಬೇಕು.

ಅಂದು ಧಾತ್ರೀ ದೇವಿಯ ಸ್ವರೂಪವಾದ ನೆಲ್ಲಿಯ ಮರವನ್ನು ಪೂಜಿಸಿ, ಧಾತ್ರೀ, ಶಾಂತಿ, ಮೇಧಾ, ಪ್ರಕೃತಿ, ವಿಷ್ಣುಪತ್ನೀ, ಮಹಾಲಕ್ಷ್ಮೀ, ರಮ್ಯಾ, ಕಮಲಾ, ಇಂದಿರಾ, ಲೋಕಮಾತಾ, ಕಲ್ಯಾಣೀ, ಕಮನೀಯಾ, ಸಾವಿತ್ರೀ, ಜಗದ್ಧಾತ್ರೀ, ಗಾಯತ್ರೀ, ಸುಧೃತೀ, ಅವ್ಯಕ್ತಾ, ವಿಶ್ವರೂಪಾ, ಸುರೂಪಾ ಮತು ಅಬ್ಧಿಭವಾ ಎಂಬ ಹೆಸರುಗಳಿಂದ ಅರ್ಚಿಸಬೇಕು. ಕೆಲವು ಮನೆಗಳಲ್ಲಿ ತುಲಸೀ ಮತ್ತು ಶ್ರೀಮನ್ನಾರಾಯಣನಿಗೆ ವಿವಾಹವನ್ನು ಮಾಡುವ ಪದ್ಧತಿಯೂ ಇದೆ.

ಭಗವಂತನಿಗೆ ಪುರುಷಸೂಕ್ತದಿಂದಲೂ ಮತ್ತು ತುಳಸಿ ದೇವಿಗೆ ಶ್ರೀಸೂಕ್ತದಿಂದಲೂ ಅರ್ಚನೆ ಮಾಡಬೇಕು. ತುಳಸಿಯ ಎದುರಿಗೆ ಶ್ರೀ ಕೃಷ್ಣನ ಪ್ರತಿಮೆಯನ್ನಿರಿಸಿ ಮಧ್ಯದಲ್ಲಿ ಅಂತರಪಟವನ್ನು ಹಿಡಿದು ಮದುವೆ ಮಾಡಿಸುತ್ತಾರೆ. ನೆಲ್ಲಿಯಲ್ಲಿ ವಾತ ಪಿತ್ತಗಳನ್ನು ಶಮನ ಮಾಡುವ ಶಕ್ತಿಯಿದೆ. ರಕ್ತದೋಷವನ್ನೂ ನಿವಾರಿಸುವ ಶಕ್ತಿಯಿದೆ. ಅದರ ಹಾರವನ್ನು ತುಳಸೀ ಮತ್ತು ನಾರಾಯಣನಿಗೆ ಹಾಕುವುದು ಪದ್ಧತಿ. ಪ್ರಾತಃಕಾಲದಲ್ಲಿ ಪೂಜೆಯನ್ನು ಮಾಡಿದರೆ, ಸಂಜೆಯ ಸಮಯದಲ್ಲಿ ತುಳಸಿ ವಿವಾಹವನ್ನು ಮಾಡುವರು.

This image has an empty alt attribute; its file name is M-V-SHNAKARANANDA.jpg

ಎಂ.ವಿ. ಶಂಕರಾನಂದ ಅವರು ಕನ್ನಡದ ಪ್ರತಿಷ್ಠಿತ ಪ್ರಕಾಶನ ಸಂಸ್ಥೆ ಸಪ್ನಬುಕ್‌ಹೌಸಿನಲ್ಲಿ ಸಂಪಾದಕರಾಗಿ, ಚೆನ್ನೈನ ಪ್ರಕಾಶನ ಸಂಸ್ಥೆ ಸುರಾ ಬುಕ್ಸ್ (ಪ್ರೈ)ಲಿ.ನಲ್ಲಿ ವ್ಯವಸ್ಥಾಪಕ ಸಂಪಾದಕರಾಗಿ ಸೇವೆ ಸಲ್ಲಿಸಿದ್ದಾರೆ. ಕನ್ನಡದಲ್ಲಿ ಐವತ್ತಕ್ಕೂ ಹೆಚ್ಚಿನ ಸ್ವತಂತ್ರ, ಅನುವಾದ, ಸಂಪಾದನಾ ಕೃತಿಗಳ ರಚನೆ ಇವರ ಹೆಗ್ಗಳಿಕೆ. ಮಧುಗಿರಿ, ಗೌರಿಬಿದನೂರು ತಾಲ್ಲೂಕು ರಾಜ್ಯೋತ್ಸವ ಪ್ರಶಸ್ತಿ, ಚಿಕ್ಕಬಳ್ಳಾಪುರ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಓಂಶಕ್ತಿ ಸಾಹಿತ್ಯ ಪ್ರಶಸ್ತಿ ಮತ್ತು ಹೇಮಂತ ಸಾಹಿತ್ಯ ಪುರಸ್ಕಾರಗಳನ್ನು ಪಡೆದಿರುವ ಇವರು ಹಲವು ರಾಜ್ಯಮಟ್ಟದ, ಪ್ರಾದೇಶಿಕ ಪತ್ರಿಕೆಗಳ ಅಂಕಣಕಾರರೂ ಆಗಿದ್ದಾರೆ.

INDIAN STOCK MARKET : ಕಳೆದ ವಾರದ ಪೇಟೆಯ ನೋಟ

ಷೇರು ಪೇಟೆ

ಕೆ ಜಿ ಕೃಪಾಲ್

-

November 15, 2021

0

INDIAN STOCK MARKET : ಕಳೆದ ವಾರದ ಪೇಟೆಯ ನೋಟ

ಇತ್ತೀಚಿನ ದಿನಗಳಲ್ಲಿ ಹೂಡಿಕೆದಾರರು ಅದರಲ್ಲೂ ವಿಶೇಷವಾಗಿ ಸಣ್ಣ ಹೂಡಿಕೆದಾರರು ಷೇರುಪೇಟೆಯಲ್ಲಿ ಹೂಡಿಕೆ ಆರಂಭಿಸಿದಾಗ ಇದ್ದ ಮೂಲ ಉದ್ದೇಶವನ್ನು ಮರೆತು ಪೇಟೆಯ ಏರಿಳಿತಗಳೊಂದಿಗೆ ತೇಲಾಡಿ ಪರಿಸ್ಥಿತಿಯ ಕೈಗೊಂಬೆಯಂತೆ ಚಟುವಟಿಕೆ ನಡೆಸುವುದು ಹೆಚ್ಚಾಗಿದೆ. ಇದಕ್ಕೆ ಕಾರಣ ಆನ್‌ ಲೈನ್‌ ಟ್ರೇಡಿಂಗ್‌ ನ ವ್ಯಾಮೋಹಕ್ಕೆ ಒಲಿದು, ವೆಚ್ಚವನ್ನು ಉಳಿಸಿದೆನೆಂಬ ಭಾವನೆಯಿಂದ ಖುಷಿ ಪಡುತ್ತಾರೆ, ಆರಂಭದಲ್ಲಿ. ಆದರೆ ನಂತರದಲ್ಲಿ ಪೇಟೆಯು ಖರೀದಿಸಿದ ಷೇರಿಗೆ ಪೇಟೆಯು ಯಾವ ರೀತಿಯ ಸ್ಪಂದನವನ್ನು ನೀಡಿ ಅನುಕೂಲ ಕಲ್ಪಿಸುತ್ತದೆ ಎಂಬುದನ್ನು ಕಾದು ನೋಡಬೇಕಾಗಿದೆ.

ಲಾಭಾಂಶ ಪ್ರಕಟಿಸಿದ ಕಂಪನಿಗಳು:

ಗ್ಲೆನ್‌ ಮಾರ್ಕ್‌ ಲೈಫ್‌ ಸೈನ್ಸಸ್ :‌ರೂ.10.50 ( ನಿಗದಿತ ದಿನಾಂಕ: 23/11/2021)
ಇರ್ಕಾನ್‌ ಇಂಟರ್ನ್ಯಾಶನಲ್‌ : ರೂ.0.70 ( ನಿಗದಿತ ದಿನಾಂಕ: 23/11/2021)
ಒ ಎನ್‌ ಜಿ ಸಿ : ರೂ.5.50 ( ನಿಗದಿತ ದಿನಾಂಕ: 23/11/2021)
ಟೈಡ್‌ ವಾಟರ್‌ ಆಯಿಲ್‌ : ರೂ.20.00 ( ನಿಗದಿತ ದಿನಾಂಕ: 23/11/2021)
ಕೊಚ್ಚಿನ್‌ ಶಿಪ್‌ ಯಾರ್ಡ್‌ : ರೂ.6.00 ( ನಿಗದಿತ ದಿನಾಂಕ: 24/11/2021)
ಹಿಂದೂಸ್ಥಾನ್‌ ಏರೋನಾಟಿಕ್ಸ್‌ : ರೂ.14.00 ( ನಿಗದಿತ ದಿನಾಂಕ: 24/11/2021)
ನ್ಯಾಟ್ಕೋ ಫಾರ್ಮಾ : ರೂ.0.50 ( ನಿಗದಿತ ದಿನಾಂಕ: 24/11/2021)
ಆಯಿಲ್‌ ಇಂಡಿಯಾ : ರೂ.3.50 ( ನಿಗದಿತ ದಿನಾಂಕ: 24/11/2021)
ಅಮರರಾಜಾ ಬ್ಯಾಟರೀಸ್‌ : ರೂ.4.00 ( ನಿಗದಿತ ದಿನಾಂಕ: 25/11/2021)
ಕ್ರಿಸಿಲ್‌ : ರೂ.9.00 ( ನಿಗದಿತ ದಿನಾಂಕ: 25/11/2021)
ಗುಜರಾತ್‌ ಥೆಮಿಸ್‌ ಬಯೋ : ರೂ.7.00 ( ನಿಗದಿತ ದಿನಾಂಕ: 25/11/2021)
ಹಿಂದುಜಾ ಗ್ಲೋಬಲ್‌ ಸೊಲೂಷನ್ಸ್‌ ರೂ.10.00 ( ನಿಗದಿತ ದಿನಾಂಕ: 25/11/2021)
ಪವರ್‌ ಫೈನಾನ್ಸ್‌ ಕಾರ್ಪರೇಷನ್‌ : ರೂ.2.50 ( ನಿಗದಿತ ದಿನಾಂಕ: 25/11/2021)
ರಾಷ್ಟ್ರೀಯ ಕೆಮಿಕಲ್ಸ್‌ ಅಂಡ್‌ ಫರ್ಟಿಲೈಸರ್ಸ್: ರೂ.1.35 ( ನಿಗದಿತ ದಿನಾಂಕ: 25/11/2021)
ರೈಟ್ಸ್‌ : ರೂ.4.00 ( ನಿಗದಿತ ದಿನಾಂಕ: 25/11/2021)
ಭಾರತ್‌ ಫೋರ್ಜ್‌ : ರೂ.1.50 ( ನಿಗದಿತ ದಿನಾಂಕ: 26/11/2021)
ಕಾವೇರಿ ಸೀಡ್‌ ಕಂಪನಿ : ರೂ.4.00 ( ನಿಗದಿತ ದಿನಾಂಕ: 26/11/2021)
ಪಿ ಟಿ ಸಿ ಇಂಡಿಯಾ : ರೂ. 2.00 ( ನಿಗದಿತ ದಿನಾಂಕ: 26/11/2021)

ವಾರದ ವಿಸ್ಮಯಕಾರಿ ಬೆಳವಣಿಗೆಗಳು:

ಟೈಡ್‌ ವಾಟರ್‌ ಆಯಿಲ್‌ ಕಂಪನಿ ತನ್ನ ತ್ರೈಮಾಸಿಕ ಫಲಿತಾಂಶವನ್ನು 12 ರಂದು ಪ್ರಕಟಿಸುವ ಕಾರ್ಯ ಸೂಚಿ ಪ್ರಕಟಿಸಿದ ದಿನ ಷೇರಿನ ಬೆಲೆ ರೂ.1622 ರಿಂದ ರೂ.1,686 ರವರೆಗೂ ಏರಿಕೆ ಪ್ರದರ್ಶಿಸಿ ನಂತರದ ದಿನ ರೂ.1789 ರವರೆಗೂ ಏರಿಕೆ ಕಂಡು ರೂ.1,717 ಕ್ಕೆ ಕುಸಿಯಿತು. ದಿನಾಂಕ 12 ರಂದು ಪ್ರಕಟಿಸಲಿರುವ ಫಲಿತಾಂಶಕ್ಕೂ ಮುನ್ನವೇ ಏರಿಳಿತಗಳು ಪ್ರದರ್ಶಿಸಿದಂತಾಗಿದೆ.
ಲಕ್ಷ್ಮಿ ಆರ್ಗ್ಯಾನಿಕ್‌ ಕೆಮಿಕಲ್ಸ್‌ ಕಂಪನಿ ಷೇರಿನ ಬೆಲೆ ಸೋಮವಾರದಂದು ರೂ.409 ರ ಸಮೀಪ ಕೆಳಗಿನ ಸರ್ಕ್ಯುಟ್‌ ನಲ್ಲಿದ್ದು ಮಂಗಳವಾರದಂದು ಚಟುವಟಿಕೆ ಆರಂಭವಾದ ನಂತರ ಷೇರಿನ ಬೆಲೆ ಗರಿಷ್ಠ ಆವರಣ ಮಿತಿ ತಲುಪಿ ನಂತರ ರೂ.423 ರ ಸಮೀಪಕ್ಕೆ ಹಿಂದಿರುಗಿತು. ವಾರಾಂತ್ಯದಲ್ಲಿ ರೂ.413 ರ ಸಮೀಪ ಕೊನೆಗೊಂಡಿದೆ.
ಇಂಡಿಯಾ ಬುಲ್ಸ್‌ ಹೌಸಿಂಗ್‌ ಫೈನಾನ್ಸ್‌ ಕಂಪನಿಯ ಷೇರಿನ ಬೆಲೆ ಬುಧವಾರದಂದು ರೂ.258 ನ್ನು ತಲುಪಿದ್ದು, ಶುಕ್ರವಾರ ರೂ.213 ರವರೆಗೂ ಇಳಿಕೆ ಕಂಡು ರೂ.230 ರ ಸಮೀಪ ಕೊನೆಗೊಂಡಿದೆ. ಶುಕ್ರವಾರ ಪ್ರಕಟಿಸಿದ ಫಲಿತಾಂಶ ಪ್ರೋತ್ಸಾಹದಾಯಕವಾಗಿಲ್ಲ ಎಂಬ ಕಾರಣಕ್ಕೆ ದಿನದ ಮದ್ಯಂತರದಲ್ಲಿ ಚಷೇರಿನ ಬೆಲೆ ರೂ.213 ರ ಸಮೀಪಕ್ಕೆ ಕುಸಿದಿತ್ತು.

*ಕಲ್ಯಾಣ್‌ ಜುವೆಲ್ಲರ್ಸ್‌ ಕಂಪನಿಯು ಈ ವರ್ಷ ಪ್ರತಿ ರೂ.10 ರ ಮುಖಬೆಲೆಯ ಷೇರಿಗೆ ರೂ.87 ರಂತೆ ಆರಂಭಿಕ ಷೇರು ವಿತರಣೆ ಮಾಡಿದೆ. ನಂತರದಲ್ಲಿ ಮೇ ತಿಂಗಳಲ್ಲಿ ರೂ.56 ರವರೆಗೂ ಕುಸಿದು ನಂತರ ಜೂನ್‌ ತಿಂಗಳಲ್ಲಿ ರೂ.89 ರವರೆಗೂ ಏರಿಕೆ ಕಂಡಿತು. ತದನಂತರದಲ್ಲಿ ಪೇಟೆಯು ಉತ್ತುಂಗಕ್ಕೆ ತಲುಪಿದರೂ ಸಹ ಅದು ವಿತರಣೆ ಬೆಲೆಯನ್ನೂ ಸಹ ತಲುಪದಾಗಿದೆ. ಸೆಪ್ಟೆಂಬರ್‌ ತ್ರೈಮಾಸಿಕದಲ್ಲಿ ಉತ್ತಮ ಫಲಿತಾಂಶ ಪ್ರಕಟಿಸಿದರೂ ಅದು ವಿತರಣೆ ಬೆಲೆ ತಲುಪದಾಗಿದೆ. ರೂ.10 ರ ಮುಖಬೆಲೆ, ಲಾಭಗಳಿಸುವ ಕಂಪನಿಯು ಇಷ್ಠು ಕಡಿಮೆಬೆಲೆಯಲ್ಲಿದೆ ಎಂಬುದೂ ಸಹ ವಿಸ್ಮಯಕಾರಿ ಅಂಶವಾಗಿದೆ.

*ಕ್ಲಾರಿಯಂಟ್‌ ಕಂಪನಿಯು, ಕೆಳಮಧ್ಯಮ ಶ್ರೇಣಿಯ ಕಂಪನಿಯಾದರೂ ಸಹ, ಎಷ್ಠರಮಟ್ಟಿಗೆ ಹೂಡಿಕೆದಾರ ಸ್ನೇಹಿ ಎಂದರೆ ಸುಮಾರು 20 ವರ್ಷಗಳಲ್ಲಿ ಪ್ರತಿ ಒಂದು ಷೇರಿಗೆ ರೂ.650 ಕ್ಕೂ ಹೆಚ್ಚಿನ ಲಾಭಾಂಶವನ್ನು ವಿತರಿಸಿದ ಕಂಪನಿಯಾಗಿದೆ. ಈ ಕಂಪನಿಯ ಷೇರಿನ ಬೆಲೆ ಒಂದು ತಿಂಗಳ ಹಿಂದಷ್ಠೇ ರೂ.625 ರ ವರೆಗೂ ಏರಿಕೆ ಕಂಡು ನಂತರದಲ್ಲಿ ಶುಕ್ರವಾರ 12 ರಂದು ಕಂಪನಿಯ ಸೆಪ್ಟೆಂಬರ್‌ ತ್ರೈಮಾಸಿಕ ಫಲಿತಾಂಶವು ನಿರೀಕ್ಷಿತ ಮಟ್ಟದಲ್ಲಿ ಇಲ್ಲದ ಕಾರಣ ಷೇರಿನ ಬೆಲೆಯು ರೂ.534 ರವರೆಗೂ ಕುಸಿದು ರೂ.541 ರವರೆಗೂ ಏರಿಕೆ ಕಂಡಿದೆ. 2020 ರಲ್ಲಿ ರೂ.151 ರೂಪಾಯಿಗಳ ಲಾಭಾಂಶ ವಿತರಿಸಿದರೆ, 2021 ರಲ್ಲಿ ಪ್ರತಿ ಷೇರಿಗೆ ರೂ.65 ರ ಲಾಭಾಂಶ ವಿತರಿಸಿದೆ. ಷೇರಿನ ಬೆಲೆಯು 2001 ರಲ್ಲಿ ರೂ.36 ರ ಕನಿಷ್ಠದ ಸಮೀಪವಿದ್ದ ಷೇರಿನ ಬೆಲೆಯು 2006 ರಲ್ಲಿ ರೂ.395 ಕ್ಕೆ ಏರಿಕೆ ಕಂಡು, 2009 ರಲ್ಲಿ ರೂ.144 ರ ಸಮೀಪಕ್ಕೆ ಇಳಿಯಿತು. 2011 ರಲ್ಲಿ ರೂ.854 ಕ್ಕೆ ಏರಿಕೆ ಕಂಡು 2013 ರಲ್ಲಿ ರೂ.371 ರವರೆಗೂ ಕುಸಿಯಿತು. 2015 ಕ್ಕೆ ರೂ.1,180 ಕ್ಕೆ ಜಿಗಿಯಿತು. 2019 ರಲ್ಲಿ ರೂ.265 ರ ಸಮೀಪಕ್ಕೆ ಕುಸಿದು 2020 ರಲ್ಲಿ ರೂ.193 ರ ಸಮೀಪಕ್ಕೆ ಜಾರಿತು. ಆದರೆ ಈ ವರ್ಷ ರೂ.642 ರವರೆಗೂ ಜಿಗಿದು ಈಗ ರೂ.541 ರ ಸಮೀಪವಿದೆ.

*‌ಪೆಂಟಾ ಮೀಡಿಯಾ ಗ್ರಾಫಿಕ್ಸ್ ಕಂಪನಿಯು 2000 ದಲ್ಲಿನ ಷೇರುಪೇಟೆ ಹಗರಣದ ಸಮಯದಲ್ಲಿ ಪ್ರತಿ ಷೇರಿಗೆ ರೂ.3,000 ಕ್ಕೂ ಹೆಚ್ಚಿನ ದರದಲ್ಲಿ ವಹಿವಾಟಾಗುತ್ತಿದ್ದ ಷೇರಾಗಿದ್ದು, ಕಾಲಕ್ರಮೇಣ ಅದು ಕುಸಿಯುತ್ತಾ ಬಂದು ಸಧ್ಯ 30 ಪೈಸೆಗಳಲ್ಲಿದ್ದು, ಇದನ್ನು ವಹಿವಾಟಿನಿಂದ ಅಮಾನತುಗೊಳಿಸಲಾಗಿದೆ. ಆದರೂ ಗ್ರೇಡೆಡ್‌ ಸರ್ವೆಲನ್ಸ್ ಮೆಕ್ಯಾನಿಸಂ ಸ್ಟೇಜ್‌ 3 ರ ಅಡಿಯಲ್ಲಿ ಪ್ರತಿ ಸೋಮವಾರ ಹೆಚ್ಚಿನ ಸುರಕ್ಷಾ ಠೇವಣಿಯೊಂದಿಗೆ ವಹಿವಾಟಿಗೆ ಅನುಮತಿಸಲಾಗಿದೆ. ಈ ಕಂಪನಿ 2001 ರಲ್ಲಿ ಪ್ರತಿ ಷೇರಿಗ ರೂ.3 ರಂತೆ ಡಿವಿಡೆಂಡ್‌ ವಿತರಿಸಿದ ನಂತರ ಕಾರ್ಪೊರೇಟ್‌ ಫಲಗಳನ್ನು ವಿತರಿಸಿಲ್ಲ.

ಟಾಟಾ ಸ್ಟೀಲ್‌ ಬಿ ಎಸ್‌ ಎಲ್‌ ವಿಲೀನ ವಿಚಾರ:

ಈ ಹಿಂದೆ ಭೂಷಣ್‌ ಸ್ಟೀಲ್‌ ಎಂದಿದ್ದ ಈ ಕಂಪನಿಯು ಐಬಿಸಿ ನಿಯಮದಡಿ ಟಾಟಾ ಸ್ಟೀಲ್‌ ಕಂಪನಿಯು 2018 ರಲ್ಲಿ ತೆಕ್ಕೆಗೆ ಸೇರಿಕೊಂಡಿತು. ಈಗ ಈ ಕಂಪನಿಯನ್ನು ಟಾಟಾ ಸ್ಟೀಲ್‌ ಕಂಪನಿಯಲ್ಲಿ ವಿಲೀನಗೊಳ್ಳಿಸಲಿರುವ ಕಾರಣ ಸೋಮವಾರದಿಂದ ಟಾಟಾ ಸ್ಟೀಲ್‌ ಬಿ ಎಸ್‌ ಎಲ್‌ ಷೇರುಗಳು ವಹಿವಾಟಾಗುವುದಿಲ್ಲ. ಪ್ರತಿ 15 ಟಾಟಾ ಸ್ಟೀಲ್‌ ಬಿ ಎಸ್‌ ಎಲ್‌ ಗೆ ಒಂದು ಟಾಟಾ ಸ್ಟೀಲ್‌ ಷೇರುಗಳನ್ನು ವಿಲೀನ ಪ್ರಕ್ರಿಯಯಲ್ಲಿ ನೀಡಲಾಗುವುದು.

ಹೊಸ ಷೇರಿನ ವಿಚಾರ :

ಎಫ್‌ ಎಸ್‌ ಎನ್‌ ಇ-ಕಾಮರ್ಸ್‌ ವೆಂಚರ್ಸ್‌ ಲಿ ( ನೈಕಾ) ಷೇರುಗಳು ನವೆಂಬರ್‌ 10 ರಂದು ಬಿ ಗುಂಪಿನಲ್ಲಿ ವಹಿವಾಟಿಗೆ ಬಿಡುಗಡೆಯಾಗಿವೆ. ಆರಂಭದ ದಿನ ರೂ.2001 ರ ಸಮೀಪ ಆರಂಭವಾಗಿ ರೂ.2,206 ರ ಸಮೀಪದಲ್ಲಿ ಕೊನೆಗೊಂಡಿತು. ಈ ಕಾರಣ ಕಂಪನಿಯ ಮಾರ್ಕೆಟ್‌ ಕ್ಯಾಪಿಟಲೈಸೇಷನ್‌ ರೂ.1 ಲಕ್ಷಕೋಟಿ ಮೀರಿತು ಆದರೆ 11 ರಂದು ರೂ.2,050 ರವರೆಗೂ ಕುಸಿದು ಮಾರ್ಕೆಟ್‌ ಕ್ಯಾಪಿಟಲೈಸೇಷನ್‌ ರೂ.1 ಲಕ್ಷ ಕೋಟಿಯೊಳಗೆ ಕುಸಿದರೂ, ಶೀಘ್ರವಾಗಿ ಚೇತರಿಕೆ ಕಂಡು ರೂ.2,216 ರಲ್ಲಿ ದಿನದ ಅಂತ್ಯಕಂಡಿತು. 12 ರಂದು ಷೇರಿನ ಬೆಲೆ ರೂ.2,409 ನ್ನು ತಲುಪಿ ರೂ.2,358 ರ ಸಮೀಪ ಕೊನೆಗೊಂಡು ಪರ್ಸನಲ್ ಉತ್ಪನ್ನಗಳ ದೈತ್ಯ ಕಂಪನಿ ಹಿಂದೂಸ್ಥಾನ್‌ ಯೂನಿಲೀವರ್‌ ಷೇರಿನ ಬೆಲೆ ಸಮೀಪದಲ್ಲಿದೆ. ಹಿಂದೂಸ್ಥಾನ್‌ ಯೂನಿಲೀವರ್‌ ಕಂಪನಿಯು ನೈಕಾ ಕಂಪನಿಯ ಉತ್ಪನ್ನವಾದ ಅಲಂಕಾರಿಕ ಸಾಮಾಗ್ರಿಗಳ ಜೊತೆಗೆ ನಿತ್ಯೋಪಯೋಗಿ ಪದಾರ್ಥಗಳಾದ ಸೋಪ್‌ ಗಳು, ಟೂತ್‌ ಪೇಸ್ಟ್ ಗಳು, ಕಾಫಿ ಮತ್ತು ಟೀ, ಹಾರ್ಲಿಕ್ಸ್‌ ನ ಹಲವು ವಿಧಗಳು ಮುಂತಾದವುಗಳನ್ನು ತನ್ನ ತೆಕ್ಕೆಯಲ್ಲಿರಿಸಿಕೊಂಡಿರುವ ಕಂಪನಿಯಾಗಿದೆ. ಷೇರಿನ ಬೆಲೆಗಳು ಸರಿಸಮನಾಗಿರುವುದರಿಂದ ಷೇರುದಾರರು ಹೊಸ ಕಂಪನಿಯಿಂದ ಮತ್ತೊಂದು ಬಲಿಷ್ಠ ಕಂಪನಿಗೆ ಬದಲಾಗಲೂ ಸಹ ಉತ್ತಮ ಅವಕಾಶವೆನಿಸಬಹುದು.
ಫಿನೋ ಪೇಮೆಂಟ್‌ ಬ್ಯಾಂಕ್

ಈ ಕಂಪನಿಯು ಪ್ರತಿ ಷೇರಿಗೆ ರೂ.577 ರಂತೆ ಅಕ್ಟೋಬರ್‌ ತಿಂಗಳಲ್ಲಿ ಆರಂಭಿಕ ಷೇರು ವಿತರಿಸಿತು. 12 ರಂದು ಶುಕ್ರವಾರದಂದು ಬಿ ಗುಂಪಿನಲ್ಲಿ ವಹಿವಾಟಿಗೆ ಬೆಡುಗಡೆಯಾಗಿದೆ. ಆರಂಭದ ದಿನ ರೂ.511 ರವರೆಗೂ ಕುಸಿದು ರೂ.545 ರ ಸಮೀಪ ಕೊನೆಗೊಂಡು ಆರಂಭಿಕ ಷೇರು ವಿತರಣೆಯಲ್ಲಿ ಹೂಡಿಕೆ ಮಡಿದವರಿಗೆ ಹಾನಿಯುಂಟುಮಾಡಿದೆ.

ನೆನಪಿರಲಿ: ಉಳಿಸಿದ ಹಣ -ಗಳಿಸಿದ ಹಣ. ಈ ಅಂಕಣ ಷೇರು ಪೇಟೆಯ ಚಟುವಟಿಕೆಯಾಧರಿತ ಸುದ್ದಿ ವಿಶ್ಲೇಷಣೆ ಮಾತ್ರ . ಅಂತಿಮವಾಗಿ ಹೂಡಿಕೆ ನಿರ್ಧಾರ ಯಾವಾಗಲು ನಿಮ್ಮದೇ ಆಗಿರುತ್ತದೆ. ಅಂಕಣಕಾರರಾಗಲಿ ,ಕನ್ನಡಪ್ರೆಸ್ .ಕಾಮ್ ಆಗಲಿ ನಿಮ್ಮ ಹೂಡಿಕೆ ನಿರ್ಧಾರಗಳಿಗೆ ಜವಾಬ್ದಾರಿ ಆಗದು.